Cäk 38 - JAM DE NHIALIC 2011

Juda ke Tamar

¹ Ku ëtɛ̈ɛ̈n, Juda ë mïthëkɔcken bɛ̈n nyääŋ piny, ku jël le rëër ke raan de Adulam, raan cɔl Ɣaira.

² Go Juda ŋïc ke nyan ë Kanaan, nyan ë mony cɔl Cuwa. Go thiaak.

³ Go ye dhiëth mɛwä, go cäk an Er.

⁴ Na ɣɔn, ke be liac, ku dhiëëth mɛwä däŋ, go cäk an Onan.

⁵ Ku be mɛnh däŋ dhiëëth, go cäk an Cila. Ku Juda arɛ̈ɛ̈r wun cɔl Akedhip ɣɔn dhiëëth ë Cila.

⁶ Na ɣɔn, ke Juda ë tɔ Er, wën kɛ̈ide tɔ thiak nyan cɔl Tamar.

⁷ Ku Er wën kɛ̈i de Juda aaye karɛc looi, go Bɛ̈nydït wööc piɔ̈u, go Bɛ̈nydït e nɔ̈k.

⁸ Ago Juda lɛ̈k Onan mänhë Er an, “Nöm tiiŋ ë wänmuuth, lɔ ɣöt we yen. Yïn ee wën baaide, ke yï bï wänmuuth cak nɔm.”

⁹ Go Onan e ŋic nɔn cïï mïth bïï ya mïthke. Go aa tɔ̈c ke tiiŋ ë mänhë, na lë aa bɔ̈ mïth, ke bɔ̈ bei ku tɔ ke kuëër piny. Ke mänhë ë cï nɔm bï dɛ mïth.

¹⁰ Këdɛn ë ye looi ë Bɛ̈nydït bɛ̈n wööc piɔ̈u, go Bɛ̈nydït e nɔ̈k ayadäŋ.

¹¹ Go Juda lɛ̈k Tamar tiiŋ ë wënde an, “Lɔ baaidun, lɔ rɛ̈ɛ̈rë baai de wuur ke yï ye tiiŋ abaar, abï Cila wëndï lɔ̈ɔ̈k dhuöök.” Alëk ë Juda tiiŋ ë wënde aya, në luɔi ë riɔ̈ɔ̈c en në baŋ bï Cila wënde thou cït man ë mïthëkɔcken. Ago Tamar lɔ të nu wun, le rëër ëtɛ̈ɛ̈n.

¹² Na ɣɔn, në nïn likakäŋ, ke tiiŋ ë Juda ë go lɔ̈ɔ̈k thou. Na ɣɔn, athök akööl ke dhiëëu, ke Juda ë jäl kekë Ɣaira mɛ̈thë raan de Adulam, lekï Timena të tem ë thök ke Juda gup.

¹³ Na wën, aa piŋ ë Tamar luɔi le wurɔ̈ɔ̈rde Timena, le amɛ̈lke tem gup.

¹⁴ Ke yööt lupɔɔkɛn ke tiiŋ abaar bei në yekɔ̈u, ku deer cuɛt ë yekɔ̈u, ku le nyuc në kueer ë Anaim kɔ̈u ë wut këc ëgök. Anaim ee wun nu në kueer ë Timena kɔ̈u. Në biäk ë cï ë Tamar e piŋ luɔi cï Cila dhuöök, ku kënë gäm en.

¹⁵ Na wën, aa tïŋ ë Juda en ke ŋic nɔn yen tiiŋ akɔɔrröör, në luɔi ë cï yen enyin kuöm piny në cuɛt.

¹⁶ Go Juda rɔt yäl en ë kueer këc, ku lëk en an, “Lokku, ke ya bï lɔ tɔ̈c wo yïn.” Akën ŋic nɔn yen tiiŋ ë wënde. Go tiiŋ ë wënde lɛ̈k en an, “Eeŋö bä gäm ɛn të le yïn tɔ̈c we yɛn?”

