Cäk 46 - JAM DE NHIALIC 2011

Jakop akuɛɛth Rip ke baaide

¹ Ago Jakop kuëëth ke këriëëcde ëbɛ̈n. Na wën, ke ɣet Biirceba. Go Nhialic de Yithaak wun lɔ miɔɔc ëtɛ̈ɛ̈n.

² Go Nhialic jam ke Jakop në nyuöthic wakɔ̈u, cɔɔl Jakop an, “Jakop, Jakop!” Go Jakop gam lueel an, “Woi! Yakï eenë.”

³ Go Nhialic lɛ̈k en an, “Ee Yɛn Nhialic de wuur, du riɔ̈c në luɔi le yïn Rip. Yɛn bï mïthku tɔ lɔ ye gökdïït ë jur ëtɛ̈ɛ̈n.

⁴ Yɛn lɔ Rip wo yïn ëtök. Ku mïthku abä ke bɛ lɔ puɔ̈k nïïm ee pinyë. Ku Jothep wëndu, yen abï yï nɔ̈k nyin të le yïn thou.”

⁵ Na wën, ke Jakop ë jäl ë Biirceba. Go mïthke ye tɔ kɛɛc abëëliic kekë mïth ke wɛ̈ɛ̈tke, ku diäärken. Abëël wään tɔ melik de Rip ke bïïyë bï ë keek bɛ̈n jɔt.

⁶ Ku nömkï kakɛn ɣɔn cïk yök piny ë Kanaan. Ku kuathkï ɣɔ̈kken, ku jëlkï ke ke lɔ Rip. Go Jakop baaide jɔt ëbɛ̈n.

⁷ Jɔt wɛ̈ɛ̈tke, ku mïth ke wɛ̈ɛ̈tke, ku duetke. Ku duet ke wɛ̈ɛ̈tke.

⁸ Ku mïth ke Jakop ë lɔ Rip në yen, ee Ruben wën kɛ̈ide.

⁹ Ku wɛ̈ɛ̈t ke Ruben: yï Ɣanook kekë Palu, ku Ɣedheron, ku Karemi.

¹⁰ Ku Thimion ke wɛ̈ɛ̈tke: yï Jemwel kekë Jamin, ku Oɣad, ku Jakin, ku Dhoɣar, ku Caul, ayek mïth ke nyan ë Kanaan.

¹¹ Ku Lebi ke wɛ̈ɛ̈tke: yï Gercon kekë Koɣath, ku Merari.

¹² Ku Juda ke wɛ̈ɛ̈tke: yï Er kekë Onan, ku Cila, ku Peredh, ku Dhera (ku Er kekë Onan aake cï thou piny ë Kanaan.) Ku mïth ke Peredh ee yï Ɣedheron kekë Ɣamul.

¹³ Ku Yithakar ke wɛ̈ɛ̈tke: yï Tola ku Puba, ku Jop, ku Cimron.

¹⁴ Ku Dhebulun ke wɛ̈ɛ̈tke: yï Thired kekë Eelon, ku Jaɣaleel.

¹⁵ Kakë ee kek ee mïth wään dhiëth ë Liya Jakop në Methopotamia. Ku lɔ Dina nyande. Ku kuën ë mïth ke Jakop mïthwät ku duet, aake ye thiërdiäk ku diäk.

¹⁶ Ku Gad ke wɛ̈ɛ̈tke: yï Dhipion kekë Ɣagi, ku Cuni, ku Eedhebon, ku Eeri, ku Arodi, ku Areli.

¹⁷ Ku Acer ke wɛ̈ɛ̈tke: yï Yimena kekë Yiciba, ku Yicibi, ku Beriya, ku Thera nyankënëden. Ku mïth ke Beriya ee yï Ɣeber kekë Malciel.

¹⁸ Ku kakë kathiëër ku dhetem ee mïth ke Jakop. Mïth ke Dhilpa tiiŋde, nyan lïm ɣɔn gëm ë Laban Liya nyande.

¹⁹ Ku Racel tiiŋ ë Jakop aa dhiëth mïthwät kaarou: yï Jothep kekë Benjamin.

²⁰ Ku Jothep ayök acï mïthwät kaarou dhiëëth kekë Athenath tiiŋde, nyan de Pɔtipera, bɛ̈ny de kakë Nhialic wun cɔl Ɣiliopolith, të ɣɔn tɔ̈u en ë Rip. Ku wɛ̈ɛ̈t ke Jothep ee yï Manatha kekë Eparaim.

²¹ Ku mïth ke Benjamin, ee yï Bila kekë Biker, ku Acebel, ku Gera, ku Naaman, ku Yeɣi, ku Rɔc, ku Mupim ku Ɣupim ku Ard.

²² Ku kakë kathiëër ku ŋuan, ee mïth ke Jakop, mïth ke Racel tiiŋde.

²³ Ku Dan ke Ɣucim wënde.

²⁴ Ku Naptali ke wɛ̈ɛ̈tke: yï Jaɣadheel kekë Guni, ku Jedher, ku Cilem.

²⁵ Ku kakë kadhorou ee mïth ke Jakop. Mïth ke Bila, nyan lïm ɣɔn gëm ë Laban Racel nyande.

²⁶ Ku kuën ë mïth ke Jakop ɣɔn lɔ Rip kedhie, ayek thiërdhetem ku dhetem, të cïn diëër ke wɛ̈ɛ̈tke.

²⁷ Ku mɛ̈tkï në wɛ̈ɛ̈t ke Jothep kaarou, wään dhiëth piny ë Rip, ke kuën ee jɔ ya thiërdhorou ëbɛ̈n, kuën ë baai de Jakop.

Jakop aɣet Rip ke baaide

²⁸ Na wën, ke Jakop ë tooc Juda tueŋ, tuc Jothep, le lɛ̈k en luɔi bï kek piny lɔ rɔ̈m Gocen. Na wën, aɣetkï Gocen,

²⁹ ke Jothep ë kɛɛc në abëlde yic, ku le Gocen të nu wunë. Na wën, atïŋkï röt, ke Jothep ë nyuth rɔt wun, ku duut wun yeth, ku dhiɛɛu ë caŋawën.

³⁰ Ago Jakop lɛ̈k Jothep an, “Yïn cä tïŋ guöp ëgɔk, ku acä ŋic nɔn pïïr yïn ë yic. Na ya cak bɛ thou ënɔɔnthiinë, ke yɛn ë gam ë ye.”

³¹ Go Jothep lɛ̈k mïthëkɔcken, ku kɔc baai de wun kedhie, an, “Yɛn lɔ tëde melik, ë la lɛ̈k bɛ̈n cä wek bɛ̈n, ayï baai de wää wään rɛ̈ɛ̈r piny ë Kanaan. Abä lɛ̈k en an acïk bɛ̈n kedhie të nu yɛn në.

³² Ku lɛ̈k en nɔn ya wek kɔc ke ɣɔ̈k. Ku luɔi cath wek në ɣɔ̈kkun, ayï thökkun, ku këriëëcdun ëbɛ̈n.

³³ Na lɔ melik we tɔ cɔl. Ku lop week an, ‘Luɔidun eeŋö?’

³⁴ Ke lɛ̈kkï yen an, ‘Wok ee kɔc ke ɣɔ̈k ë caaŋda, cït man wään kɔn ë kuarkuɔ aa kɔc ke ɣɔ̈k.’ Yen abï yen week jɔ puɔ̈l arɛ̈ɛ̈r piny ë Gocen. Alueel ë Jothep aya, në baŋ cïn ë kɔc ke Rip këden thïn në kɔc ke ɣɔ̈k.”