Dhek 9 - JAM DE NHIALIC 2011

Guiëër ë Löŋ de Juöör Thiääk në Yithriɛl

¹ Kë cï Bɛ̈nydït lueel kï: Akɔɔr nɔn lui yen piny de Ɣadrak këtuc, kekë Damathko. Ku kɔc kedhie abïk kenyïïn puɔ̈k Bɛ̈nydït cït man cï dhiëën ke Yithriɛl kenyïïn puk.

² Ayï Ɣamath nu akeu nɔm ayadäŋ, ayï Tayer kekë Thidon, na cakaa nɔn pel kek nïïmë

³ Tayer acï rɔt yiëk ɣään ril, ku acï adhɛ̈p thɔɔc nïïm ayï ateek, ka acïk ciët abuui.

⁴ Ku Bɛ̈nydït abï këriëëcde nyaai ëbɛ̈n. Abï këriëëc piɛthde wäl wïïr, ku nyop wut piny taitai.

⁵ Acekelon abï riɔ̈ɔ̈c të le yen ee kënë tïŋ. Ku Gadha abï ë thiëu kuemic arëët. Ku aŋäth de Ekeron abï riäär. Melik de Gadha abï thou, ku Acekelon abï pɔ̈l.

⁶ Acedɔd abï cieŋ në juöör kith yiic. Aye Bɛ̈nydït lueel an, “Yɛn bï lɛc de Pilithiin teem kɔ̈u.

⁷ Yɛn bï riɛm nyaai në yethok, ku nyaai riääkde në yelec, yen aya abï döŋ ke ee kɔc lik në biäk de Nhialicda, abï ciët dhiën ë Juda, ku Ekeron abï ciët kɔc ke Jebuth.

⁸ Yɛn bï pinydï gël apiɛth, ku acïn rem de tɔŋ bï ye bɛ reetic. Kɔckï acä keek bï bɛ tɔ yɔŋ ë raan ananden, abä keek gël në yɛn.

Bɛ̈n de Melik Wadäŋ

⁹ Miɛtëpiɔ̈u arëët, nyan de Dhiɔn, moc kiɛɛu, nyan de Jeruthalem! Tiëŋkï, melikdun abɔ̈ tënu wek thïn! Abɔ̈ ke cï duaŋ nɔm, ku ë tiam, ku ë rɔt kuɔɔr piny, ka acath në muul kɔ̈u, acath adhäny thiin ë muul kɔ̈u.

¹⁰ Aye Bɛ̈nydït lueel an, “Yɛn bï abëël ke tɔŋ nyaai ë Yithriɛl, ku jat jöŋgöör ë Jeruthalem, ku riääk dhɛ̈ŋ ye kɔc muc. Melikdun abï mät looi ë juöör yiic, ciɛɛŋde abï gɔl në wɛ̈ɛ̈r alɔ gut ë wɛ̈ɛ̈r däŋë, ku gɔl ë wɛ̈ɛ̈r ë Yuparat kɔ̈u leer ë piny thar.

Luääk de kɔc ke Nhialic

¹¹ Aye Bɛ̈nydït lueel an, ‘Në biäk de mändï wo week, män cï thaany në riɛm, yɛn bï kɔcku luöny bei në pul cïn yic pïïu, pul de pɛ̈c.

¹² Puɔ̈kkï röt pinydun wek kɔc ë cï peec, wek cï dɛ aŋäth ënɔɔnë, acä teem ë köölë nɔn bän we puɔ̈k nïïm ka mat kakun yiic raan rou.

¹³ Yɛn bï Juda tɔ cït dhaŋ de rem de tɔŋ ku ta Yithriɛl tɔ cït wiɛth ke dhaŋ. Yɛn bï kɔc ke Dhiɔn tɔ cït abätɛ̈ɛ̈u, piät ɛn wokë kɔc ke Girikii.

¹⁴ Ku ëtɛ̈ɛ̈n, Bɛ̈nydït abï tuöl në kɔcke nïïm, abï wiɛth ke moc cït man ë wil de deŋ. Bɛ̈nydït Awärjäŋ abï kaaŋ kooth, abï jäl në amaŋic të lɔ wöuwic.

¹⁵ Bɛ̈nydït de rɛm abï kɔcke gël, ka abïk kɔc ke ater riɔ̈ɔ̈k. Abïk aa kïïu tɔŋ cï ka cï mɔ̈u wit, ku lëukï kɔc ke ater riɛm, riɛm bï kuëër cït man ye riɛm de miɔ̈c näk wɛt piny në yïk nɔm.

¹⁶ Wadäŋ të le köölë bɛ̈n, Bɛ̈nydït abï kɔcke luök, cït man ye tïït thök luök. Ka kɔcke abïk lɔ riauriau ë piny yic cït man ë kur läk cï ke göl jäm.

¹⁷ Piny abï kuöc läk arëët ëtɛ̈ɛ̈n. Rɛɛpke abïk dhuök tɔ ril, ku tɔ mɔ̈u dhueec ril.