Cäk 39 - JAM DE NHIALIC 2011

Jothep kekë Tiiŋ de Pɔtipar

¹ Ku Jothep acïï kɔc ke Yicmiɛl lɛɛr Rip, lek ɣɔ̈c Pɔtipar bɛ̈ny ë kɔc ee ɣön ë melik de Rip tiit thok.

² Bɛ̈nydït atɔ̈u ke Jothep, ku ye Jothep tɔ tiëm. Ku Jothep arɛ̈ɛ̈r baai de bɛ̈nyde, raan ë Rip.

³ Ago bɛ̈nyde ye tïŋ luɔi tɔ̈u ë Bɛ̈nydït ke yen. Ku tïŋ luɔi yen ka nu në yeciin ŋuak nyïïn.

⁴ Go Pɔtipar piɔ̈u miɛt ke yen arëët, ku tɔ ye lïm ë ɣön ë naamde. Ku tɛ̈ɛ̈u ë kake ɣönde nïïm kedhie.

⁵ Gɔl ë köölkɛn ë tɛ̈ɛ̈u en en në kake nïïm ku le tueŋ, Bɛ̈nydït ë baai de Pɔtipar bɛ̈n thieei ëbɛ̈n në këde Jothep. Ku thieei kake kedhie ayadäŋ, ka nu ë duumiic.

⁶ Ago Pɔtipar kake jɔ tääu në Jothep ciin kedhie, ku cïn këdɛn yen bɛ diɛɛr, ee pëk ë cäm kɔ̈u yetök. Ku Jothep aaye dhuŋ lɛ̈ɛ̈k ee kɔc diir.

⁷ Na ɣɔn, në ee nïn likë, ke Jothep ë diir tiiŋ ë bɛ̈nyde. Go tik lɛ̈k en an, “Bä nöm ɛn.”

⁸ Go Jothep tiiŋ ë bɛ̈nyde jäi, lëk en an, “Tïŋ ënɔɔnë, bɛ̈nydï acie bɛ diɛɛr në kë nu baai ëbɛ̈n, në luɔi nu yɛn eenë. Ë käŋ tääu në yaciin kedhie.

⁹ Yɛn cï nɔm dɛ riɛl cït riɛlde baai eenë. Ku acïn këdɛn kën gäm ɛn, ee yïn akën gäm ɛn yïtök. Ka ye tak duɛ̈ɛ̈r kërɛɛc cït ë kënë bɛ looi adï, ku wääc Nhialic piɔ̈u?”

¹⁰ Aa ye tik dhiɛl ŋäk Jothep aköölnyïïn ëbɛ̈n, go Jothep aa jai ke cïï tɔ̈c ke yen.

¹¹ Na ɣɔn ë kööl tök, Jothep acï lɔ ɣöt lee luɔide looi ɣööt. Ku acïn raan däŋ ë nu baai.

¹² Na wën, ke tik ë bɔ̈ ɣöt të nu yen thïn, ku dɔm në lupɔ. Ku lëk en, an, “Nöm ɛn.” Go Jothep e nyäŋ lupɔ, ku kɔt ke lɔ biic.

¹³ Na wën, aa tïŋ ë tik luɔi cï Jothep lupɔ nyääŋ piny ku kɔt ke lɔ biic,

¹⁴ ke cɔl lïïm ke ɣönde, ku lëk keek an, “Tiëŋkï Ɣeberuu wään bïï ë monydï baai luɔi cï yen wo yɔ̈ɔ̈r gup. Acï bɛ̈n ɣöt të nu yɛn thïn, ku në yen aa nööm ɛn. Guɔ kiɛɛu luɔc arëët.

¹⁵ Na wën, atïŋ ɛn luɔi cän kiiu, ke kɛɛc biic ku nyiëëŋ lupɔde piny në yalɔ̈ɔ̈m.”

¹⁶ Na wën, ke tik ë päl lupɔ arɛ̈ɛ̈r ëtɛ̈ɛ̈n abï bɛ̈ny ë Jothep bɛ̈n baai.

¹⁷ Ku be tɛ̈t en cït man awën, lueel an, “Ɣeberuu, lïmduön wään bɛ̈ɛ̈iyë ë woyiic, ë lɔ̈ɔ̈k bɛ̈n ɣöt në yen aa nööm ɛn.

¹⁸ Na wën, aluɔc kiɛɛu, ke kɛɛc biic ku nyiëŋ ɛn lupɔde.”

¹⁹ Na wën, aa piŋ ë bɛ̈ny ë Jothep jam wën tɛ̈të tiiŋde yen, ke diu piɔ̈u arëët.

²⁰ Ku jɔt Jothep le mac të ye kɔc ë mɛc ë melik tääu thïn, go lɔ tɔ̈u ëtɛ̈ɛ̈n.

²¹ Ku Bɛ̈nydït atɔ̈u ke Jothep, ku ye Jothep nyuöth nhiëër agɔk. Ku tɔ nhiɛɛr ë raan ee kɔc mac tiit.

²² Ago raan ee kɔc mac tiit Jothep tääu në kɔc mac nïïm kedhie, ku tɔ ye yen nu në këriëëcden nɔm ëbɛ̈n.

²³ Go raan ee kɔc mac tiit cuök ee bɛ diɛɛr në ka nu në Jothep ciin, në luɔi ë tɔ̈u ë Bɛ̈nydït ke Jothep. Ku aye Jothep tɔ tiëm në këdɛn ye looi yic ëbɛ̈n.