Cäk 40 - JAM DE NHIALIC 2011

Jothep Awer Nyuöth ke Kɔc Mac Yiic

¹ Na ɣɔn në nïn likakäŋ, ke raan ee mäu ke melik de Rip thiëëp, kekë raandɛn ee yen thäl kuïïn cï pam ë ke wäc melik piɔ̈u.

² Go melik piɔ̈u diu ke keek kaarou. Raan ee yen thiëp mäu, kekë raan ee ye thäl kuïïn cï pam.

³ Go ke lɔ mac ɣön ë bɛ̈ny ë ɣönde tiit thok, të mɛc ë Jothep thïn.

⁴ Na ɣɔn, acïk nïn juëc thöl ke ke mac, ke bɛ̈ny ee ɣöt tiit thok ë kuany Jothep bï keek aa luööi.

⁵ Na ɣɔn, në wɛ̈ɛ̈r tök ke ke ŋoot ë ke mac, ke raan ee mäu thiëëp ë nyuöth, ku nyuöth bɛ̈ny ee kuïïn cï pam thaal ayadäŋ. Ku nyuöth ë ŋɛk aluel kë wuöc ke nyuöth ë ŋɛk däŋë.

⁶ Na wën, aa riëël Jothep ɣɔn amiäk, ke yök keek ke ke cïï piɔ̈ɔ̈th mit.

⁷ Go ke luɔp an, “Eeŋö dïït cä wek wenyïïn nyuan aya ee köölë?”

⁸ Gokï puɔ̈k nɔm en an, “Wok ë nyuöth wën akɔ̈u, ku acïn raandan wëër keyiic wook.” Go Jothep lɛ̈k keek an, “Ee Nhialic Yen ee raan gäm riɛl yen nyuöth weeriic, ka week guiëërkï yɛn nyuöthkun.”

⁹ Go raan ee mäu ke melik thiëëp nyuöthde tɛ̈t Jothep, lueel an, “Në nyuöthdï yic, ade tim de enap ë kääc në yanɔm tueŋ.

¹⁰ Tim de nɔm kër kadiäk. Na wën, aa nyok ë kër, ke ke go akɛɛn moc ëthiäu, ku gokï luɔk ë mïth ke enap.

¹¹ Ku yɛn aa muk abïny ë melik në yaciin. Guɔ mïth ke enap tet, ku nyiɛɛth ke abïny ë melikic, ku gäm en.”

¹² Go Jothep lɛ̈k en an, “Këdɛn lueel kï: kërkë kadiäk ee nïn kadiäk.

¹³ Në ee nïnkë yiic kadiäk, melik de Rip abï yï lony, ku pɛ̈l yïn awänydu. Ku abï yï puɔ̈k nɔm në luɔidu yic. Ka bä bɛ aa gäm abïnyde cït man ɣɔn yïn en kɔn gäm en.

¹⁴ Ku të cï yï lony, ke yï ye nɔm tak në yɛn të mit yïn piɔ̈u. Yïn läŋ, an kok piɔ̈u we yɛn, ku jam we melik në biäk bï yen ɛn luöny bei aloocic.

¹⁵ Ku ee kakë yiic kedhie, yɛn aa kual ɣɔn pinyda, piny ë Ɣeberuu. Ku ayï ënɔɔnë eenë piny ë Rip, yakï mac baaŋ ke cïn kë cä looi, kë rɔ̈ŋ ke mac.”

¹⁶ Na wën, atïŋ ë bɛ̈ny ee kuïïn cï pam thaal nɔn cï Jothep nyuöth ë raan ee mäu ke melik thiëëp weeric ke piɛth, ke tët Jothep nyuöthde ayadäŋ. Lueel an, “Yɛn ë nyuöth ayadäŋ ke ya ɣɛ̈ɛ̈c aɣööth kadiäk ke kuïïn cï pam në yanɔm.

¹⁷ Ku në aɣöth nu në aɣööth nïïm nhialë kedhie, ade yic kacaam ke melik nyïïn kedhie. Na wën, ke ciɛm ë diɛt keek në aɣöthic në yanɔm.”

¹⁸ Go Jothep lɛ̈k en an, “Wër ë yicde kï: aɣööth kë kadiäk, ee nïn kadiäk.

¹⁹ Në ee nïnkë yiic kadiäk, melik abï yï luöny bei, ku tɔ yï tëëmë nɔm bei. Ku kɛɛkë yï nhial në tim nɔm. Ku yïn bï diɛt cam.”

²⁰ Ku ëtɛ̈ɛ̈n, kööl ë ye akööl diäk, aaye kööl ë dhiëëth ë melik de Rip. Go dhuëëŋ dït luöi bänyke kedhie. Ku luny raan ee mäu thiëëp bei kekë raan ee kuïïn cï pam thaal. Ku bïï keek në lïïmke yiic.

²¹ Go raan ee mäu ke melik thiëëp dak nɔm në luɔide yic.

²² Ku le bɛ̈ny ee kuïïn cï pam thaal nöök ë tim nɔm. Ku käŋ kedhie, acïk röt bɛ̈n looi cït man wään cï Jothep ke lueel.

²³ Go raan ee mäu thiëëp nɔm lɔ määr në Jothep taitai, ku cïï be tak.