Dhiëëu 3 - JAM DE NHIALIC 2011

Luɔi de Këtuc, ku Puŋdepiɔ̈u, ku Aŋäth

¹ Ee yɛn ee raan ŋic täu ye Nhialic raan luöi këtuc.

² Acï yɛn kuaath ë mɔ̈ɔ̈thic liŋliŋ të cïn ɣɛɛr.

³ Ku ee yɛn dui ku be yɛn dui në dui cïn kokdepiɔ̈u.

⁴ Acï rïïŋdï tɔ lööny piny ku piɔ̈ɔ̈ny dëldï ku dhoŋ yomkï.

⁵ Acï yɛn guöör në alooc de nuan yic kekë arɛɛm.

⁶ Acï yɛn tɔ rɛ̈ɛ̈r në mɔ̈ɔ̈thic, cï kɔc cï thou thɛɛr.

⁷ Acï yɛn rek në joth, acïn aŋäth në biäk duëër ɛn rɔt kual.

⁸ Yɛn cï lɔ̈ŋ në röldït ke ya kɔɔr kuɔɔny, ku Nhialic acï pïŋ rɛɛc.

⁹ Yɛn ee lɔ käŋkäŋ të cath ɛn, päny de kuur acï yɛn gël të yan a nɔm wɛl thïn ëbɛ̈n.

¹⁰ Ee ya tiit cï köör ayuääl, ku ee kɛɛc ë yakɔ̈u cï köör.

¹¹ Ee yɛn cuɔp ë kueer këc, ku thim ɛn ë thïïm ku nyiëëŋ a piny.

¹² Acï dhaŋde miit, ku ee yɛn mɔ̈ɔ̈c në wiɛth.

¹³ Acï wiɛthke mɔc në yapiɔ̈u në rïïŋdï yic.

¹⁴ Kɔc ayek ɛn dɔl guöp aköölnyïïn ëbɛ̈n, yɛn ee këdɛn yek ket kedhie.

¹⁵ Acïk a gäm nuan tuc thok ke ee këcam kekë pïïu.

¹⁶ Acï yɛn cuɔth nyin piny ku dhuɔŋ ya lec në kɔi yiic.

¹⁷ Yɛn cï nɔm määr në pialëguöp ku mät ku miɛtëpiɔ̈u.

¹⁸ Yɛn cï nɔm ciɛ̈n kaam de pïïr dït cï döŋ, an Aŋäth ŋääth ɛn Bɛ̈nydït acï liu ku dhuëëŋdï acï jäl.

¹⁹ Täŋ yan arɛɛmdï tak, ku ciën ciën ɛn nɔm piny, acït wurïï kec.

²⁰ Aya tak aköölnyïïn ku yɛn ee piɔ̈u cuän.

²¹ Ku aŋäth ee yenɔm puk të yan ee töŋë tak, an,

²² Nhiëër agɔk de Bɛ̈nydït acie kɔ̈ɔ̈c, ku kokdepiɔ̈ndu aŋoot ke tɔ̈u.

²³ Apiɛth cï miäk rial, ku atiëc ë gɔk cï bɛ̈n de akɔ̈l thok.

²⁴ Bɛ̈nydït ee yen ee biäkdï, ka yɛn bï aŋäthdï tääu në yeguöp.

²⁵ Bɛ̈nydït apiɛth kekë raan ëbɛ̈n, raan ee yen ŋɔ̈ɔ̈th.

²⁶ Ka apiɛth tëde wook buk En tiit ëmääth. Buk tiit bïï wook kony.

²⁷ Ku apiɛth bï raan, ee tiëtë ŋic ke wo ye dhuök.

²⁸ Të cï wok nuan, wok duëër nyuc wapäc ke wo tït në mim

²⁹ Wo duëër wonïïm guöt piny në riëëu, në biäk duëër aŋäth dhil ŋoot ke tɔ̈u.

³⁰ Cakaa wok ë cï dui ku cï wo läät, aduëërku ke gam kedhie.

³¹ Bɛ̈nydït ee piɔ̈u kok acïï wok bï rɛɛc anande.

³² Aduëër wook tɔ jeth piɔ̈ɔ̈th, ku abï piɔ̈u kok, në biäk de nhiëërdɛn agɔk nhiɛɛr En wook.

³³ Acïï piɔ̈u ee miɛt të cï En wo yiɛ̈n jiɛthëpiɔ̈u kekë arɛɛm.

