Cäk 5 - JAM DE NHIALIC 2011

Käu de Adam

¹ Kënë ee kuën de käu de Adam. Ɣɔn ciɛk ë Nhialic kɔc, aake ciɛk ke ke thöŋ rɔt.

² Aa cak moc kekë tik, ku thieei keek, ku ciëk keek an, “Raan.”

³ Ɣɔn cï run ke Adam aa bɔt ku thiërdiäk, ke dhiëth mɛwä kït guöp ke yen, go cäk rin an Theth.

⁴ Ku ëtɛ̈ɛ̈n, Adam acï bot kabɛ̈t kɔ̈k ke run bɛ̈n lɔ̈ɔ̈k thöl ke pïïr. Go mïth kɔ̈k dhiëëth, mïthwät ku duet.

⁵ Ku jɔ thou ke runke ë ke cï ya bot kadhoŋuan ku thiërdiäk.

⁶ Ɣɔn cï run ke Theth aa bɔt ku dhïc, ke dhiëth mɛwä, go cäk an Eenoc.

⁷ Ku be bot kabɛ̈t ku dhorou ë run thöl ke pïïr. Go mïth kɔ̈k bɛ dhiëëth, mïthwät ku duet.

⁸ Ku run ke Theth aake ye bot kadhoŋuan ku thiëër ku rou, ku jɔ bɛ̈n thou.

⁹ Ɣɔn cï run ke Eenoc aa thiërdhoŋuan, ke dhiëth wëndɛn Kanaan.

¹⁰ Ku Eenoc ë bot kabɛ̈t ku thiëër ku dhïc ë run bɛ̈n bɛ thöl ke pïïr. Go mïth kɔ̈k dhiëëth, mïthwät ku duet.

¹¹ Ku jɔ bɛ̈n thou ke runke ë ke cï ya bot kadhoŋuan ku dhïc.

¹² Ɣɔn cï run ke Kanaan aa thiërdhorou, ke dhiëth wëndɛn Maɣalalel.

¹³ Ku be rëër në bot kɔ̈k kabɛ̈t ku thiërŋuan ë run, go mïth kɔ̈k dhiëëth, mïthwät ku duet.

¹⁴ Ku jɔ bɛ̈n thou ke runke ë ke cï ya bot kadhoŋuan ku thiëër.

¹⁵ Ku ɣɔn cï run ke Maɣalalel aa thiërdhetem ku dhïc, ke dhiëth wëndɛn Jared.

¹⁶ Ku Maɣalalel ë bot kabɛ̈t ë run ku thiërdiäk bɛ̈n lɔ̈ɔ̈k thöl ke pïïr. Go mïth kɔ̈k dhiëëth, mïthwät ku duet,

¹⁷ ku jɔ bɛ̈n thou ke ye run bot kabɛ̈t ku thiërdhoŋuan ku dhïc.

¹⁸ Ɣɔn cï run ke Jared aa bɔt ku thiërdhetem ku rou, ke dhiëth wëndɛn Eenok.

¹⁹ Ku be bot kabɛ̈t ë run thöl, go mïth kɔ̈k dhiëëth, mïthwät ku duet.

²⁰ Ku jɔ thou ke cï run aa bot kadhoŋuan ku thiërdhetem ku rou.

²¹ Ɣɔn cï run ke Eenok aa thiërdhetem ku dhïc, ke dhiëth wëndɛn Mathuthela.

²² Ku ëtɛ̈ɛ̈n, Eenok ë kake Nhialic piɔ̈u bɛ̈n aa looi në bot kadiäk ë run. Go mïth kɔ̈k bɛ dhiëëth, mïthwät ku duet.

²³ Run ke Eenok aake cï ya bot kadiäk ku thiërdhetem ku dhïc.

²⁴ Aa thöl pïïrde ke luui Nhialic, go lɔ cut piny mɛ̈ɛ̈r, në luɔi ë cï Nhialic ye jɔt.

²⁵ Ɣɔn cï run ke Mathuthela aa bɔt ku thiërbɛ̈t ku dhorou, ke dhiëth wëndɛn Lamek.

²⁶ Ku jɔ Mathuthela bɛ tɔ̈u në bot kadhorou ë run ku thiërbɛ̈t ku rou. Go mïth kɔ̈k bɛ dhiëëth, mïthwät ku duet.

²⁷ Ku jɔ Mathuthela thou ke runke ë ke cï ya bot kadhoŋuan ku thiërdhetem ku dhoŋuan.

²⁸ Ɣɔn cï run ke Lamek aa bɔt ku thiërbɛ̈t ku rou, ke dhiëth mɛwä.

²⁹ Go lueel an, “Në ee piny man wään cï Bɛ̈nydït cieen nɔmë, mɛnhë abï wo jɔ dak nïïm në pïïric, në karɛckuɔn cuk looi.” Ku jɔ cäk rin an Nowa.

³⁰ Go Lamek bot kadhïc ku thiërdhoŋuan ku dhïc de run bɛ lɔ̈ɔ̈k thöl. Go mïth kɔ̈k dhiëëth, mïthwät ku duet.

³¹ Ku jɔ bɛ̈n thou ke runke ë ke cï ya bot kadhorou ku thiërdhorou ku dhorou.

³² Ɣɔn cï run ke Nowa aa bot kadhïc, ke jɔ wɛ̈ɛ̈tke dhiëëth kadiäk, Cem kekë Ɣam ku Japeth.