Dhep 1 - JAM DE NHIALIC 2011

¹ Jam de Bɛ̈nydït kï, jam ɣɔn cï gäm Dhepania ɣɔn ee Jothia wën Amon melik në Juda. Dhepania aaye wën ë Kuci, ku Kuci de Gedalia, Gedalia de Amaria, Amaria de Ɣedhekia ɣɔn ee melik.

Kööl ë Guiëër ë Löŋ de Bɛ̈nydït

² Acïï Bɛ̈nydït lueel an, “Këriëëc ëbɛ̈n abä riɔ̈ɔ̈k në pinynɔm,

³ Yɛn bï kɔc ku läi ku diɛt ayï rec riɔ̈ɔ̈k ëbɛ̈n. Ku riääk kërɛɛc ee kɔc tɔ wiëëk. Yɛn bï mɛnh ë raan riɔ̈ɔ̈r nyin në pinynɔm taitai. Yen kë cïï Bɛ̈nydït lueel ka.

⁴ “Yɛn bï agönhdï wɛ̈l nɔm kɔc cieŋ Jeruthalem, ku lɔ raan tɔ̈u ë Juda ëbɛ̈n. Yɛn bï yïk lik cï döŋ ke yanh cɔl Baal nyaai nyïïn taitai, ku nyaai gucken nyïïn ayï bäny ke kake Nhialic cï röt pɔ̈k në läm de yiëth yiic ke ke cïï bï bɛ piŋ rin.

⁵ Yɛn bï kɔc riɔ̈ɔ̈k, kɔc ee kenïïm guöt piny në ɣööt nïïm nhial, ke ke lam akɔ̈l ku pɛɛi ku kuɛl, ku kɔc ee röt tɔ ye kɔc ee kuëëŋ në Yɛn ku ayek lɔ kuëëŋ në Molek yanhden,

⁶ ku riääk kɔc ee röt dak ciëën ku cïkï Ya be kuany cök, kɔc cie bɛ̈n ku thiëckï Yɛn bä ke wat.

⁷ Lak lik në Bɛ̈nydït Nhialic nɔm, në luɔi cï akööl thiɔ̈k, kööl bï Yen nyuc ke guiir löŋ. Bɛ̈nydït akïït kɔcke bïï ke gam ke ke ye miɔ̈c näk, ku acï kɔc ke ater cɔɔl bïk Juda bɛ̈n yakic.

⁸ Go Bɛ̈nydït lueel an, “Në ee kööl bän kɔckï tɔ temë rötë, Yɛn bï bäny tueŋ luöi këtuc, ku wɛ̈ɛ̈t ke melik, ku kɔc ee yiëth lei lam ëbɛ̈n.

⁹ Yɛn bï kɔc ee ciɛɛŋ lei kuɛny cök luöi këtuc ëbɛ̈n, ku ayek kual ku näkkï kɔc në biäk bï kek ɣön ë bɛ̈nyden thiɔ̈ɔ̈ŋ në kak ë rumkï në riɛl.

¹⁰ Go Bɛ̈nydït lueel an, “Wek bï kiɛɛu piŋ, ku lɔ röl ë kɔc dhiau në kal thoŋ cɔl Rɛ̈c ë Jeruthalem, ku piɛŋkï arɔ̈ɔ̈l ku gök de röl dïït cï määr ë kuriic wut biäk ë piɛc yïk.

¹¹ Dhuöörkï ku dhiaukï të la wek kënë piŋ, wek kɔc rɛ̈ɛ̈r ë wut biäk thuth, ke ŋiɛckï nɔn bïï kɔc ee atek ɣaac nyaai nyïïn!

¹² “Në aköölkë ee manyalath yen abä nööm ku kaar Jeruthalem yic. Ku luöi këtuc kɔc cï piɔ̈ɔ̈th kuɛth ee röt ŋɔ̈ɔ̈th, ee ye lueel an, ‘Acïn kë bïï ë Bɛ̈nydït luöi wook, nɔn yen këpiɛth ku nɔn ee kërac.’

¹³ Kaken abïï keek peec, ku riäk ɣöötken, acïkï ɣööt yïkkï bï cieŋ, ku nɔn dekï mɔ̈n de mïthkɛn ke tiim ë comkï.

¹⁴ Kööl bï Bɛ̈nydït löŋ de kɔc guiir ë thiɔ̈k arëët, ka ë ɣëët, yen ee köölë abï kɔc gäm gök de dhiënëpiɔ̈u, ku ayï jööt man ril ke tɔŋ abïk dhiau arëët në ciën aŋäth de kuny yökkï.

¹⁵ Abï aa kööl nyooth rac de tuöc agönh ë Bɛ̈nydït, kööl tuc thok de nuan kekë diɛɛr, ee kööl bï këriëëc ëbɛ̈n riɔ̈ɔ̈k ku riäär nyin ë kɔc, abï aa kööl de mɔ̈ɔ̈th dïït lɔ cɔ̈t, abï akööl col ku le niëpniëp ke luäät,

¹⁶ ee kööl cï thiäŋ kekë awuɔɔu de röl ë kɛŋ ke tɔŋ, ku röl de kiɛɛu de rem de tɔŋ mɛk pɛ̈ɛ̈nydït cï gël ku ɣööt bär cï yïk ë kuur.

¹⁷ Aye Bɛ̈nydït lueel an, “Yɛn bï ee riäŋë yiɛ̈n mɛnh ë raan, ka raan ëbɛ̈n abï cath ëpäthpäth cï cɔɔr, në luɔi cïï kek A luöi awäc, ka rimken abïk wat cï pïïu ku jɔ gupkɛn cï thou dhɔt piny ke ke cï ŋuäc.

¹⁸ Në ee kööl bï Bɛ̈nydït rac de tuöc agönhde nyuɔɔthë, acakaa ateek kekë adhäm de mɛnh ë raan ëbɛ̈n acïkï ke bï kony, në luɔi bï Bɛ̈nydït piny riɔ̈ɔ̈k nɔm ëbɛ̈n kekë kɔc ëthiäu.