³⁴ Bɛ̈nydït aŋic të cï wëikuɔ dhuööŋ në aloc yiic ëbɛ̈n.

³⁵ Aŋic të cïï yicdan cï gäm wook pɛ̈n wook.

³⁶ Të kënë löŋ ŋiëc guiir ë gööny yic amɛɛn ë Bɛ̈nydït.

³⁷ Këde piɔ̈n ë Bɛ̈nydït yetök, yen aye looi aköölnyïïn.

³⁸ Këpiɛth ku kërac kedhie ayek röt looi kedhie në jam de Bɛ̈nydït.

³⁹ Eeŋö ee wo tɔ gööny të cïï wook luöi këtuc në biäk de karɛckuɔ?

⁴⁰ Themku kuɛɛrkuɔ yiic ku pukku röt Bɛ̈nydït.

⁴¹ Liëpku wopiɔ̈ɔ̈th ku lɛ̈ŋku Nhialic nu paannhial, an,

⁴² “Wo cï karɛc looi ku reecku Yïn, ku Yïn kɛ̈n wo päl awɛ̈ɛ̈c Yïn Bɛ̈nydït.

⁴³ “Yïn cï wook cop ku näk wo, kokdepiɔ̈ndu acï agönhdu yen thiaan.

⁴⁴ Acï thiaan në luän dïït coolic, agönhdu acïï lɔ̈ŋda tɔ lɔ tëde Yïn.

⁴⁵ Yïn cï wook tɔ ye kuut ye kɔc ke piny nɔm rɛɛc.

⁴⁶ “Wok cï läät ku dɔl wogup në kɔc ke aterda kedhie.

⁴⁷ Wok cï lööny në riääkic ku nuanic, wo rɛ̈ɛ̈r ë diɛɛric kekë riɔ̈ɔ̈c.

⁴⁸ Nyïïnkï ayek wat në kiɛɛr ke pïïu, në biäk de riääk cïï ë kɔckï riɔ̈ɔ̈k.

⁴⁹ “Pïïu ke yanyin abïk wɛ̈t bei në nyin cie kɔ̈ɔ̈c.

⁵⁰ Agut të le Bɛ̈nydït piny luiit paannhial ku tïŋ wook.

⁵¹ Piɔ̈ndï acï jieth të wën tiëŋ ɛn kë cï tuöl tëde diëër ke pänydït.

⁵² “Yɛn cï deep cït man ë dit në kɔc ke ater cïn nïïm kë duëër kek a maan.

⁵³ Acïk ɛn cuat ë pulic ke ya pïïr, ku kumkï pul nɔm në kuur.

⁵⁴ Go pïïu röt gɔl në kum kum kek yanɔm piny, guɔ ŋic nɔn cän thiɔ̈k wo thuɔɔu.

⁵⁵ “Guɔ yïn cɔɔl Bɛ̈nydït, ke ya tɔ̈u ë pul thar piny.

⁵⁶ Ku wën cän Yïn lɔ̈ŋ bä lɔ̈ŋdï piŋ, acï bɛ̈n piŋ.

⁵⁷ Yïn cï lɔ̈ŋdï bɛ̈n bɛ̈ɛ̈r, ku yɔ̈ɔ̈kë yɛn nɔn cän bï riɔ̈ɔ̈c.

⁵⁸ Bɛ̈nydït, Yïn cï ya bɛ̈n kony, ku luäk wëikï.

⁵⁹ Luök ë ya luk Yïn ŋic awäny cï luöi yɛn.

⁶⁰ Yïn ŋic luöi mɛɛn ë kɔc ke aterdï yɛn, ku luöi ye kek kiɛɛr rac luöi yɛn.

⁶¹ “Acï keek piŋ röt ke ke lɛ̈ɛ̈t ɛn, Bɛ̈nydït Yïn ŋic kiɛɛrdɛn rac.

⁶² Kɔc man ɛn ayek thook täu në yaguöp, ku yek kiɛɛr rac looi aköölnyïïn.

⁶³ Gɔl miäk rial agut cï thëën ayek a jääm guöp.

⁶⁴ “Bɛ̈nydït, luöiyë keek këtuc, në biäk de kë cïk looi.

⁶⁵ Lämë keek aciɛɛn ku thiäŋ keek në riɔ̈ɔ̈c.

⁶⁶ Bɛ̈nydït näk keek në agɔ̈th, ku nyaaiyë keek ë pinynɔm.