Dhek 5 - JAM DE NHIALIC 2011

Nyuuth de Awerek Pär

¹ Na wën, ke ya be yanyin jat nhial, guɔ awerek tïŋ a pär nhial.

² Na wën, ke tunynhial ë lop ɛn an, “Eeŋö cï tïŋ? Guɔ puk nɔm an, “Ee awerek yen acä tïŋ ke pär nhial. Bɛ̈ɛ̈r de awerek kɔ̈u ee mitïïr kadhoŋuan, ku dït de yenyic ee mitïïr kaŋuan ku biäk.

³ Na wën, ke jɔ lɛ̈k ɛn an, “Kënë aciɛɛn bɔ̈ në pinynɔm ëbɛ̈n. Raan ëbɛ̈n, raan lɔ cuëër abï nyaai në piny yic, acï awerek ye lueel aya në biäk däŋë an raan lɔ kuëëŋ në lueth, abï nyaai në piny yic cït man cï awerek ye lueel.

⁴ Acï Bɛ̈nydït de rɛm lueel an bï aciɛɛn tuɔɔc në ɣööt ke cuɛ̈ɛ̈r yiic, ku ɣööt ke kɔc ee kuëëŋ në lueth yiic. Abï lɔ në ɣöötken yiic, ku nyiëëŋ ke piny ke ke cï riääk taitai.

Nyuuth de Tiiŋ nu ë Diöny Yic

⁵ Na wën, ke tunynhial wën jam ke yɛn ëbɔ̈, ku lëk ɛn an, “Jatë yïnyin nhial, ku tïŋ eeŋö ee kë bɔ̈ beiyë!

⁶ Guɔ luɔp an, “Ee kän ŋö? Go puk nɔm an, ‘Ee diöny nyooth awɛ̈ɛ̈c ke ee pinyë ëbɛ̈n.’

⁷ Ku diöny aa kuöm nɔm në akum. Na wën, aliep nɔm, ke tik ë yök ke rɛ̈ɛ̈r thïn.

⁸ Go tunynhial lueel an, “Kënë ee karɛcken. Na wën, ke thɛny tik piny në diöny yic ku kum nɔm në akum.

⁹ Na wën, aa jat a nyin nhial, ke ya tïŋ diäär kaarou abɔ̈ të nu yɛn ke ke pär nhial në wuök ril cït wuök ke jaŋ biöŋ. Na wën, ke ke gɔp diöny yic, ku pɛ̈ɛ̈rkï në yen.

¹⁰ Guɔ tunynhial luɔp an, “Leerki diöny ënou?

¹¹ Go puk nɔm an, “Aleerkï Babilonia, le kek luak yïk. Të cï luak thök në yïk, abïk diöny tääu thïn ëtɛ̈ɛ̈n ku lamkï.