Cäk 9 - JAM DE NHIALIC 2011

Män de Nhialic kekë Nowa

¹ Go Nhialic Nowa thieei kekë wɛ̈ɛ̈tke, ku lëk keek an, “Kɛɛrkï, ku thiäŋkï piny nɔm.

² Ku läi kedhie, ayï diɛt ku rec, ku ka ye mol piny kedhie, abïk aa riɔ̈ɔ̈c në yïn ë cieŋ. Ku käŋ ëbɛ̈n, kapïr acä keek tääu në yïcin.

³ Ku käŋ kedhie, kapïr, abïk aa kacaamku, cït man cän ke kɔn gäm wal tɔ̈c. Ku ënɔɔnë, käŋ kedhie acä ke gäm yïn ke ke ye kacaamku.

⁴ Ku kë cän jaai në yen, ee rïïŋ ŋoot ë riɛmde ke kuëër yetök, yen acï bï ya cuet, në luɔi nu ë pïïr në riɛmic.

⁵ Na de raan lɔ raan nɔ̈k, ka bï kuum. Ku na le dɛ län lɔ raan nɔ̈k, abä kuöm thuɔɔu.

⁶ Ku raan lɔ raan nɔ̈k, abï nɔ̈k aya në raan däŋ. Në luɔi cï Nhialic raan cak ke thöŋ rɔt.

⁷ “Ku yïn bï kɛɛr, ku kɔ̈thku abïk piny thiɔ̈ɔ̈ŋ nɔm ëbɛ̈n.”

⁸ Ku be Nhialic lɛ̈k Nowa kekë wɛ̈ɛ̈tke an,

⁹ “Ënɔɔnë, Yɛn luel mät wo week, ku kɔ̈thkuön bï lɔ̈ɔ̈k tɔ̈u në wecök.

¹⁰ Ku Yɛn luel mät aya wokë kapïr kedhie, ka nu në yïn ëtök, läi ku diɛt ku këpïïr ëbɛ̈n, kë ë bɔ̈ bei abëlic.

¹¹ Yɛn loi mändï wo week, në luɔi cän kake piny nɔm bï bɛ riɔ̈ɔ̈k në pïïu ke amool.

¹² Ku lueel ë Nhialic an, Kënë ee kïn ë män cä mat wokë week, ku këpïïr tɔ̈u ke yïn ëbɛ̈n. Në luɔi cï yen kɔ̈u bï bɛ tɛɛm aɣet athɛɛr.

¹³ Yɛn tɛ̈ɛ̈u mïïtdï nhial ë luätic, ee yen abï ya kïn ë män cä mat wokë kake piny nɔm kedhie.

¹⁴ Ku të cän luät tääu nhial, ku cï mïït tïc thïn,

¹⁵ Yɛn bï mändiën cä mat wo yïn, ku kapïr ëbɛ̈n aa tak, ku pïïu acïkï röt duëër be tɔ ya amool ku bekï kapïr riɔ̈ɔ̈k kedhie.

¹⁶ Ku të cï mïït tïc në luätic, abä woi ke Yɛn bï a nɔm aa tak në män nu në kaam de Nhialic kekë këriëëc nu në piny nɔm ëbɛ̈n.

¹⁷ Go Nhialic lɛ̈k Nowa an, kënë ee kïn ë män wään cä lueel wokë këriëëc ë piny nɔm ëbɛ̈n.”

Nowa kekë wɛ̈ɛ̈tke

¹⁸ Ku wɛ̈ɛ̈t ke Nowa ë bɔ̈ biic abëlic, ee Cem kekë Ɣam ku Japeth. (Ɣam yen aye wun Kanaan.)

¹⁹ Ku keek kadiäk, kek aye wɛ̈ɛ̈t ke Nowa. Ku ee kek ee kuarken ë kɔc ke piny nɔm kedhie.

²⁰ Nowa yen aye raan töŋ tueŋ ë kɔn piny com nɔm, go dom de enap com.

²¹ Na ɣɔn, ke dëk në mɔ̈n ë loi në ee timë. Ago mɔ̈u en wit, go tɔ̈c ë paanyic ke kën ë kɔ̈u kum në lupɔ.

²² Go Ɣam, wun Kanaan wun tïŋ ke cïn kɔ̈u lupɔ, go lɔ lɛ̈k mïthëkɔcken kaarou biic.

²³ Go Cem bɛ̈n kekë Japeth, ku jɔkï lupɔ dɔm thok në kekët, ku lekï ë paanyic ke ke cath në kekɔ̈ɔ̈th, ku kumkï wuönden kɔ̈u në yen, ke ke ŋoot ke ke wel kenyïïn wei, ke ke cïï wuönden bï tïŋ ke rɛ̈ɛ̈r në yekɔ̈u.

²⁴ Na wën, alɔ mɔ̈u jäl në Nowa nɔm, ku jɔ kë cï wëndɛn thiinë luöi yen ŋic,

²⁵ ke lueel an, “Aciɛɛn anu në Kanaan yeth! Abï ya lïm de mïthëkɔcken.

²⁶ Ku lueel ë Nowa ayadäŋ an, athiɛɛi de Nhialic abï tɔ̈u kekë Cem. Ku abï Kanaan tɔ ye lïmde.

²⁷ Nhialic abï Japeth tɔ kɛɛr. Ku wɛ̈ɛ̈tke abïk dɛ rëër piɛth në baai de Cem. Ku Kanaan abï ya lïm de Japeth.”

²⁸ Ku Nowa ëbɛ̈n lɔ̈ɔ̈k rëër amool cök në bot kadiäk ku thiërdhïc de run ke pïïr.

²⁹ Ku run ke Nowa aake ye bot kadhoŋuan ku thiërdhïc, ku jɔ bɛ̈n thou.