Diɛt 10 - JAM DE NHIALIC 2011

Lɔ̈ŋ në biäk de Yic

¹ Eeŋö yïn kɔ̈ɔ̈c tëmec aläl Bɛ̈nydït? Eeŋö yïn rɔ thiaan në wook të tɔ̈u wok ë nuanic?

² Kɔc rac aleeckï röt ku ayɔŋkï kɔc kuanynyïïn, dɔm keek në wïïnkɛn ke dɛ̈p cïk looi.

³ Kɔc rac ayek röt lɛɛc në kërɛɛc de kek piɔ̈ɔ̈th, röördït piɔ̈ɔ̈th ayek lam aciɛɛn ku reeckï Bɛ̈nydït.

⁴ Kɔc rac acïkï ee diɛɛr në Bɛ̈nydït, aye lɛcden ke tɔ täk nɔn ye Nhialic ɣɔ̈ric.

⁵ Kɔc rac ayek tiam në këriëëcic ëbɛ̈n. Acïkï guiɛɛr de Nhialic ee yökic, ayek kɔc ke aterden dɔl gup.

⁶ Ayek lɛ̈k röt kapäc an, “Wok cïï duëër kɔn wïïk, acïn nuan duëër wo kɔn yök.”

⁷ Jamden athiäŋic ke lɛ̈ɛ̈t ku tör, ku riëëc, ayek dap jam në jam de män ku luɛɛl ë wël rac.

⁸ Ayek thiaan ë bɛ̈i yiic, ke ke kɔɔr bïk kɔc cïn kë cïk wööc nɔ̈k. Ayek kɔc bïk nɔ̈k neem ë cuëër,

⁹ ayek tïït ɣäänkɛn ke thiaan cï köör, ayek tɔ̈c ke ke buth kɔc kuanynyïïn, ayek keek dɔm ë wïndɛn ë dɛ̈p ku thelkï ke wei.

¹⁰ Kɔc kuanynyïïn aye ke duöm piny, aye kɔc ril ke tiaam.

¹¹ Ago kɔc rac röt aa yöök an, “Nhialic ë nɔm määr! Ë yenyin kum ka acïï wo bï bɛ tïŋ ë caaŋde!”

¹² Jɔt rɔt Bɛ̈nydït, ku guiir löŋ de kɔc rac! Tak yïnɔm në kɔc nuan!

¹³ Eeŋö duëër kɔc rac Nhialic dhɔ̈l guöp abïk röt aa yɔ̈ɔ̈k an, “Acïn këtuc bï luöi yɛn?”

¹⁴ Ku yïn ee yaaŋ tïŋ ku tïŋ nuan ku yïn ee kuɔɔny bɛ̈ɛ̈i. Kɔc yɔŋ keek ayek röt gäm yïn, ee yïn ee kɔc cïn käŋ kony.

¹⁵ Dhoŋ riɛl de kɔc rac ku kɔc ee kërac looi kɔ̈u, luöiyë ke këtuc në biäk de kë cïk looi, agokï cïï be looi.

¹⁶ Bɛ̈nydït ee melik aɣet athɛɛr. Juöör ee yiëth kɔ̈k lam abïk määr pinyde.

¹⁷ Yïn bï lɔ̈ŋ de kɔc cï miɛn aa piŋ Bɛ̈nydït, ku abä keek riit piɔ̈ɔ̈th.

¹⁸ Yïn bï dhiën de kɔc yɔŋ ku mïth abɛɛr piŋ, abä keek luök yic, ago kɔc ke cïï bï bɛ aa riääc.