Danyel 7 - JAM DE NHIALIC 2011

Danyel Awer Nyuuthke Yiic ( 7:1–12:13 ) Nyuuth ë Läi Kaŋuan de Danyel

¹ Wään ë ruöön tueŋ ye Belcadhar melik de Babilonia, yɛn cï nyuöth, guɔ nyuuth tïŋ wakɔ̈u. Aguɔ nyuöth gäär piny, ku kënë ee kë wään cä gɔ̈ɔ̈r

² në kë wään bä tïŋ ee wɛ̈ɛ̈r ë yic: Yom aa put ë ɣään kedhie ku aaye rɔt yuöp ë wɛ̈ɛ̈r yic.

³ Go läi dït kaŋuan 4 bɛ̈n bei në Abäpdit yic, tök në keyiic ee wuöc kekë läi kɔ̈kkë.

⁴ Kë tueŋë acït köör, ku ade wuök cï cuɔɔr. Ku të wën daai yɛn, wuök acï keek guɔ cuän bei. Go läi jat nhial ku tɔ kääc në yecök. Na wën ke gëmë nɔm de raan.

⁵ Lɛ̈n de rou acït köörayuääl kääc në cökkɛn ciëën. Ku amuk lɔ̈m kadiäk në yelec, go ë röl lɛ̈k en an, “Lɔɔr tueŋ cuet rïŋ cït man ë kë kɔɔr!”

⁶ Ku të wën daai ɛn, guɔ lɛ̈n däŋ tïŋ. Acït guöp kuac, ku ade kɔ̈u wuök kaŋuan, wuök cït wuök ke dit, ku ade nïïm kaŋuan. Ku ade bääny tiëc në daaide yic.

⁷ 7 Ku të wën jɔ yɛn daai, go lɛ̈n ë ŋuan tïc. Aril ëtör, ku ee gök de gäi, ku ee këde riɔ̈ɔ̈c. Në leckɛn dït ke wëëth aye yen ka cï tiaam kuem, ku jɔ ke dum ë yecök. Acïï cït läi kɔ̈kkë ade nɔm tuŋ kathiëër.

⁸ Ku të wën woi ɛn tuŋ, yɛn cï tuŋ thiinakäŋ abɔ̈ bei në tuŋ kɔ̈kkë yiic. Acï tuŋ kadiäk kɔ̈k ë yök ëtɛ̈ɛ̈n rɛ̈ɛ̈t bei. Yen ee tuuŋë ade nɔm nyin de raan. Ku thoŋ ee jam ke leec rɔt.

Nyuuth de Raan Pïïr Aɣet Athɛɛr

⁹ Ku të wën daai yɛn, thöc acï keek tääu piny, ku raan pïïr aɣet athɛɛr ya acï nyuc në thööc tök nɔm. Lupɔɔke aɣeerkï cït alath awai, ku nhïmke acïtkï linɔn lɔmot. Ku thööcde acï guiir në cök dɛ̈p, alek bilbil ë mac,

¹⁰ ku nyin ë mac awët bei ë yeyic. Ade aguum ke kɔc juëc ëtɛ̈ɛ̈n, kɔc luui yen, ku aguum juëc ke kɔc cïï lëu në kuɛ̈n akɛ̈ɛ̈ckï në yenɔm. Ku jɔ luk luɔide gɔl, ku awereek acï keek pet yiic.

¹¹ Ku të wën daai yɛn, yɛn piŋ röl de tuŋ thiinë ke ŋoot ke jam në lɛc. Ke ya daai, go lɛ̈n de ŋuan nɔ̈k, ago guöpde dɛɛny ë lɔ̈k de macic ku jɔ riääk.

¹² Ku läi kɔ̈kkë riɛlden acï jɔt, ku acï keek gäm kaam thiin bï kek ŋoot ke ke pïïr të thiinakäŋ.

¹³ Ku në ee nyuuthë yic wakɔ̈u, yɛn cï kë cït mɛnh ë raan tïŋ. Abɔ̈ të nu yɛn thïn ke cï geeu në luäät, ago lɔ të de raan pïïr aɣet athɛɛr, go lɔ gäm en.

