Dhek 7 - JAM DE NHIALIC 2011

Bɛ̈nydït Ajäny Thɛ̈k Lueth

¹ Në ruöön ë ye run ke melik Dariouth ŋuan në bääny yic, jam ë Bɛ̈nydït ë bɛ̈n bɛ̈n tëde Dhekaria në kööl ye pɛɛi ye pɛ̈i dhoŋuan thok ŋuan, pɛɛi cɔl Kithlep.

² Ku ëtɛ̈ɛ̈n, kɔc ke Bethel aake cï raan cɔl Caredher tooc, kekë Regemelek, ku kɔcken lek athiɛɛi de Bɛ̈nydït lɔ̈ŋ Luaŋdïït de Awärjäŋ.

³ Ku abïk bäny ke kake Nhialic de Luaŋdïït de Bɛ̈nydït de rɛm luɔp, ku lopkï tït an, “Buk ŋoot ke wo dhiëëu riääk në thɛ̈k ye wok thek në pɛɛi ye pɛ̈i dhïc cït man wään ye wok cool ë thëk ë caŋ wään?

⁴ Go jam de Bɛ̈nydït de rɛm bɛ̈n tëde yɛn.

⁵ Lueel an, “lɛ̈kë kɔc cieŋ piny kedhie, ayï bäny ke kakë Nhialic, an nɔn ya wek thek, ku dhiaukï në pɛɛi ye pɛ̈i dhïc, ku pɛɛi ye pɛ̈i dhorou në ee runkë yiic kedhie kathiërdhorou, ë we ye thek në këdï?

⁶ Ku ë we cie cam, ku dɛ̈kkï në këde nɔmdun wapäc?

⁷ Yen jam wään tɔ Bɛ̈nydït lueel ë tït ɣɔn thɛɛrë ka, të wään ŋoot ë Jeruthalem ke kueth. Ku ŋoot ke thiäŋ ke kɔc. Të ɣɔn ŋoot ë kɔc juëc ke ke rɛ̈ɛ̈r në wuöt thiääk në Jeruthalem, ku wuöt tɔ̈u baŋ të lɔ wöuwic, ku rɛ̈ɛ̈r kɔ̈k në kur thäär.

Ciɛ̈n Riëëu Atɔ Kɔc Pec

⁸ Go jam de Bɛ̈nydït bɛ̈n tëde Dhekaria lueel an,

⁹ “Kë cï Bɛ̈nydït de rɛm lueel kï an: ‘Yak ŋɛk gäm yicde, ku ŋɛk ë ye piɔ̈u kok kekë mänhë.

¹⁰ Duökï diäär cïn nïïm röör ee yɔŋ, ayï abɛɛr, ku kamaan, ku kɔc kuanynyïïn. Ku cïn raan ee mänhë kiëër kiɛɛr rac në yepiɔ̈u.’

¹¹ “Go kɔckï kenïïm thiöök, ku reeckï jamdï piŋ.

¹² Acïk kenïïm bɛ̈n tɔ ril cït kuur, ku cïkï löŋ piŋ, ku wël wään cï Bɛ̈nydït de rɛm tɔ tucë keek në Wëike ë tït wään thɛɛr. Go Bɛ̈nydït de rɛm piɔ̈u bɛ̈n dïu arëët.

¹³ Aye Bɛ̈nydït de rɛm lueel an, Në luɔi kën kek kë luɛɛl piŋ, lɔ̈ŋden akɛ̈n bɛ̈n piŋ ɣɔn ye kek lɔ̈ŋ.

¹⁴ Aguɔ keek gap wei cït man ë yom, lɛɛr keek ë juöör lei yiic. Yen ee piny lɛ̈kë, ëbɛ̈n döŋ baaŋ ke cïn raan nu thïn.”