Dhek 8 - JAM DE NHIALIC 2011

Bɛ̈nydït Athɛn Luɔi bï yen Jeruthalem Kiɛm Piny

¹ Na wën, ke jam de Bɛ̈nydït de rɛm ë be bɛ̈n tëde yɛn.

² Kë cï Bɛ̈nydït de rɛm lueel kï an: “Yɛn ë piɔ̈u gɔ̈ɔ̈i arëët, wokë këriëëc lui ë kɔc ke ater Jeruthalem.

³ Ku ënɔɔnë, yɛn puk a nɔm pinydï. Yɛn bï lɔ rëër Jeruthalem yɛn guöpdï. Ka Jeruthalem abï ya cɔɔl an, Pänydït adöt, ku cɔl kuur de Bɛ̈nydït de rɛm an kuur ɣeric.

⁴ Kë cï Bɛ̈nydït de rɛm lueel kï an: “Kɔc cï dhiɔp, röördït ayï dɔɔc abïk bɛ rëër në kuɛɛr ke Jeruthalem yiic. Ŋɛk abï thieny yen piny thany aa muk në yeciin.

⁵ Ku kuɛɛr ke Jeruthalem abïk bɛ thiäŋ në mïth thuɛ̈ɛ̈c, mïthwät, ku mïth duet.

⁶ Kë cï Bɛ̈nydït de rɛm lueel kï an, “Kënë abï kɔc lik cï döŋ ye tïŋ cït kë cï rɔt bï lëu ënɔɔnë. Ku abï rɔt lëu tëde yɛn.

⁷ Acïï Bɛ̈nydït de rɛm lueel an, Kɔckï abä keek luäk bei në wuöt nu të lɔ aköl amiäk ku wuöt nu të lɔ aköl athɛ̈i të cï ë keek lɛɛr thïn,

⁸ ku abä keek bɛ̈ɛ̈i ciëën piny të lɔ aköl amiäk ku aköl athɛ̈i, ku abïk bɛ̈n rɛ̈ɛ̈r ë Jeruthalem. Abïk aa kɔckï, ku yɛn bï ya Nhialicden. Ku abä keek cieŋ në yic, ku piathëpiɔ̈u.

⁹ Kë cï Bɛ̈nydït de rɛm lueel kï an, “Riɛtkï wepiɔ̈ɔ̈th, wek kɔc piŋ ee jamë në tït thook ee aköölkë, gɔl në kööl ɣɔn tɛ̈ɛ̈uwë ë këërkëër de Luaŋdït de Bɛ̈nydït de rɛm piny, në luɔi bïï ë Luaŋdït yïk.

¹⁰ Acïn ariöp ë nu në akööl wään kë nïïm tueŋ ariöp de raan, ku nɔn yen ariöp de läi. Ku acïn kë ë ye raan kony në kɔckɛn ke ater. Yɛn aacï kɔc kɛ̈ɛ̈k.

¹¹ Ku ënɔɔnë, kɔc lik cï döŋ, acä keek bï bɛ luööi arac cït man ë kɔc ɣɔn tueŋ, kë lueel ë Bɛ̈nydït de rɛm ka.

¹² Abïk aa com të cïn riɔ̈ɔ̈c. Ku tiimkɛn ke enap abïk aa luɔk apiɛth, ku piny abï ya luɔk në këriëëc ëbɛ̈n, ku deŋ abï dït arëët. Yɛn bï kɔckiën lik cï döŋ gäm ee kakë kedhie.

¹³ Cït man cä wek kɔn aa kɔc ke aciɛɛn në juööriic baai de Juda wekë baai de Yithriɛl, wek bä bɛ kony ku ta we ye athiɛɛi. Riɛtkï wepiɔ̈ɔ̈th, duökï riɔ̈c.

¹⁴ Kë cï Bɛ̈nydït de rɛm lueel kï an, “Cït man ɣɔn cï kuarkun ya wööc piɔ̈u, guɔ kërɛɛc bä luöi keek kiëët, ku cä päl, dhiɛl luöi keek ke ya cïï yanɔm waar.

¹⁵ Yen acän ye kiëët ënɔɔnë luɔi bän kɔc ke Jeruthalem thieei, ayï kɔc ke Juda. Ka week duökï riɔ̈c.

¹⁶ Ku ka bäk looi kï: yak röt jääm në yith. Yak ŋɛk gäm yicde në göny yiic, yic wën ee rëër lɔ dïu bɛ̈ɛ̈i.

¹⁷ Cïn raan ee mänhë luöi kiɛɛr rac në yepiɔ̈u. Duökï lueth ee töör të cä wek gutguut looi. Yɛn man tör, ku lueth, ku akuöörkuöör, kakë amaan keek kedhie.

¹⁸ Na wën, ke jam de Bɛ̈nydït de rɛm ë be bɛ̈n tëde yɛn, lueel an,

¹⁹ “Kë cï Bɛ̈nydït de rɛm lueelkï: an thɛ̈k ye pɛɛi ye pɛ̈i ŋuan theek, ayï pɛɛi ye pɛ̈i dhïc, ayï pɛɛi ye pɛ̈i dhorou, ayï pɛɛi ye pɛ̈i thiëër abïk aa dhuëŋ ku miɛtëpiɔ̈u arëët tëde baai de Juda. Ka week nhiaarkï yic, ku mät.

²⁰ Acïï ë Bɛ̈nydït de rɛm lueel an, “Akööl abïkï, akööl bï kɔc ke pɛ̈ɛ̈nydït juëc guëër Jeruthalem.

²¹ Kɔc ke pänydït abïk aa lɔ tëde kɔc ke pänydït däŋ ku lëkkï keek an, “Wok lɔ lok Bɛ̈nydït de rɛm lɔ̈ŋ bï wo thieei. Ka week bäkï, lokku, ëtök.

²² Kɔc juëc, ku juöör ril abïk aa bɛ̈n Jeruthalem, bïk Bɛ̈nydït de rɛm bɛ̈n lam, ku läŋkï athiɛɛi keek.

²³ Acï Bɛ̈nydït de rɛm lueel an: Në aköölkë yiic, alɛi kathiëër në juöör ke thook yiic ëbɛ̈n, abïk aa bɛ̈n tëde raan töŋ ë Judai, ku lëkkï yen an, ‘Tɔ wo lɔ të le yïn thïn në yïn ëtök. Acuk piŋ nɔn tɔ̈u ë Nhialic ke week.’