Cäk 45 - JAM DE NHIALIC 2011

Jothep aguïïr rɔt mïthëkɔcken

¹ Go Jothep yepiɔ̈u kɛ̈n bɛ lëu në muk në lïïmke nïïm. Ago ke tɔ lɔ biic kedhie. Ku acïn raan töŋ ë cï döŋ të wën löök ë Jothep rɔt guiëër mïthëkɔcken nɔn ee yen Jothep.

² Ago dhiau arëët, abï kɔc ke Rip ye piŋ röl. Agokï thok lɛɛr baai de melik.

³ Ago Jothep lɛ̈k mïthëkɔcken an, “Ee yɛn Jothep mänhëdun, wää ŋoot ke pïïr?” Na wën, apiŋ ë mïthëkɔcken ee jamë, ke cïkï puk nɔm. Acïk bɛ̈n riɔ̈ɔ̈c arëët.

⁴ Go Jothep lɛ̈k keek an, “Wek läŋ, cuötkï röt ë yalɔ̈ɔ̈m tëthiɔ̈k.” Agokï röt cuöt në yelɔ̈ɔ̈m. Ago Jothep lɛ̈k keek an, “Ee yɛn Jothep mänhëduön wään bäk ɣɔ̈c Ripë.

⁵ Ku ënɔɔnë, duökï göth. Ku duökï röt gäk wapäc, në luɔi cä wek ɛn ɣɔ̈c kɔc ke Rip. Ee Nhialic ë yic Yen aa tuuc ɛn në wenïïm tueŋ. Ke yɛn bï kɔc kony wëi.

⁶ Tiëŋkï, kënë ee ruöön ye run ke cɔk rou piny ë Rip. Ku run kɔ̈k kadhïc aŋootkï wei. Run cïn piny bï puur, ku cïn kë bï tem thïn.

⁷ Ku Nhialic aa tuuc ɛn në wenïïm tueŋ, ke we bä bɛ̈n luök wëi në ee kueer gɛ̈ɛ̈i yë. Ke we bï poth në thuɔɔu thok, wedhie në mïthkun ëtök.

⁸ Ka acie wek ë tooc ɛn wei. Ee Nhialic Yen ë tuuc ɛn eenë. Ku tɔ yɛn ee bɛ̈nydïït de melik. Ago melik ɛn tɔ ye bɛ̈ny ë wunde ëbɛ̈n. Ka yɛn ee bɛ̈ny ë Rip ëbɛ̈n ënɔɔnë.

⁹ “Ku ënɔɔnë, dapkï wenïïm puɔ̈k wää. Lak lɛ̈kkï yen, an acï Jothep wëndu lueel an, ‘Yɛn cïï Nhialic tɔ ye bɛ̈ny ë Rip ëbɛ̈n. Ka yïn dap bɛ̈n të nu yɛnë, du gääu.

¹⁰ Bäk rɛ̈ɛ̈rkï piny ë Gocen. Ke we bï thiääk në yɛn wekë mïthku, ku mïth ke mïthku, ku ɣɔ̈kku, ku thökku, ku këriëëcdu ëbɛ̈n, kë tɔ̈u ke yïn.

¹¹ Të nu wek Gocen, wek bï thiɔ̈k në yɛn. Wek bä ya tïŋ të thiɔ̈k. Në baŋ ŋoot ë run ke cɔk wei kadhïc. Acä kɔɔr luɔi bï yïn thou në cɔk wekë mïthku, ku mïth ke mïthku, ku këriëëcdu ëbɛ̈n.’ ”

¹² Ku be Jothep ŋoot ke jam lueel an, “Ku week wedhie, ayï Benjamin, acäk tïŋ nɔn yan Jothep guöpdï, yɛn jam wo week.

¹³ Lak guiëërkï wää kakiën kiith tɔ̈u në yɛn Rip eenë. Ku guiëërkï kakiën cak tïŋ në wenyïïn wapäc. Ku dapkï lɔ, lak dapkï wää bɛ̈ɛ̈i të nu yɛnë.”

¹⁴ Ku duut ë Jothep Benjamin mänhë yeth, ku dhiɛɛu. Ago Benjamin dhiau ayadäŋ.

¹⁵ Ku ciim mïthëkɔcken thook kedhie ke dhiau. Ku ëtɛ̈ɛ̈n, mïthëkɔcken acïk jɔ bɛ̈n jam në yen.

¹⁶ Na wën, aɣet thok baai de melik, nɔn cï mïthëkɔcken ë Jothep bɛ̈n. Ke melik ë mit piɔ̈u, ku mit bänykɛn lui në yen piɔ̈ɔ̈th ayadäŋ.

¹⁷ Ago melik lɛ̈k Jothep an, “lɛ̈kë mïthëkɔckun, ë ke jöt mulken kɔ̈ɔ̈th, ku dɔkkï kenïïm piny ë Kanaan.

¹⁸ lɛ̈kë keek lek wuönden bɛ̈ɛ̈i eenë. Ku lek bɛ̈iken bɛ̈ɛ̈i ayadäŋ. Abä ke bɛ̈n gäm piny dïït lääu, piny cïn piny kït ke yen në Ripic ëbɛ̈n.

¹⁹ Ku lɛ̈kë keek bïk abëël ee käŋ dhëëth luath në keek ayadäŋ. Bï kek diëërken lɔ bɛ̈ɛ̈i, ayï mïthken. Ku bïïkï wuönden ayadäŋ.

²⁰ Ku du ke tɔ diɛɛr në kakɛn bï döŋ ciëën, kë piɛɛth tɔ̈u Rip ëbɛ̈n, abï ya këden.”

²¹ Ago wɛ̈ɛ̈t ke Jakop ee kakë looi kedhie cït man cï ye lɛ̈k keek. Ago Jothep ke gäm abëël ee käŋ dhëëth cït man cï melik ë lɛ̈k en. Ku gëm keek ka bïk lɔ cam kueer.

²² Ku gëm ŋɛk ë keyiic lupɔ bï yen lupɔɔke aa waar. Ku na Benjamin, aa gëm bot kadiäk ë wëëth, ku gëm lupɔɔ ee yiic dhïc.

²³ Ku tɔ wun yïnë kacaam piɛth ke Rip, ke ke ɣɛ̈ɛ̈cë në mul kathiëër. Ku tɔ yïnë agamɔ, ku kuïïn cï pam, ku kacaam kɔ̈k rɔ̈ŋ në cäth. Ke ke ɣɛ̈ɛ̈cë në mul kathiëër.

²⁴ Ku tɔ mïthëkɔcken jël. Na wën, aa jëlkï, ke lëk ë Jothep keek an, “Duökï lɔ gɔ̈th kueer.”

²⁵ Agokï jäl ë Rip, lekï piny ë Kanaan, të nu Jakop wuönden thïn.

²⁶ Na wën, ke lek lɛ̈k wuönden an, “Jothep apïïr! Ee yen ee bɛ̈ny ë Rip ëbɛ̈n!” Ago Jakop gäi arëët, ku cïï jamden gam.

²⁷ Na wën, atët ë wɛ̈ɛ̈tke ye kë cï Jothep lueel. Ku tïŋ abëël ee käŋ dhëëth cï Jothep ke tɔ bïïyë, bï kek en bɛ̈n lɛɛr Rip, ke Jakop ë jɔ guöp bɛ̈n lɔ köi piny.

²⁸ Ku lueel an, “Acïn däŋdiën däŋ bä bɛ lueel, na pïïr Jothep mɛnhdï. Yɛn bï lɔ, la tïŋ guöp të kɛ̈n ɛn guɔ thou.”