Dhek 2 - JAM DE NHIALIC 2011

Nyuuth de Wïn ë Thëm

¹ Na wën, aa jat a nyin nhial, ke ya tïŋ raan akääc në yanɔm tueŋ ke muk wïn ë thëm në yecin.

² Guɔ luɔp an, “Lɔ ënou?

³ Go puk nɔm an, “Yɛn lɔ Jeruthalem them në bɛ̈ɛ̈r bɛ̈ɛ̈r en kɔ̈u, ayï dït de yeyic. Na wën, ke ya tïŋ tunynhial wën jam ke yɛn ke jäl, ku bïï ë tunynhial däŋ rɔ̈m ke yen.

⁴ Ku lëk en an, “Kɔt, lɔ lɛ̈kë ee wën dhuŋ muk wïn ë thëm an, Jeruthalem abï yïk cït man ë bɛ̈i, ka acïn kal bï yïk, ku abï thiäŋ ke kɔc juëc arëët, ku ɣɔ̈k juëc.

⁵ Ku yɛn guöpdï, yɛn abï ya kal ë mac, kë bï ye gël. Ku ee yɛn abï ya dhuëëŋdɛn tɔ̈u yeyic thïn. Yen kë cï Bɛ̈nydït lueel ka.

Kɔc cï Peec Acöölë ke Baai

⁶ Go Bɛ̈nydït cööt an, “Katkï, bäkï. Kualkï röt piny lɔ të lɔ rut. Në biäk cän we thiäi piny në aguuk ke pinynɔm kaŋuan yiic.

⁷ Kual rɔt Babilonia, Bäkï Dhiɔn ë Jeruthalem.

⁸ Kë cï Bɛ̈nydït de rɛm lueel kï. Të ɣɔn cï yen ɛn dhuëëŋ guöp, ku juöör cï kɔcke peec la lɛ̈k keek an, “Raan lɔ we jak, ka ë nyin cooldï jakic.

⁹ Yɛn bï yaciin yɔ̈k keek, ka abï lïïmken ke peec. Yen abä wek en jɔ ŋic nɔn cï Bɛ̈nydït de rɛm ɛn tooc ë yic.

¹⁰ Ku lueel ë Bɛ̈nydït an, “Kiëtkï në miɛtëpiɔ̈u arëët, nyan de Dhiɔn. Yɛn bɔ̈ bä bɛ̈n rëër në weyiic!

¹¹ Ku ëtɛ̈ɛ̈n, juöör juëc ëbɛ̈n abïk bɛ̈n tëde Bɛ̈nydït, ku tɔkï röt ee kɔckï ku Yɛn bï bɛ̈n rëër në weyiic, ka abäk jɔ ŋic ëgɔk nɔn cï Bɛ̈nydït de rɛm yɛn tuöc week ë yic.

¹² Ku Juda abï bɛ aa këde Bɛ̈nydït në pinydɛn ɣeric. Ku abï Jeruthalem bɛ lɔc.

¹³ Raan ëbɛ̈n ë lɔ dïu në Bɛ̈nydït nɔm, Bɛ̈nydït ë rɔt jɔt tëdɛn ɣeric rëër en thïn.