Dhek 3 - JAM DE NHIALIC 2011

Nyuuth de Tiët ë Biäk ë bɛ̈nydïït ë kake Nhialic

¹ Na wën, ke tunynhial ë nyuth ɛn nyuuth ke Jocua, bɛ̈nydïït ë kake Nhialic ke kääc në tunynhial ë Bɛ̈nydït nɔm. Ku jɔŋdït rac aa nu ëtɛ̈ɛ̈n ayadäŋ në ciin cuëny de tunynhial ke gɛɛny Jocua në kajuëc ëbɛ̈n.

² Go tunynhial ë Bɛ̈nydït lɛ̈k Catan an, “Yïn cï Bɛ̈nydït gɔ̈k jɔŋdït rac. Bɛ̈nydït cï Jeruthalem lɔc ë yï jɔ̈ɔ̈ny. Raanë acït thieny ë luɛ̈kë bei ë mac yic?

³ Ku ëtɛ̈ɛ̈n, Jocua aa kääc në tunynhial nɔm tueŋ ke cieŋ lupɔɔ nhiany.

⁴ Go tunynhial lɛ̈k kɔc wën kääc në yelɔ̈ɔ̈m an, “Yɔ̈ɔ̈tkï lupɔɔ nhianykë bei në yekɔ̈u. Na wën, ke lëk Jocua an, “Tiŋ, awɛ̈ɛ̈cku acä ke nyaai ënɔɔnë. Ku yïn gäm lupɔɔ piɛth bä cieŋ.”

⁵ Na wën, ke lueel an, “Dɛ̈ɛ̈rkï nɔm lupɔ cïn guöp acuɔl.” Gokï dɛ̈ɛ̈r nɔm lupɔ cïn guöp acuɔl, ku yïkkï kɔ̈u lupɔ ke tunynhial ë Bɛ̈nydït ë kääc ëtɛ̈ɛ̈n.

⁶ Na wën, ke tunynhial ë Bɛ̈nydït ë lëk Jocua ee jamë an,

⁷ Acï Bɛ̈nydït de rɛm lueel an: “Na bä kuɛɛrdï kuany yic, ku döt löŋdï. Ke yïn bä tɔ ye bɛ̈ny de ɣöndï kekë kalde ëbɛ̈n. Ku yïn bä tɔ cït kɔc kääc wekë.

⁸ Piŋ apiɛth Jocua, yïn bɛ̈nydïït ë kake Nhialic. Ku tɔ piŋ ë kɔc lui në yïn aya, kɔc cï ke tɔ nyooth ka bï bɛ̈n. Yɛn bï lïmdï bɛ̈ɛ̈i, lïm cɔl Këër.

⁹ Aye Bɛ̈nydït de rɛm lueel an, Tiëŋkï, kuur cä cäp thar piny në Jocua nɔm tueŋ. Ade nɔm aguuk kadhorou. Abä tueŋ kɔ̈u, ku nyaai awäny de ee pinyë në kööl tök.

¹⁰ Ku lueel ë Bɛ̈nydït de rɛm an, “Të le ee köölë bɛ̈n, ŋɛk abï raan thiëëk kek aa caal në timdɛn ë enap thar, ku tim ë ŋaap thar.