Cäk 6 - JAM DE NHIALIC 2011

Kërɛɛc ë raan

¹ Ɣɔn cï kɔc ke piny nɔm kɛɛr, ku thiëikï ë piny nɔm, acïk duet bɛ̈n dhiëëth.

² Ku wɛ̈ɛ̈t ke Nhialic acï duet ke bɛ̈n diir, agokï röt lɔ̈c diäär në keyiic cït man ë kë kɔɔr ë piɔ̈nden.

³ Ago Bɛ̈nydït lueel an, “Yɛn cïï raan bï bɛ aa tɔ pïïr aɣet athɛɛr, në luɔi ye kek gup ke thuɔɔu. Runken abïk aa kɔ̈ɔ̈c në bɔt ku thiërrou ë run.”

⁴ Ku në aköölkë yiic agut cï kecök ciëën, jööt aake nu në piny nɔm. Ɣɔn cï wɛ̈ɛ̈t ke Nhialic lɔ në diäär, ku dhiëthkï mïth në keek. Ku ee kek aaye kɔc ril ɣɔn thɛɛr, ku aake tiëc rin aläl në kɔciic.

⁵ Ɣɔn cï Bɛ̈nydït kërɛɛc ë raan tïŋ ke cï dït në piny nɔm, ku tïŋ täŋ ë raan ke rac ë ceŋ,

⁶ Bɛ̈nydït ë piɔ̈u bɛ̈n gɔ̈ɔ̈i në kë ë ciëk raan.

⁷ Go Bɛ̈nydït lueel an, “Yɛn bï kɔc cä cak nyaai nyïïn kedhie në piny nɔm, abïï ciɛ̈n tök. Ku läi, ku diɛt, ku ka ye mol, abä ke nyaai nyïïn kedhie. Në luɔi cän piɔ̈u rac në kë ë cäk keek.”

⁸ Ku Bɛ̈nydït aa mit piɔ̈u ke Nowa.

Alɛɛŋ ë Nowa

^9-10 Kënë alɛɛŋ ë Nowa. Nowa aaye raan piɛth piɔ̈u arëët. Ku aaye raan töŋ ë cïn guöp awäc në remdenic ëbɛ̈n. Ku aaye kake Nhialic piɔ̈u looi kedhie. Ku ade nɔm mïth kadiäk, yï Cem kekë Ɣam ku Japeth.

¹¹ Ku piny nɔm ëbɛ̈n, acï riääk në Nhialic nyin. Piny acï nɔm thiäŋ kekë ruëëny ku akuöörkuöör.

¹² Go Nhialic piny tïŋ nɔm ke cï riääk, në luɔi cï kɔc ke piny nɔm kërac looi kedhie.

¹³ Go Nhialic lɛ̈k Nowa an, “Acä tak nɔn bän kɔc ke piny nɔm riɔ̈ɔ̈k kedhie, në luɔi cï kek piny riɔ̈ɔ̈k nɔm në karɛckɛn yek looi ëbɛ̈n. Ku piny nɔm abä riɔ̈ɔ̈k abïï ciën kë bï bɛ tɔ̈u thïn.

¹⁴ Ku yïn, cuɛ̈cë rɔt abël wïïr në tim piɛth, tim cɔl gɔper. Ku luöiyë yic ɣööt juëc. Ku bot kɔ̈u biic, ku yeyic thïn në kë cool ye käŋ boot nyïïn cɔl tar.

¹⁵ Ku cuɛ̈c bï yïn abël wïïr cuëëc kï: tɔ bɛ̈ɛ̈r de yekɔ̈u ee mitïïr kabɔt ku thiërŋuan. Ku tɔ dït de yicde ee mitïïr kathiërrou ku diäk. Ku bɛ̈ɛ̈r de ke lɔ nhial tɔ ye mitïïr kathiëër ku diäk ku biäk.

¹⁶ Ku luöiyë nɔm akum ku päl të thiin ɣɔ̈ɔ̈r në kaam de abël nɔm kekë yeguöp, ke ye biäk töŋ de mitïr. Ku luöiyë thok. Ku tɛ̈ɛ̈kë yic në ɣööt kadiäk ke ke lɔ nhial.

¹⁷ Në luɔi bän piny nɔm mool, ku riääk kapïr ë piny nɔm ëbɛ̈n abïï ciën töŋ dɔ̈ŋ ke pïïr.

¹⁸ Ku Yɛn bï dɛ mät wokë yïn, ku jɔ bɛ̈n lɔ abël wïïric wekë tiiŋdu, ku wɛ̈ɛ̈tku, ku diäär ke wɛ̈ɛ̈tku.

¹⁹ Ku yïn bï thɔn kekë ŋuöt bɛ̈ɛ̈i në kapïriic kedhie në yïn etök abëlic. Abïk rëër në yïn ë tök ke ke pïr.

²⁰ Bɛ̈ɛ̈iyë diɛt, ku läi, ku ka ye mol piny kedhie. Abä keek bɛ̈ɛ̈i nyïïn. Ku abïk arou rou në keyiic ëbɛ̈n. Muk keek në yïn etök ke ke pïr.

²¹ Ku nöm kuïïn nyïïn ëbɛ̈n, kuïïn bäk lɔ cam. Ku muɔ̈kë ka tɔ̈u në yïn cäm aya.

²² Go Nowa käŋ looi kedhie, ka cï Nhialic lɛ̈k en.