¹⁴ Acï gäm riɛl, ku dhuëëŋ ku bääny de ciɛɛŋ, ago kɔc ke juöör ëbɛ̈n, ku kɔc ëbɛ̈n, ku thook ëbɛ̈n yen aa luööi. Riɛlde abï tɔ̈u aɣet athɛɛr ku ciɛɛŋde acïï kɔ̈u bï tɛɛm.

Nyuuth Awer Keek Yiic

¹⁵ Nyuuth cä ke tïŋ acïk ya mum nɔm, ka yɛn cï piɔ̈u jiɛth aläl.

¹⁶ Guɔ lɔ tëde raan töŋ ë kɔc kääc ëtɛ̈ɛ̈n, ku luɔp në yic, bïï wɛ̈ɛ̈r yic ɛn ëbɛ̈n. Ago ya lɛ̈k kë lueel.

¹⁷ Lueel an, “Kek ee läidïtkë kaŋuan, ayek wuötdït kaŋuan, wuöt bï röt jɔt ë piny nɔm.

¹⁸ Ku kɔc ke Nhialic dït abïk riɛl de ciɛɛŋ yök, ku abïk ciɛɛŋ muk aɣet athɛɛr.

¹⁹ Ku akaar bä këdäŋ ŋic aya në biäk de lɛ̈n ë ŋuan, lɛ̈n cïï guöp läi kɔ̈kkë, lɛ̈n ee kɔc riääc, lɛ̈n ee ka cï tiaam kuem në riöpkɛn ke maläŋ ku leckɛn ke wëëth ku ciɛth ë kekɔ̈ɔ̈th.

²⁰ Ku yɛn kɔɔr bä tuŋ kathiëër nu ë yenɔm ŋic, ku lɔ tuŋ ë be cil yenɔm ciëën ku tɔ tuŋ kadiäk löny. Ade nyïïn ku thok, ku ee jam ke leec rɔt. Ee këde riɔ̈ɔ̈c aläl awär ka kɔ̈kkë.

²¹ Ku të wën daai yɛn, yen ee tuuŋë acï tɔŋ luöi kɔc ke Nhialic, ku peec keek.

²² Na wën ke raan pïïr aɣet athɛɛr ëbɔ̈ ku luk ë yic kɔc ke Nhialic dït. Akööl acïk bɛ̈n akööl bïï kɔc ke Nhialic riɛl de bääny nööm.

²³ Kënë yen ee wërë yic ë gämë yɛn an: “Lɛ̈n de ŋuan yen aye wun de ŋuan, wun bï nu ë piny nɔm ku abï wuöc ke wuöt kɔ̈k. Abï piny nɔm kuem ëbɛ̈n ku dum piny ëbɛ̈n.

²⁴ Ku tuŋ kathiëër ee meliik kathiëër bï ee ciɛɛŋë cieŋ. Ku ëtɛ̈ɛ̈n melik däŋ abï tïc, ku abï wuöc aläl kekë meliik tueŋë ku abï meliik kadiäk wit.

²⁵ Abï jam rac luɛɛl ë Nhialic dït guöp, ku abï kɔc ke Nhialic yɔŋ. Abïï them në luɔi bï yen löŋdɛn ë lɔ̈ŋ wel yiic, ayï lööŋken ayï akööl ke dhuëëŋken, ku abï kɔc ke Nhialic cieŋ në run kadiäk ku pɛ̈i kadhetem.

²⁶ Ku ëtɛ̈ɛ̈n luk abï nyuc nhial bïï löŋde teem, riɛlde abïï nööm, ku jɔ riɔ̈ɔ̈k taitai.

²⁷ Bääny ku riɛldït de ciɛɛŋ ë pinynɔm ëbɛ̈n abïï gäm kɔc ke Nhialic dït. Ku riɛl de bäänyden acïï kɔ̈u bï tɛɛm ku bäny ke pinynɔm ëbɛ̈n abïk keek aa luööi ku rïïukï keek.

²⁸ Kënë yen ee thök de ka cï röt looi. Yɛn aacï riɔ̈ɔ̈c aläl, arëk abä nɔm mum, ku yɛn cï këriëëc ëbɛ̈n muɔ̈k ë yapiɔ̈u.