Dhek 6 - JAM DE NHIALIC 2011

Nyuuth de Abëël Kaŋuan

¹ Na wën, ke ya be a nyin jat nhial, guɔ abëël ke tɔŋ tïŋ kaŋuan ke ke bɔ̈ bei në kɛm ke kur kaarou. Ku kek ee kurkë, ee kur ke maläŋ.

² Abël tueŋ athel ë jöŋgöör thith. Ku abël ee kek rou athel ë jöŋgöör col.

³ Ku abël ee kek diäk athel ë jöŋgöör ɣer. Ku abël ee kek ŋuan athel ë jöŋgöör kän lëk.

⁴ Na wën, ke ya lop tunynhial an, “Eeŋö ee kakë bɛ̈nydï?

⁵ Go tunynhial puk nɔm an, “Kakë ee wëi lɔ në aguuk ke pinynɔm kaŋuan. Aake jɔ bɛ̈n ciëën në Bɛ̈nydït lɔ̈ɔ̈m, Bɛ̈nydït de pinynɔm ëbɛ̈n.

⁶ Abël thel ë jöŋgöör col, alɔ piny de Babilonia të lɔ rut. Ku abël thel ë jöŋgöör ɣer, alɔ të lɔ aköl athɛ̈i. Ku abël thel ë jöŋgöör kän lëk, alɔ të lɔ wöuwic.

⁷ Na wën, bïï ë jöŋgöör kän lëk, akënkï bɛ̈n gääu luɔi le kek piny caath nɔm. Go tunynhial lɛ̈k keek an, “Lak caathkï pinynɔm. Gokï piny lɔ caath nɔm.

⁸ Na wën, ke tunynhial ë cɔl ɛn, lueel an, “Jöŋgöör wën cï lɔ piny lɔ të lɔ rut acïk agönh de Bɛ̈nydït tɔ lɔ köi piny.

Jocua Ayïkë Nɔm Göl

⁹ Na wën, go jam ë Bɛ̈nydït bɛ̈n tëde yɛn an:

¹⁰ “Nöm miɔ̈c de Ɣeledai, ku Tobija, ku Jedaya kɔc ë bɔ̈ ciëën në Babilonia. Ku dap keek yiɛ̈n Jothia wën ë Dhepania në ee kööl manë guöp.

¹¹ Nöm adhäm biäk, ku ateŋ biäk. Ku cuëc göl në keek. Ku tääuwë në Jocua wën ë Jeɣodhadak nɔm, bɛ̈nydïït ë kake Nhialic.

¹² Ku lɛ̈kë yen an aye Bɛ̈nydït de rɛm lueel an, ‘Raan cɔl Këër abï bäny të tɔ̈u en thïn, ku abï Luaŋdït bɛ yïk.

¹³ Ee yen abï Luaŋdït bɛ yïk, ke bï dhuëëŋ guöp cï melik, ku abï nyuc në thööny nɔm ke ye bɛ̈ny de kɔcke. Ku bɛ̈ny de kake Nhialic abï ya tɔ̈u në yelɔ̈ɔ̈m. Ku abïk dɛ rëër lɔ dïu në kaamden kaarou.’

¹⁴ Ku göl abï tɔ̈u Luaŋdït, ke bï Ɣeledai aa täk nɔm, kekë Tobija, ku Jothia wën ë Dhepania. Tobija, Jedaya, ku Jothia.”

¹⁵ Ku kɔc mec, abïk bɛ̈n bïk kɔc bɛ̈n kuɔny në yïŋ de Luaŋdït. Yen abä wek en jɔ ŋic ë gɔk nɔn cï Bɛ̈nydït de rɛm ya tuöc week. Ku kënë abï rɔt looi ëbɛ̈n të cä wek Bɛ̈nydït Nhialicdun gam thok në piɔ̈ndun ëbɛ̈n.