Cäk 34 - JAM DE NHIALIC 2011

Wïn ë Dina

¹ Na kööl tök, ke Dina, nyan ë Liya ɣɔn cï dhiëth Jakop acï duet ke wut kɛ̈ny.

² Na wën, atïŋ ë Cekem en, wën ë Ɣamor, bɛ̈ny de ee wunë, raan ë Ɣib, ke lɔ ku dɔm, ku wit piny, ku nööm ë nɔ̈m ayäär.

³ Cekem acïï Dina nyan ë Jakop diir, go nhiaar guöp ku thut.

⁴ Ku lëk ë Cekem Ɣamor wun an, “Thiëkë yɛn ee nyanë.”

⁵ Go Jakop piŋ luɔi cï Dina nyande wit, ku mïthke aake ŋoot roor në thökiic, ku ɣɔ̈k. Go rëër ke cïn kë looi, abï mïthke kɔn bɛ̈n.

⁶ Go Ɣamor wun Cekem, lɔ tëde Jakop, lek jam guiir.

⁷ Ago piny lɔ rɔ̈m ke wɛ̈ɛ̈t ke Jakop, ke ke bɔ̈ roor të wën cï kek thok piŋ. Aake cï piɔ̈ɔ̈th kuöc diu arëët në ayärdïït cïï Cekem luöi kɔc ke Yithriɛl. Në biäk cï yen nyan ë Jakop wiëët. Ku keek acïkï karɛc cït ee kakë ee kɔɔr nɔn bï ke looi.

⁸ Ago Ɣamor lɛ̈k Jakop an, “Wëndiën Cekem acïï nyandu diir aläl. Ku ënɔɔnë, yïn läŋ an tɔ thiɛɛk.

⁹ Thiëkku röt, gämkï mïthkuɔ duetkun, ku thiakkï duetkuɔ.

¹⁰ Ku rɛ̈ɛ̈rë eenë we wook. Piäätë alɔ të kɔɔr në yïpiɔ̈u, ku ye kuëëth thïn cït man ë kë kɔɔr ë piɔ̈ndu, ku nɔ̈më rɔt piny.”

¹¹ Ku bëër ë Cekem lëk Jakop kekë mïthke an, “Dhuɛ̈ŋkï ya guöp, ku alɔ kë cak lueel, abä gäm week.

¹² Luɛlkï kuën ë thiëëk, na cak tuöc abïï ciët ŋö, abä ke tääu piny ayï athek, cït man ë kë cak lueel. Luɔi bï duet aa tiiŋdï yetök yen akaar.”

¹³ Ago mïth ke Jakop Cekem math kekë Ɣamor wun, në luɔi cï Cekem Dina nyankënëden yɔ̈ɔ̈r.

¹⁴ Ku lëkkï keek an, “Kë cït ee kënë acuku duëër looi. Wo cï nyankënëda duëër gäm raan kënë cueel. Kënë aduëër aa yäär në wogup.

¹⁵ Töŋ duëër wok mat në week kï: të ta wek röt cuel wek röör wedhie cït man ë wok.

¹⁶ Yen aduëër wok we jɔ gäm duetkuɔ, ku nömku duetkun, ku joku rëër në week ë tök ke wo ye kɔc tök.

¹⁷ Na kɛ̈nkï këda gam, ku kɛ̈nkï röt tɔ cuel, ke wo bï nyankënëda jɔt ku jëlku.”

¹⁸ Go jamden Ɣamor miët piɔ̈u kekë Cekem wënde.

¹⁹ Ago dhuŋ tui kɛ̈n gääu në luɔɔi de ee kakë, në biäk ë cï duet en diir arëët. Ku Cekem yen aaye raan töŋ ë nhiɛɛr ë kɔc ke baaiden guöp kedhie arëët.

²⁰ Ago Ɣamor lɔ në kal ë wunden thok kekë Cekem wënde, lek jam në kɔc ke wut, luelkï an,

²¹ “Kɔc kë, ee kɔc piɛth në wook, takkï keek piäät ë pinyë yic në wook. Ku bïk aa kuëëth thïn cït man ë kë kɔɔrkï. Tïŋ piny alääu, aduëër ke lɛɛr. Ke wo bï duetken aa thiaak, ku thiakkï duetkuɔ.

²² Ku töŋ bï kɔc kë tɔ gam rëër në wook, abuk aa kɔc tök kï: Në kek an tɔku röt cuel wok röör wodhie, cït man ë kek.

²³ Ku ɣɔ̈kken, ayï këriëëcden ëbɛ̈n, cïkï bï ya kakuɔ wadäŋ? Töŋ buk looi ee luɔi bï wok gam, ku tɔku keek rɛ̈ɛ̈r në wook.”

²⁴ Ago kɔc ke wut këde Ɣamor kekë Cekem wënde gam kedhie, ku tɔkï röt cuel.

²⁵ Na ɣɔn, në kööl ye akööl diäk, akööl ë cueel ë ke, ku cï tëtöök jɔ but, ke wɛ̈ɛ̈t ke Jakop kaarou, yï Thimion kekë Lebi, wɛ̈ɛ̈t ke man Dina, ë ke nöm abätɛ̈ɛ̈uken ë määth. Ku lek wutic ke cïn raan cï ke tïŋ. Ku lek röör nɔ̈k kedhie.

²⁶ Arëk abïk yï Ɣamor mat thïn kekë Cekem wënde. Ku bïïkï Dina bei ɣön ë Cekem, ku jëlkï.

²⁷ Na wën, acïk kɔc nɔ̈k, ke mïth ke Jakop kɔ̈kë ë ke löök wut yakic, në luɔi ë cï nyankënëden yɔ̈ɔ̈r.

²⁸ Nömkï thök ke wut, ku ɣɔ̈k, ku këriëëcdɛn ë nu wut, ayï ka nu roor.

²⁹ Nömkï kaken kedhie, mïth ku diäär, ku ka nu ë ɣöötiic kedhie, peckï keek abï ciɛ̈n tök.

³⁰ Ago Jakop lɛ̈k Thimion kekë Lebi an, “Wek ë ya yiɛ̈n guöp wël. Wek ë rinkï riɔ̈ɔ̈k tëde kɔc de piny, kɔc ke Kanaan ku kɔc ke Peridh. Tiɛ̈ŋkï, wok lik. Na lek keyiic määt, ku yïnkï wo tɔŋ. Cïkï ya bï riɔ̈ɔ̈r nyin wokë baaidï ëbɛ̈n?”

³¹ Agokï puk nɔm an, “Ka yen duëër nyankënëda jɔ looi cït man ë akɔɔrröör?”