Dhek 11 - JAM DE NHIALIC 2011

Wïïk de Bäny Nɛ̈ɛ̈k

¹ Liep ɣöötku thook yïn Lebanɔn, ke mac ë cam tiimkuön ke thidar!

² Dhiau abä piɔ̈u jiɛth yïn tim de ameth, tiim ke thidar acïk wïïk, kek ee tiim lɛ̈kë acï ke riɔ̈ɔ̈k! Dhiaukï abäk piɔ̈ɔ̈th jiɛth wek tiim ke ɣok ke Bacan, roor dïït lɔ thïk acï yiɛp piny!

³ Bäny adhiaukï në jiɛthëpiɔ̈u, dhuëëŋden ë jäl! Piɛŋkï kïïu de kɔ̈ɔ̈r, ɣöndɛn roor nu ë Jordan yɔu acï riɔ̈ɔ̈k!

Tïït Kaarou

⁴ Kë cï Bɛ̈nydït Nhialicdï lɛ̈k ɛn kï an, “Tɔ rɔt ee tïn ë luny ë thök bïï tɛm röt.

⁵ Aye kɔc cï keek ɣɔɔc ke nɔ̈k, ku cïn këtuc ye luöi keek. Ku kɔc ee keek ɣaac ayek lueel an, ‘Thieithieei Bɛ̈nydït, yɛn ë kuɛth.’ Ayï tïnden guöpde acïï piɔ̈u ee kok ë keek.

⁶ (Acï Bɛ̈nydït lueel an, “Yɛn cïï piɔ̈u bï kɔn bɛ kok wokë kɔc de piny. Raan ëbɛ̈n në keyiic abä gäm kɔc rëër kek, ku bänyken. Ku piny abï bänykë ye yɔŋ nɔm, ku acä keek bï luäk bei në kecin.)

⁷ Ku kɔc ë ɣɔc thök, mɛ̈tkï në kɔc ë ɣɛɛc keek acïk yɛn riöp tiët, ka yɛn cï ya tïn ë thök wään bïï tɛm röt. Ka yɛn ë thieec nööm kaarou, thieny tök acä cäk an, “Kokdepiɔ̈u. Ku cäk däŋë an, “Mät. Ka yɛn aa tit luny de thök.

⁸ Yɛn ë piɔ̈u bɛ̈n riääk wokë tïït kɔ̈kkë kadiäk, tïït man ɛn, guɔ ke nyaai nyïïn kedhie në pɛɛi tökic.

⁹ Na wën, ke lɛ̈k luny ë thök an, “Yɛn cïï bï bɛ aa tïndun. Tɔ kɔc thou thou. Tɔ kɔc bï riɔ̈ɔ̈k riäk. Ku kɔc cï döŋ abïk röt lɔ̈ɔ̈k riɔ̈ɔ̈k në röt kapäc.

¹⁰ Na wën, ke ya nöm thieny cɔl Kokdepiɔ̈u. Ku dhuɔŋ kɔ̈u, riääk ɛn män cï Bɛ̈nydït mat kekë juöör ëbɛ̈n.

¹¹ Go mät riääk ëtɛ̈ɛ̈n ee kööl manë. Ku ëtɛ̈ɛ̈n, kɔc ë ɣɔɔc thök, ayï kɔc ë ɣɛɛc thök aake woi yɛn. Gokï ŋic nɔn ë jiɛɛm ë Bɛ̈nydït në kë cä looi yic ëbɛ̈n.

¹² Guɔ lɛ̈k keek an, “Na kaarkï an gämkï yɛn ariöpdï, ke gämkï yɛn. Na cäkï kɔɔr bäk yɛn gäm ariöpdï, ke nämkï këdun. Agokï ya gäm ariöpdï ke ye atek kathiërdiäk.

¹³ Go ë Bɛ̈nydït lɛ̈k ɛn an, “Tääuwë keek në wëu ke Luaŋdït yic. Na wën, ke ya nöm atekë kathiërdiäk, ku tääu keek në wëu ke Luaŋdït yiic.

¹⁴ Na wën, ke ya dhoŋ thieny ye thieec rou kɔ̈u thieny cɔl ‘‘mät’’, go män de Yithriɛl kekë Juda puɔ̈k.

¹⁵ Na wën, go ë Bɛ̈nydït lɛ̈k ɛn an, ‘Be rɔt tɔ ye tïn cïn naamde.

¹⁶ Tiëŋkï ënɔɔnë yɛn bïï tïn cïn këde yic thïn kekë thök cï määr, tïn cïï thök tök ee gël, ku cïï thök nu ee nyuääth. Ee thök cuai kek ye cuet, ku ɣɛ̈ɛ̈r kärken yiic.

¹⁷ Amawoou në tïn cïn naamdeyë acï luöi këtuc! Ë lunyde päl wei. Riɛlde abï tɔŋ nyaai taitai. Abï kök wiɛɛu, ku cɔɔr nyin cuënyde.