Cäk 7 - JAM DE NHIALIC 2011

Amool

¹ Go Bɛ̈nydït lɛ̈k Nowa an, “Lɔ abëlic wekë baaidu, yïn cä tïŋ nɔn yïn raan töŋ piɛth piɔ̈u, raan cï ya luɔi yith në kɔc ke piny nɔmiic ëbɛ̈n.

² Nöm läi kadhorou në läi piɛth yiic läi duëërë ke nɔ̈k, thɔn kekë ŋuöt. Ku nöm läi kaarou në läi raciic kedhie, ke ye thɔn kekë ŋuöt ayadäŋ.

³ Ku lɔ diɛt kadhorou në diɛtiic ayadäŋ, ke ye thɔn kekë ŋuöt. Në luɔi bïn keek döt nyïïn ke ke cï nyïïn bï riäär.

⁴ Në luɔi bän deŋ tɔ tueny të cï ee nïnkë kadhorou thök, në wɛ̈ɛ̈riic kathiërŋuan ku cooliic kathiërŋuan ke cïï kääc. Ku këriëëc wään cä cak ë piny nɔm ëbɛ̈n, abä keek nyaai nyïïn kedhie abïï ciɛ̈n kë dɔ̈ŋ.”

⁵ Go Nowa ka cï Bɛ̈nydït lɛ̈k en looi kedhie.

⁶ Ku run ke Nowa aake ye bot kadhetem ɣɔn bï amool ë piny nɔm.

⁷ Ku Nowa kekë tiiŋde, ku wɛ̈ɛ̈tke, ku diäär ke wɛ̈ɛ̈tke acïk bɛ̈n lɔ abëlic në luɔi cï amool ke bï yök.

⁸ Ku läi piɛth, ku läi rac, ku diɛt, ku ka ye mol në keyöth piny,

⁹ thɔn ku ŋuöt acïk bɛ̈n lɔ abëlic, ke ke ye rou ku rou, në Nowa ë tök cït man cï Nhialic e thɔ̈n Nowa.

¹⁰ Na ɣɔn aacï nïn kadhorou thök, ke amool ë bɔ̈ ë piny nɔm.

¹¹ Na ɣɔn, aacï run ke Nowa aa bot kadhetem, në kööl ë ye pɛɛi ye pɛ̈i rou thok thiëër ku dhorou, ke pïïu ë ke tul piny, ku liep tënhial e yic, ku wɛ̈l pïïu piny arëët, liëëpkï në piny nɔm.

¹² Go deŋ tuɛny në nïniic kathiërŋuan ku cooliic kathiërŋuan ke cïï kääc.

¹³ Në ee kööl man ë yen ë le Nowa abëlic kekë tiiŋde, ku wɛ̈ɛ̈tke kadiäk Cem, ku Ɣam ku Japeth, ku diäärken.

¹⁴ Ku lɔ läi nyïïn ëbɛ̈n në keek ë tök, läi baai ku läi roor, läi kor ku läi dït. Ku lɔ diɛt nyïïn ëbɛ̈n, ku ka ye mol piny,

¹⁵ thön ku ŋut në kapïr nyïïn kedhie, acïk bɛ̈n lɔ abëlic në Nowa ë tök

¹⁶ cït man cï Nhialic e thɔ̈n en. Ku jɔ Nhialic ke thiɔ̈ɔ̈k thïn.

¹⁷ Ku deŋ aŋoot ke tueny në ee nïnkë yiic kathiërŋuan. Go pïïu röt ŋuak, go abël rɔt tuök nhial në pïïu nïïm.

¹⁸ Ku ŋoot pïïu ke ke ŋuak röt aläl, go abël ŋoot ke thɔɔr ë pïïu nïïm.

¹⁹ Go pïïu kur dït bär thiaan nïïm.

²⁰ Ku ŋootkï ke ke lɔ nhial, abïk kur wöör nïïm në mitïïr kadhetem ku biäk.

²¹ Ku këriëëc de piny nɔm ëbɛ̈n, acïk bɛ̈n thou, kɔc ku läi, ku diɛt, ku ka ye mol në keyöth kedhie.

²² Këriëëc de yic wëi në piny nɔm ëbɛ̈n ë thou ëbɛ̈n abïï ciën töŋ dɔ̈ŋ.

²³ Nhialic ë kapïr bɛ̈n nyaai nyïïn ë piny nɔm ëbɛ̈n, raan ku läi, ku diɛt, ku ka ye mol piny në keyöth. Acï Nhialic ke bɛ̈n nyaai nyïïn kedhie në piny nɔm ale döŋ ke ye ka nu në abëlic në Nowa.

²⁴ Ku pïïu aake ŋoot ke ke thiäŋ piny nɔm në nïniic kabɔt ku thiërdhïc.