Dhiëëu 1 - JAM DE NHIALIC 2011

Jiɛthëpiɔ̈u de Jeruthalem

¹ Eeŋö cïï Jeruthalem döŋ aya yetök, wun wään cï kɔn thiäŋ ke kɔc! Wun wään ye juöör riëëu, ënɔɔnë acï ciët tiiŋ thuööm. Adhuëëŋ ke pɛ̈ɛ̈nydït acï keek tɔ ye lïïm.

² Ee ruu ke dhiau wakɔ̈u, ku jɔ pïïu wat ë yegëm. Määthkɛn wäänë kedhie, acïn raan cï döŋ bïï yen bɛ̈n duut piɔ̈u. Kɔc wään mät në yen acïk yen nyiɛɛn, ku ënɔɔnë acïk aa kɔc de ater në yen.

³ Kɔc ke Juda acï keek tɔ ye lïïm, acï keek cuɔp wei ë bɛ̈iken yiic. Arëërkï në juöör kɔ̈k yiic, ke ke cïn nïïm piny. Acï keek gɛɛu cil në kɔc ke ater, ku acïn të duëër kek röt kual.

⁴ Acïn kɔc ee bɛ bɛ̈n në Luaŋdïtic, në akööl ɣeriic ke läm. Duet wään ee ket thïn acï keek thɛl wei, ku bäny de kake Nhialic adhiaukï, ku kɛ̈l ke pänydït thook alek liŋliŋ, ku Dhiɔn guöpde atök.

⁵ Kɔc de ater në Dhiɔn acïk tiam, ka amukkï në riɛlden. Acïï Bɛ̈nydït tɔ nuan në biäk de karɛckɛn juëc kedhie. Mïthke acï keek peec ku jɔtë keek wei.

⁶ Läk de nyan de Dhiɔn acï ya ke ye paar. Bänyke acïk ciët ŋer cï kɔ̈c kekë cɔk. Ŋer cïï riɛl jäl të kɔt kek në kɔc ee ke yɔ̈ɔ̈p.

⁷ Acï döŋ yetök ënɔɔnë, yen Jeruthalem, ku ee läkdɛn ɣɔn thɛɛr tak. Wään lööny en, në kɔc ke ater cin, acïn raan cï yen bɛ̈n kony. Ku kɔc ke aterde acïk en dɔl guöp ɣɔn wïïk en.

⁸ Jeruthalem acï rɔt riɔk në kërac. Dhuëëŋ de acï jäl, acïn kɔ̈u lupɔ ku aye dɔl guöp. Ee teer ku ee ye nyin kum në ayäär.

⁹ Kërɛɛcde acï guɔ tïŋ, ku acïn këde yic thïn kekë riääkde. Wïïkde ee kërac aläl, ku acïn raan cï ye duut piɔ̈u. Kɔc ke aterde acïk tiam, ku ee Bɛ̈nydït lɔ̈ŋ në kokdepiɔ̈u.

¹⁰ Kɔc ke ater acïk wëuke peec kedhie. Acï keek tïŋ ke ke lɔ tëɣeric guöp, të cïï Bɛ̈nydït pɛ̈n juöör cie Judai, ke ke cïï bï aa lɔ në akutnɔmdu yic.

¹¹ Kɔc ke Jeruthalem ayek teer ke ke kɔɔr kë bïk cam. Ayek wëuken waar në këcam bï ke muk apïïr. Pänydït ee cööt, an, “Bɛ̈nydït, tïŋ ɛn, woi ɛn në nuandï yic.

¹² Ku ye kɔc tɛ̈k kueer ëbɛ̈n yöök an, “Tïŋ ɛn! Acïn raan cï arɛɛm kɔn yök cït man ë yɛn. Arɛɛm ë yïïn ë Bɛ̈nydït yɛn në akööl ke agönhde.

¹³ “Acï mac tuööc paannhial, many ee bɛ̈n dɛ̈p ë yayic. Acï yɛn deep ë wïn de dɛ̈p ku bïï ɛn piny. Ku jɔ yɛn pɔ̈l ku nyiëŋ ɛn arɛɛm cie kɔ̈ɔ̈c.

¹⁴ “Acï karɛckï ŋic kedhie ku duut keek ëbɛ̈n tëtök. Ku nɔ̈ɔ̈k keek ë yayeth, aguɔ jɔ kɔ̈c në ɣɔ̈ɔ̈cden. Bɛ̈nydït acï yɛn gäm kɔc ke aterdï, ka yɛn cï nɔm ciën kony ë kenïïm.

¹⁵ “Bɛ̈nydït acï kɔckiën ril kë tɔŋ rɛɛc kedhie. Ku tooc amatnɔm bïï dhuökï riɔ̈ɔ̈k. Acïk kɔckï dhuɔŋ piny cït man ye raan mɔ̈n de enap dhiim tëde dhiɛ̈m.

¹⁶ “Yeka wat yɛn nyin wokë pïïu. Acïn raan dut ɛn piɔ̈u, ku acïn raan riit ɛn piɔ̈u. Raan de ater acï yɛn rum, kɔckï acïn kë cï döŋ tëde keek.

¹⁷ “Yɛn cï ya ciin ɣaak biic, ku acïn raan bï yɛn kony. Bɛ̈nydït acï yɛn cöl kɔc ke ater në juööriic ëbɛ̈n. Ayek ɛn luööi cït man ë kë nhiany.

¹⁸ “Ku Bɛ̈nydït apiɛth piɔ̈u, në biäk kɛ̈n ɛn En riëëu guöp. Piɛŋkï këdï, wek kɔc ceŋ piny nɔm ëbɛ̈n, tiëŋkï yɛn në arɛɛmdï yic. Dhuökï ku duetkï acï keek jɔt ke ke cï peec.

¹⁹ “Yɛn cï kɔc mät në yɛn cɔɔl, ku acïk jaai bïk a kony. Bäny ke kakë Nhialic ku röördït acïk thou në kuɛɛr ke pänydïtic, ke ke kɔɔr kë cam bï keek muk apïïr.

²⁰ “Bɛ̈nydït, tïŋ tɔ̈ɔ̈kdï, tïŋ arɛɛm de yɛn piɔ̈u! Piɔ̈ndï acï dhuɔɔŋ kekë jiɛthëpiɔ̈u në biäk de karɛckï. Ade kɔc näk kɔc ë kuɛɛriic, ayï biökiic aya thuɔɔu anu thïn.

²¹ “Tïŋ teerdï, acïn raan dut ɛn piɔ̈u. Kɔc ke aterdï amitkï piɔ̈ɔ̈th në biäk cï yïn riääk tɔ bɔ̈ në yaguöp. Tɔ kööl wään cï lueel ë gutguut tɔ bɔ̈, tɔ kɔc ke aterdï tɔ nuan cït man ë yɛn.

²² “Guiir löŋden në biäk de karɛcken ëbɛ̈n, luöi ë keek këtuc cït man cï yïn yɛn luöi këtuc në biäk de karɛckï. Yɛn teer ë nuanic, ku yɛn tök piɔ̈u në jɔk.