Dhep 3 - JAM DE NHIALIC 2011

Awäny de Jeruthalem ku Wëërde Bei

¹ Amawoou në Jeruthalem ril nɔm, pänydïït ee kɔcke yɔŋ yetök.

² Acïï Bɛ̈nydït ee piŋ thok ku nɔn gɛm duide, ku nɔn thiëëc në kuɔɔny.

³ Bänyke ayek ŋäär cït kɔ̈ɔ̈r, ku cït bänykɛn ee lööŋ guiir aŋuööth nɛ̈k cɔk cï wäth, cïn yuɔɔm yek buɔ̈th miäk.

⁴ Ku tïtke acïï ke duëërë ŋɔ̈ɔ̈th, kɔc ee mɛth. Ku bänykɛn ke kake Nhialic ayek kaɣeriic dhiöök, ku dhoŋkï löŋ kɔ̈u në ruëëny.

⁵ Ku Bɛ̈nydït atɔ̈u ë pänydït yic, ku abï këpiɛth looi ke cie kërac. Ee yicde nyuöth kɔcke aköölnyïïn ke cïn kööl töŋ lööny nɔm piny, ku kɔc ee karɛc looi ëtɛ̈ɛ̈n, ayek ŋoot ke ke loi awɛ̈ɛ̈c ku cïkï gup ee riɔ̈ɔ̈c.

⁶ Aye Bɛ̈nydït lueel an, “Yɛn cï juöör nyaai nyïïn ëbɛ̈n, ku riääk pɛ̈ɛ̈nydïtken ku ta pɛ̈ɛ̈ny ke ɣöötkɛn bär dɔ̈ŋ piny ke ke cï riääk. Pɛ̈ɛ̈nydït acï ke nyääŋ piny ku kuɛɛr acïn raan ee cath thïn, acïn raan cï döŋ.

⁷ Ku aa cä tak an bï kɔckï A yiɛ̈n riëëu ku gamkï duidï, ku cïï ɣöötken bï bɛ nyuän thäär bei, ku ënɔɔnë aŋootkï ke ke loi karɛc cït ëmanë.

⁸ Aye Bɛ̈nydït lueel an, “Kääckï, tiɛtkï kööl bän rɔt jɔt, ke Ya ye cäätɔ gɔɔny juöör, acä dhel ë Yapiɔ̈u luɔi bän juöör ku lɔ ciɛɛŋ ke pinynɔm määtic, ke ke bä tɔ yök tuöc ë thok de agönhdï. Pinynɔm ëbɛ̈n abï riɔ̈ɔ̈k në many de agönhdï.

⁹ “Ku Yɛn bï jam de juöör puk ke ye jam lɔ wai, ku abïk Ɛn aa lam ke cie yiëth kɔ̈k, ku yek A riëëu kedhie.

¹⁰ Ayï kɔckiën cï thiäi piny, kɔc cieŋ wɛ̈ɛ̈r ë Ethiopia yɔu abïk A bɛ̈n gäm miɔ̈cden.

¹¹ Në ee köölë wek kɔckï, wek cïï gup bï bɛ riɔ̈ɔ̈c në biäk ɣɔn cä wek A rɛɛc. Yɛn bï raan ëbɛ̈n nyaai, raan ee yenɔm ɣääc de guöp lɛc, ku wek cïï Ya bï bɛ rɛɛc në kuurdiën ɣeric nɔm.

¹² Ku yɛn bï kɔc kor piɔ̈ɔ̈th ee rö kuɔɔr piny nyääŋ ëtɛ̈ɛ̈n, kɔc bï kuɔɔny bɛ̈n kɔɔr tëde Yɛn.

¹³ Kɔc lik ke Yithriɛl cï döŋ apïr acïkï kɔc bï bɛ aa kɔ̈ɔ̈r akɔ̈ɔ̈k, ku cïkï bï bɛ aa jam në lueth, ku acïn ruëëny bï bɛ tɔ̈u në keyiic. Abïk aa kuɛth ku rëërkï ë mätic. Ku acïn raan bï kek bɛ riɔ̈ɔ̈c.

Din ë Miɛtëpiɔ̈u

¹⁴ Kɛ̈tkï ku moc kiɛɛu nyan de Dhiɔn, ku miɛtkï piɔ̈ɔ̈th wek kɔc ke Yithriɛl! Miɛtëpiɔ̈u arëët yïn nyan de Jeruthalem!

¹⁵ Bɛ̈nydït acï luɔi lui En yïn këtuc pɔ̈l, acï kɔckuön ke ater nyaai ëbɛ̈n, Bɛ̈nydït, Meliŋ de Yithriɛl atɔ̈u ke week, ka cïn kë bï we bɛ riääc ënɔɔnë.

¹⁶ Ade kööl bɔ̈ kööl bï kek ye lɛ̈k Jeruthalem an, “Pänydït de Dhiɔn du riɔ̈c! Du yïciin be tɔ kɔ̈c!

¹⁷ Bɛ̈nydït Nhialicdun atɔ̈u ke week, ku riɛlde ee we gäm tiëm. Abï piɔ̈u miɛt ke week arëët, ku tɔ week lɔ dïu në nhiëërde. Ku abï kit, ku mitpiɔ̈u ke week,

¹⁸ abï ciët miɛtëpiɔ̈u de kɔc nu ë dhuëëŋic. Aye Bɛ̈nydït lueel an, “Yɛn ë riɔ̈ɔ̈c de thuɔɔu tɔ kääc, ku nyaai ayärdun.

¹⁹ Kööl abɔ̈! Yɛn bï kɔc yɔŋ week luöi këtuc, Yɛn bï kɔc kɔ̈c kony ëbɛ̈n ku pɔ̈k kɔc cï peec nïïm wut. Yɛn bï ayärden puk ke ye dhuëëŋ, ku abïï pinynɔm ëbɛ̈n keek aa leec.

²⁰ Kööl abɔ̈! Yɛn bï kɔckuön cï thiäi piny bɛ̈ɛ̈i wut, wek bä tɔ ŋic ë pinynɔm ëbɛ̈n, ku bɛ nyɔk në luɔi ta Yɛn we kueth. Ee Bɛ̈nydït Yen aa jam.