Dhek 4 - JAM DE NHIALIC 2011

Nyuuth de kë ye Manyalath Cäp Thar Thïn

¹ Na wën, ke tunynhial wën jam ke yɛn ë puk rɔt, ku pɛ̈ɛ̈c ɛn abä ciët kë ë nin.

² Na wën, ke lop an, “Eeŋö cï tiŋ? Guɔ puk nɔm an, “Ee manyalath cäp thar thïn yen cä tïŋ, kë cuëëc në adhääp. Ku ade nɔm abïny, ku mɛ̈c ke alath kadhorou në yenɔm, në wuökɛn ye ke cäp thäär thïn kadhorou.

³ Ku ade tiim ke olip kaarou në mɛ̈c lɔ̈m, tök ë baŋë, ku däŋë ë baŋ däŋë.

⁴ Na wën, ke ya lop tunynhial jam ke yɛn an, “Ee kaŋö ee kakë, bɛ̈ny?

⁵ Go tunynhial yɛn luɔp an, “Kuc ee kakë? Guɔ puk nɔm an, ‘Akuöc keek bɛ̈nydï?’

Gutguut cï Nhialic Lɛ̈k Dherubabel

⁶ Go jɔ puɔ̈k nɔm ɛn an, “Kënë ee jam lëk ë Bɛ̈nydït Dherubabel an: Acie riɛl, ku acie jööt, ee në wëikï. Yen kë cï Bɛ̈nydït de rɛm lueel ka. Eeŋö bä cök nɔm yïn kuur dït? Yïn bï rai piny në Dherubabel nɔm tueŋ, ka yïn bï nɔm kït wekë piny.

⁷ Ku abï kuur nu në yïnɔm nhial bɛ̈ɛ̈i ke duɛŋë ë kɔc yïnɔm në röldït an, “Thieithieei në këde!”

⁸ Ku be jam de Bɛ̈nydït bɛ̈n tëde yɛn an,

⁹ “Dherubabel yen aa gɔl këërkëër de Luaŋdït në yïk, ku ee yen abï ye thöl aya. Yen abä wek ye jɔ ŋic ëgɔk nɔn cï Bɛ̈nydït de rɛm ya tuöc week.

¹⁰ Ku raan biɔn caak ciɛk ë käŋ röt ë määth, abï piɔ̈u miɛt wadäŋ, të le yen wïn ë thëm tïŋ në Dherubabel ciin.

¹¹ Kek ee nyïïnkë kadhorou, ee nyïïn ke Bɛ̈nydït. Nyïïn ee piny woi nɔm ëbɛ̈n. Guɔ luɔp an, “Ku tiim ke olip nu në manyalath baŋë ku baŋë yek nïïm ŋö?”

¹² Ku kër ke tiim ke olip kaarou nu në aruöör de adhääp lɔ̈ɔ̈m yek nïïm ŋö, aruöör ye miök de olip wäl?

¹³ Go ya luɔp an, “Kuc ee kënë?” Guɔ puk nɔm an, “Akuöc, Bɛ̈ny?”

¹⁴ Go lueel an, Kakë ee kɔc kaarou cï Bɛ̈nydït lɔc bïk en aa luööi në pinynɔm ëbɛ̈n.