Cäk 37 - JAM DE NHIALIC 2011

Jothep kekë Mïthëkɔcken

¹ Ago Jakop lɔ̈ɔ̈k ŋoot ke rɛ̈ɛ̈r piny ë Kanaan, të ɣɔn rëërë wun thïn.

² Ku kënë alɛɛŋ ë baai de Jakop. Na ɣɔn, aacï run ke Jothep aa thiëër ku dhorou, ke ye lɔ tïït ë thök kekë mïth ke wun. Wɛ̈ɛ̈t ke Bila kekë Dhilpa, diäär lïïm ke wun. Ago Jothep karɛc ye mïthëkɔcken looi roor lɔ guiëër wun.

³ Ku Jakop aa nhiaar Jothep awär mïthke kedhie, në luɔi ë dhiëëth ë Jakop en ke cï dhiɔp. Ago luöi lupɔ bɛ̈ɛ̈r de guöp kïït läk aläl.

⁴ Na ɣɔn, aa tïŋ ë mïthëkɔcken en luɔi nhiɛɛr ë wuönden Jothep awär keek, ke ke man Jothep guöp. Ku cïkï ee bɛ lëëŋ në yen.

⁵ Na ɣɔn ë kööl tök, ke Jothep ë nyuöth ë nïnic wakɔ̈u. Na wën, aguïïr nyuöth mïthëkɔcken, ke jɔkï maan guöp awär wään tueŋ.

⁶ Alëk keek an, “Piɛŋkï nyuöthdiën ë nyuöth ɛn kï:

⁷ Yɛn aa nyuöth ke wo dut agamɔ domic. Na wën, ke nɔmdiën ë duööt ë ciëp ë thar piny. Go nïïm ë duötkï keek bɛ̈n ku geeukï piny. Ku gutkï kenïïm piny në yenɔm.”

⁸ Ago mïthëkɔcken en luɔp an, “Ye tak, bä ya bɛ̈nyda ku cieŋ wo?” Agokï jɔ maan guöp arëët, në këde nyuöthde ku në këde kë lueel ë nyuöth në biäkden.

⁹ Go Jothep bɛ nyuöth ku lëk keek an, “Yɛn ë bɛ nyuöth ë nyuöth däŋ: ke akɔ̈l ke pɛɛi, ku kuɛl kathiëër ku tök ë ke gut kenïïm piny në yanɔm.”

¹⁰ Ku be nyuöth guiëër wun ayadäŋ. Go wun en rɛ̈lic, ku lëk en an, “Ee nyuöth ëŋö ee kënë? Ayï yɛn wokë moor buk wonïïm guöt piny në yïnɔm ayadäŋ?”

¹¹ Go mïthëkɔcken en jɔ til arëët, ku muk wuönden jam në yepiɔ̈u.

Jothep Aɣɛɛcë ku Leerë Rip

¹² Na ɣɔn ë kööl tök, mïthëkɔcken ë Jothep aake cï thökken lɔ tiit në Cekem këc.

¹³ Go Jakop lɛ̈k Jothep an, “Bä da, ë yï tuɔɔc Cekem të tiit ë mïthëkɔckun thök.” Go Jothep puk nɔm en an, “Apiɛth, acïn kë gäu ɛn.”

¹⁴ Ago wun lɛ̈k en an, “Lɔ tïŋ mïthëkɔckun na piɔlkï gup, ayï thök, ku lɔ bä ciëën, bä bɛ̈n lɛ̈k ɛn.” Go wun en jɔ tuɔɔc Cekem ke nu në wak ë Ɣebronic. Go Jothep ɣet Cekem.

¹⁵ Go raan tök en yök ke cï yëëm rooric, go luɔp an, “Eeŋö kɔɔr eenë?”

¹⁶ Go puk nɔm an, “Yɛn kɔɔr mïthëkɔckuɔn tit thök eenë. Duɛ̈ɛ̈rë ke nyuöth ɛn të nu kek thïn?”

¹⁷ Go raan lɛ̈k en an, “Aya tak acïk jäl, acä piŋ ke luelkï an, ‘Jëlku lokku Dothan.’ ” Go Jothep mïthëkɔcken biɔɔth cök. Go ke lɔ yök Dothan.

¹⁸ Na wën, ke ke tïŋ Jothep wei. Ku të wën ŋoot en ke kën guɔ ɣëët, ke kiirkï nɔn bï kek en nɔ̈k.