¹⁷ Go puɔ̈k nɔm en an, “Yïn bä lɔ yiɛ̈n amɛthɔ̈k në thökkï yiic.” Go tiiŋ ë wënde lɛ̈k en an, “Apiɛth, de kë bä nyäŋ ɛn, kë bä lɔ̈ɔ̈k muk aɣet të bï yïn nyɔk lɔ bɛ̈ɛ̈i.”

¹⁸ Go Juda ye luɔp an, “Ee kän ŋö kɔɔr, kë bä gäm yïn?” Go lueel an, “Nyäŋë yɛn gueladu kekë wïnduönë, ku lɔ thieny muk.” Go Juda ke gäm en, ku tɔ̈ɔ̈c ke yen, go liac.

¹⁹ Na wën, ke tiiŋ ë wënde ë jäl, ku le lupɔɔkɛn ke tiiŋ abaar tääu në yekɔ̈u.

²⁰ Na ɣɔn, ke Juda ë tɔ amɛthɔ̈k yïnë mɛ̈thë Ɣaira raan de Adulam, bïï lɔ gäm tik, ke bï ka cï döŋ në tik lɔ bɛ̈ɛ̈i. Go Ɣaira tik kɛ̈n ayök.

²¹ Go kɔc luɔp në Anaim an, “Akɔɔrröör wään rɛ̈ɛ̈r kueer eenë nu ë nou?” Gokï puɔ̈k nɔm en an, “Acïn akɔɔrröör cï kɔn rëër në kueer kɔ̈u eenë ë caŋɣɔn.”

²² Go Ɣaira yenɔm puɔ̈k Juda, ku le lɛ̈k en an, “Tik akɛ̈n lɔ yök. Acï kɔc ke wut lueel an, cïn akɔɔrröör cï kɔn nu ëtɛ̈ɛ̈n.”

²³ Go Juda lueel an, “Päl ë nöm kake, acä kɔɔr luɔi bï kɔc wo geet gup. Acä tuöc amɛthɔ̈k, ku aa kaar nɔn bän tik gäm kake, ku yeka kɛ̈në lɔ yökë.”

²⁴ Na wään, aa thök ë pɛ̈i kadiäk, ke lëkë Juda an, “Tamar, tiiŋ ë wëndu ë rɔt tɔ ye akɔɔrröör, ka acï liaac në kɛɛide yic.” Ago Juda lueel an, “Bɛ̈ɛ̈ikï bei, ku nyuɔpkï në mac abï thou.”

²⁵ Na wën, abïï yë bei, ke tɔ thok lɔ tëde wurɔ̈ɔ̈rde an, “Yɛn liac në mɛnh ë raan de ee kakë. Tïŋ keek ee kake ŋa? Guela kekë wiën, ku thieec.”

²⁶ Go Juda ke tïŋ ku lueel an, “Ade nɔm gök ë yic, ee yɛn de guöp awäc. Akɛ̈n tɔ nööm ë Cila wëndï tɔ ye tik.” Juda akën bɛ̈n bɛ tɔ̈c ke yen anande.

²⁷ Na ɣɔn, acï aköölkɛn ke dhiëth thök, ke yök nɔn kɔɔr en dhiëth acuek.

²⁸ Na wën aa rɔ̈p, ke mɛnh tök ë ɣöök ë ciin bei. Go madhiëth ë ruök ciin alanh thith, ku lueel an, “Mɛnhë yen akɔnë dhiëëth tueŋ.

²⁹ Go yeciin bɛ rat thïn. Na wën, ke mänhë kɔnë dhiëëth tueŋ.” Ago madhiëth lueel an, “Yen luɔiduön cïn kueerdu thuur ka ke yï bɔ̈ bei.” Ago cäk rin an Peredh (Thuur biic).

³⁰ Ku jɔ mänhë lɔ̈ɔ̈k dhiëëth ciëën ke de ciin alath, go cäk an Dhira.