Danyel 12 - JAM DE NHIALIC 2011

Akööl Ciëën ke Thök de Käŋ

¹ Go tunynhial ceŋ lupɔɔ ɣer lueel an, “Në aköölkë yiic, Maikɔl, tunynhial dït, raan ee kɔc ke Yithriɛl tiit, abï tïc. Ku abï dɛ akööl ke nuan, nuan dïït kën rɔt kɔn looi ɣɔn ciɛk ë juöör ke piny nɔm aɣët cï ee köölë. Të cï ë köölë bɛ̈n, kɔc ke jurdun kedhie kɔc cïï ë rinken gɔ̈ɔ̈r në awerek de Nhialic yic, abïï keek kony wëi.

² Kɔc juëc cï thou abïk bɛ pïïr, kɔc kɔ̈k abïk piɔ̈ɔ̈th miɛt në pïïr athɛɛric, ku kɔ̈k abïk gum në ayär athɛɛric.

³ Ku bäny Pelnïïm abïk lɔ riauriau në gëlgël de paannhial ëbɛ̈n, ku kɔc cï kɔc juëc wëët në luöi bï kek piathëpiɔ̈u aa looi, abïk riau cï kuɛl aɣet athɛɛr.”

⁴ Go ë tunynhial lɛ̈k ɛn an, “Ku ënɔɔnë, Danyel, thiɔ̈k awerek ku bot thok aɣët cï thök de piny nɔm. Ku kɔc juëc abïk kaamdït thöl ke ke kɔɔr luöi bï kek kë loi rɔt yökic.

⁵ Guɔ kɔc kaarou tïŋ ke ke kääc në kiir nɔm, tök lɔŋë ku tök lɔŋë.

⁶ Go raan tök ë ke yiic, tunynhial ceŋ lupɔɔ ɣer nu ë kiir lɔŋ tui luɔp an, “Agut cï nɛn bï ka ke gäi loi röt aya thök?”

⁷ Ago tunynhial ceŋ lupɔ ɣer kääc në kiir nɔm, ciin cuëc ku ciin cam yaak nhial, ku kuëëŋ në rin ke Nhialic Pïïr Athɛɛr. Acä piŋ ke lueel an, “Abïï ya run kadiäk ku biäk. Të bïï yaaŋ de kɔc ke Nhialic thök, kakë kedhie abïk röt dhil kɔn looi.”

⁸ Yɛn cï kë lueel piŋ, ku akën yökic. Aguɔ luɔp an, “Ku bɛ̈ny, bï kake kedhie jɔ thök adï?”

⁹ Go bɛ̈ɛ̈r an, “Danyel, jɔ jäl ënɔɔnë, wëlkë abïï keek dhil muk ke ke mony ku thian keek agut të bïï ë kööl ciëën bɛ̈n.

¹⁰ Kɔc juëc abï keek tɔ dikëdik, ku wak keek, ku gii keek, ku kɔc ee karɛc looi abïk ŋoot ke ke loi karɛc. Kɔc ee karɛc looi acïkï bï yökic, ee kɔc pelnïïm kapäc kek bï ye yökic.”

¹¹ “Gɔl ë kööl ë tɔ miɔ̈c näk aköölnyïïn kääc, yen aye kööl bïï ë KËNHIƐƐNY EE RIƆ̈Ɔ̈C BƐ̈Ɛ̈I jat nhial, yen abï nïn agum ku bot kaarou ku thiërdhoŋuan 1,290 wan.

¹² Thieithieei në kɔc bï döŋ ke ke ye piɔ̈ɔ̈th adööt agut të le nïn agum ku bot kadiäk ku thiërdiäk ku dhïc 1,335 wan!

¹³ “Ku yïn Danyel, rɛ̈ɛ̈rë ke yï ye piɔ̈u adöt agut cï thök de käŋ. Ku ëtɛ̈ɛ̈n yïn bï thou, ku yïn bï rɔt jɔt, bä ariöpdu bɛ̈n nööm në kööl ciëën.”