¹⁹ Agokï lɛ̈k röt kapäc an, “Raan ee cool ke nyuöthë yekï bɔ̈ yë.

²⁰ Bä näkku, ku deenyku në yinh tökic në ee yïth cï dëuwë yiic. Ku abuk lueel nɔn cï läi ye nɔ̈k. Ku buk nyuöthde jɔ tïŋ bï bɛ̈n ke eeŋö?”

²¹ Na wën, aa piŋ Ruben ë kënë, ke bɔ̈, bï bɛ̈n luäk bei në kecin, lueel an, “Acuku bï nɔ̈k,

²² cuɛtku ë yithic ë jɔ̈ɔ̈ric eenë, ku nyiëëŋku piny ëtɛ̈ɛ̈n, ku duku jak guöp.” Ruben aluel ee jamë në biäk bï yen en luäk bei në kecin. Ku tɔ dɔ̈k enɔm wun.

²³ Na wën, aa ɣëët Jothep ë mïthëkɔcken lɔ̈m, ke ke yööt lupɔdɛn lɛ̈ɛ̈k ë kïïtë bei në yekɔ̈u.

²⁴ Ku nömkï lek cuat ë yithic. Ku yith acï dëu, ka cïnic pïïu.

²⁵ Na wën, aŋootkï ke ke cäm, ke ke go kɔc ke Yicmiɛl tïŋ abɔ̈ në thɔ̈rɔ̈lken. Ku thɔ̈rɔ̈lken aake ɣɛ̈ɛ̈c adök, ku wɛ̈ɛ̈l cɔl baam ku mer, aa leerkï keek paan ë Rip.

²⁶ Ago Juda lɛ̈k mïthëkɔcken an, “Eeŋö buk jɔ yök të le wok mɛnhkënëda nɔ̈k, ku tɔku riɛmde kuëër wei baaŋ?

²⁷ Aŋuɛ̈ɛ̈n ë luɔi ɣöc wok en kɔc ke Yicmiɛl, ku cuku jak guöp. Yen ee mɛnhkënëda, ku ye riɛ̈ɛ̈ŋda.” Ago mïthëkɔcken ye gam thok.

²⁸ Na wën, atëk kɔc ke Midian ee käŋ lɔ ɣaac, ke ke mïït Jothep bei në yithic, ku ɣöckï kɔc ke Yicmiɛl në atek kathiërrou. Agokï Jothep lɛɛr paan ë Rip.

²⁹ Na wën, apuk Ruben enɔm, ku yök Jothep ke liu në yithic, ke diu piɔ̈u ku ret lupɔɔke yiic.

³⁰ Ku puk enɔm të nu mïthëkɔcken. Le lɛ̈k keek an, “Cɔ̈k a nɔm ë nou, meth aliu ëtɛ̈ɛ̈n?”

³¹ Agokï thɔ̈k nɔ̈k, ku nömkï lupɔ de Jothep, lutkï ë riɛmic.

³² Ku yïnkï lupɔ lɛ̈ɛ̈k ë kïït wuönden, ku lek lɛ̈k en an, “Lupɔ yë aa kuanyku. Tïŋ na ye lupɔ de wëndu, ku na cie yen.”

³³ Ago caath guöp ku lueel an, “Ee yen lupɔ de mɛnhdï guöpde, ade län cï ye dhiɛl yök roor, ku cuet këde. Jothep wëndï acïï läi ë tɛm ë thïïm.”

³⁴ Ago Jakop piɔ̈u riääk arëët, ku ret lupɔɔke yiic, ku tɛ̈ɛ̈u lupɔɔ ke cual ë yekɔ̈u. Ku dhiëëu wënde në nïn juëc arëët.

³⁵ Ago wɛ̈ɛ̈tke guëër ë yelɔ̈ɔ̈m, ayï duetke, bïk bɛ̈n luk piɔ̈u. Go kɛ̈n gam në luk. Go lueel an, “Yɛn bï mɛnhdï dhiëëu agut të bän lɔ paan ë thuɔɔu.” Ku ŋoot ke dhiëëu Jothep wënde.

³⁶ Ago kɔc ke Midian Jothep lɔ ɣaac paan ë Rip, lek ɣɔ̈c Pɔtipar, bɛ̈ny ee melik de Rip tiit.