Cäk 3 - JAM DE NHIALIC 2011

Wïïk de Raan ë Këracic

¹ Ku kërac aaye län pel awär läi roor kedhie, läi cï Bɛ̈nydït Nhialic cak. Ago kërac tik luɔp an, “Ë yic, cï Nhialic lɛ̈k week an cäkï bï cam në mïth ke tiim ke Dom kedhie?”

² Ago tik puk nɔm an, “Ei, wok bï mïth ke tiim ke Dom cam kedhie.”

³ Aa lueel ë Nhialic an, “Wek cïï bï cam në mïth ke tim töŋ nu ë Domic cil, na cakaa jäk duökï jak. Na lak cam, we bï thou.”

⁴ Go kërac puɔ̈k nɔm tik an, “Kënë acie yic, wek cï bï thou.

⁵ Aa lueel ë Nhialic aya, në luɔi ŋic En en an të la wek ë timë cam, wek bï ciët Nhialic. Wek bï këpiɛth ŋic ku ŋiɛckï kërac.”

⁶ Ago tik tim tïŋ ke läk, tim röŋ ë mïthke në cäm, ku ye tim bï kɔc tɔ ŋic käŋ. Ago meth tet ku ciɛm, ku gëm biäk monyde. Go monyde cam ayadäŋ.

⁷ Ku ee tëthiin ë ciɛm kek en në, acïk käŋ bɛ̈n guɔ ŋic, agokï guɔ yök nɔn ciɛth kek ë kekɔ̈ɔ̈th. Gokï yïth ke tim cɔl ŋaap määtiic ku kum kek röt.

⁸ Na ɣɔn thëën, acïk Bɛ̈nydït Nhialic bɛ̈n piŋ ke cath domic, gokï röt thiaan në Yen në tiimiic.

⁹ Go Bɛ̈nydït Nhialic moc cɔɔl an, “Nu yë ë nou?”

¹⁰ Go moc puk nɔm an, “Yïn cä piŋ ke Yï cï bɛ̈n domic, guɔ guöp riɔ̈ɔ̈c, guɔ rɔt thiaan në Yïn, në luɔi cath ɛn në yakɔ̈u.”

¹¹ Go Nhialic ë luɔp an, “Eeŋa lëk ë yïn nɔn ciɛth yïn në yïk kɔ̈u? Cï mïth ke tim wään cän jaai cam?”

¹² Go raan puk nɔm an, “Tiiŋ wään yiënë yɛn, an bï ya bɛ̈n kuïïl nyin, acï ya gäm mɛnh ë tim, guɔ cam.”

¹³ Go Bɛ̈nydït Nhialic lɛ̈k tik an, “Eeŋö looi yïn ë kënë?” Go tik puk nɔm an, “Kërac yen aa mɛth ɛn, guɔ cam.”

Nhialic ë kuöm lueel

¹⁴ Go Bɛ̈nydït Nhialic lɛ̈k kërac an, “Në luɔi cïn ë kënë looi, yïn cï cieen yïtök në läi yiic kedhie. Yïn bï ya mol në yïyɔu, ku yïn bï ya cam në abuui në pïïrdu yic ëbɛ̈n.

¹⁵ Ku Yɛn bï ater tääu në kaamdun we tik, ku në kaam de kɔ̈thku ku kɔ̈thke. Abäk keek aa kac ŋur, ku abïk week aa yup nïïm.”

¹⁶ Ku lëk ë Bɛ̈nydït Nhialic tik an, “Yɛn bï arɛɛmdu ŋuak nyin të dhiëëth yïn. Yïn bï ya dhiëth ke yï rem guöp, ku yïn bï ya ŋoot ke yï kɔɔr monydu, ku abï yïn aa cieŋ.”

¹⁷ Ku lëk ë Bɛ̈nydït Nhialic moc an, “Në luɔi cïn jam ë tiiŋdu piŋ, ku cam mïth ke tim wään cän jaai, an, cï cam, piny abä jɔ cieen nɔm në këdu. Në pïïrdu yic ëbɛ̈n, yïn bï këcamdu aa yök të cïn luɔi dït kɔn looi.

¹⁸ Kuɔɔth ku athil abïk aa cil në këdu, ku yïn bï ya cam në ka ye puur.

¹⁹ Ku yïn bï ya cam në abiɔ̈r ë yïnyin, agut të bïn yïnɔm puɔ̈k abuui yic. Yïn aa cuɛ̈ɛ̈c abuui, ku yïn bï yïnɔm bɛ puɔ̈k abuuidu yic.”

²⁰ Ago Adam tiiŋde cäk rin an Ɣawa, (ku kë lueel ë rinkë ee pïïr) në luɔi yen man raan ëbɛ̈n.

²¹ Ago Bɛ̈nydït Nhialic Adam kum kɔ̈u në dɛ̈l kekë Ɣawa tiiŋde.

Adam kekë Ɣawa acï ke ciëëc bei Dom de Eden

²² Go Bɛ̈nydït Nhialic lueel në yepiɔ̈u an, “Tïŋ ënɔɔnë, raan ë jɔ ciët wook, ë käŋ ŋic, kapiɛth ku karɛc. Acä bï bɛ tɔ cam mɛnh ë tim ë pïïr, ke cï bï bɛ pïïr aɣet athɛɛr.”

²³ Ago Bɛ̈nydït Nhialic raan ciëëc bei dom de Eden, ku jɔ tɔ puur abuui ɣɔn cuëëc En en.

²⁴ Nhialic ë raan bɛ̈n ciɛɛc biic, ku tɛ̈ɛ̈u cerubiim domde thok baŋ të lɔ aköl amiäk, në abätɛ̈ɛ̈u riau. Abätɛ̈ɛ̈u wïïl röt ke ke cï rɛ̈ɛ̈r tëtök, ke ke bï tim de pïïr tiit, ke cïn kë bï bɛ̈n në yelɔ̈ɔ̈m.