Dhep 2 - JAM DE NHIALIC 2011

Cɔ̈t de Puŋëpiɔ̈u

¹ Määtkï weyiic ku luɔikï amatnɔm, ku puɔ̈kkï wepiɔ̈ɔ̈th yïn jur ciën guöp ayäär,

² Të kënë we guɔ wiɛɛu wei cït man aa yiɛl, të kënë kööl agönhdïït de Bɛ̈nydït we kɔn yök.

³ Calkï Bɛ̈nydït wek kɔc ee röt kuɔɔr piny cieŋ piny, kɔc ee löŋde gam. Liɛpkï piathëpiɔ̈u, ku koor ë rɔt piny. Tɛk däŋ bäk poth në këtuc thok në kööl agönh de Bɛ̈nydït.

Wuöt Thiääk ë Juda Aluiyë Ke Këtuc

⁴ Gadha ku Acekelon abï ke puɔ̈l ke cïn raan bï döŋ thïn. Ku kɔc ke Acedɔd abï ke cuɔp wei ke akɔ̈l ë kääc cil, ku nyuɛ̈në Ekeron thar bei.

⁵ Amawoou në week, wek kɔc cieŋ wɛ̈ɛ̈r yɔu, jur de Kereth! Bɛ̈nydït abï we luöi këtuc, wek Pilithiin cieŋ piny de Kanaan. Abï we riɔ̈ɔ̈k wedhie abïï ciën raan töŋ dɔ̈ŋ.

⁶ Pinyduön tɔ̈u ë wɛ̈ɛ̈r yɔu, abï aa të ye tïït ɣɔ̈k nyuääth thïn, ku ye tëde atok ke ɣɔ̈k ku thök.

⁷ Kɔc ke Juda cï döŋ apïr abïk pinydun dɔm. Yen bï kek ɣɔ̈k aa nyuääth thïn, ëlë thëën ke ke lɔ tɔ̈c në ɣööt ke Acekelon yiic. Bɛ̈nydït Nhialicden abï bɛ tɔ̈u ke keek, ku puk kenïïm athiɛɛiden.

⁸ Acïï Bɛ̈nydït Awärjäŋ Nhialic lueel an, “Yɛn ë kɔc ke Mowap kekë Ammon piŋ ke ke lɛ̈ɛ̈t kɔckï, ku yekï ke jääm në wël kɔ̈ɔ̈th ke ke ɣɛ̈ɛ̈c kenïïm an bïk keek yak në riɛl pinyden.

⁹ Ku në biäk de ee kënë, Yɛn Bɛ̈nydït de rɛm pïïr, Yɛn ë kuëëŋ nɔn bï yɛn Mowap kekë Ammon dhiɛl tɔ cït Thɔdom, ku Gomoora, abï ya piny de amilɔ ku puɔ̈l, ku ee piny ee yuööt yen bï rɔt jɔt thïn, ku cïn raan ceŋe anande. Abïï jurdiën lik cï döŋ apïïr ke yak ku nömkï pinyden.

¹⁰ Yen këtuc bï luöi kɔc ke Mowap kekë Ammon ka, në biäk de lɛc kekë ɣɛ̈ɛ̈cë nɔmden ye kek kɔc ke Bɛ̈nydït de rɛm läät.

¹¹ Abïï Bɛ̈nydït ke riääc, të le Yen yiëth ke pinynɔm riɔ̈ɔ̈k kedhie. Ku juöör ëbɛ̈n abïk En jɔ aa lam, ŋɛk tëde.

¹² Ku Bɛ̈nydït aya abï kɔc ke Ethiopia nɔ̈k.

¹³ Ku në riɛlde aya Yen Bɛ̈nydït, abï yeciin riɛny të lɔ rut, ku abï Athiriya riɔ̈ɔ̈k, ka Ninebe abï döŋ ke ye jɔ̈ɔ̈r baaŋ cïn yic pïïu ku cïn raan be ye cieŋ.

¹⁴ Luuny ke këriëëc roor ëbɛ̈n abïk aa tɔ̈c thïn. Cuɔɔr ayï anyigon abïk cieŋ në pänydït yic, ku agumut abï aa kïïu awëërnyïïn. Ku gaak abï ya dhiau në nïn nɔm. Kɔc abïk tiim ke thidar ke ɣööt wɛ̈ɛ̈th bei në kekɔ̈ɔ̈th

¹⁵ Yen kë ee rɔt looi ka tëde kɔc ee kenïïm ɣääc në riɛlden kapäc, ku yek tak an rëërkï në mätic, ayek ŋic an pänydïïtden, ee yen adït ë pinynɔm, ku yen abï ja aa wun cï riääk cieŋ ë läi roor! Ku raan ëbɛ̈n ee tëëk ë ye këc abïï aa geet ku lɛt ë yeciin.