Cäk 23 - JAM DE NHIALIC 2011

Thon ë Thara ku ɣööc ë raŋ

¹ Run ke Thara aake cï ya bɔt ku thiërrou ku dhorou.

² Ku jɔ bɛ̈n thou në Ɣebron, në piny de Kanaan. Ago Abraɣam piɔ̈u dhiau aläl në thonde, ku dhiëëu.

³ Go Abraɣam jäl ë tiiŋde lɔ̈ɔ̈m le tëde kɔc ke Ɣit. Na wën, ke lëk keek an,

⁴ “Yɛn ee raan lei, ku yɛn rɛ̈ɛ̈r në weyiic eenë. Ɣɔ̈ckï ya piny thiinakäŋ, bän tiiŋdï tɔ̈ɔ̈u thïn.”

⁵ Agokï puɔ̈k nɔm en an,

⁶ “Piŋ kë lëkku yïn, bɛ̈ny. Yïn yok tïŋ ke yï ye bɛ̈ny dït në woyiic eenë. Tɔ̈u tiiŋdu në raŋ piɛthduön cï yï diir. Acïn raan töŋ bï yï pɛ̈n raŋde në luɔi bï yïn tiiŋdu tɔ̈ɔ̈u thïn.”

⁷ Ago Abraɣam yenɔm guöt piny në Ɣit nïïm, kɔc de piny.

⁸ Ku puk Abraɣam nɔm keek an, “Na kaarkï nɔn bän tiiŋdï tɔ̈ɔ̈u eenë, ke we yöök Eperon wën ë Dhoɣar,

⁹ bï ya ɣɔ̈c raŋ ë Makepiila, raŋ thiääk ke domde. Takï guïïr ɛn kuënde ëbɛ̈n në wenïïm eenë, ke bä tɔ ye raŋ bï kɔc aa tɔ̈ɔ̈u.”

¹⁰ Ku Eperon guöpde aa rɛ̈ɛ̈r në kɔc ke Ɣit yiic, në ë të cï kɔc kenïïm mat ë kal de wut thokë. Go bɛ̈ɛ̈r ke piŋ kɔc kedhie, lueel an,

¹¹ “Piŋ bɛ̈ny, dom abä gäm yïn ëbɛ̈n kekë raŋ nu në yelɔ̈ɔ̈m ëtök, ke yï bï tiiŋdu tɔ̈ɔ̈u.”

¹² Go Abraɣam enɔm guöt piny në kenïïm,

¹³ ku lëk Eperon në kɔc nïïm an, “Na bäk ɛn gam thok, ke kuën ë dom abä tääu piny ëbɛ̈n, ku gämkï yɛn dom tääu ɛn tiiŋdï thïn ëtɛ̈ɛ̈n.”

¹⁴ Ago Eperon puɔ̈k nɔm en an,

¹⁵ “Bɛ̈ny, kuën ë piny ee bot kaŋuan ë wëëth tei. Ku ee kënë eeŋödɛn cök nɔm në kaamda wo yïn? Tɔ̈u tiiŋdu.”

¹⁶ Go Abraɣam gam, ku kuën Eperon wëu wën cï lueel në kɔc nïïm. Bot kaŋuan ë wëëth, cït man ë wëu ye kɔc ɣööc.

¹⁷ Yen luɔi ë jɔ dom de Eperon bɛ̈n aa këde Abraɣam ka ëbɛ̈n, dom nu në Makepiila në Mameer kɔ̈u të lɔ aköl amiäk, mɛt keyiic kedhie, raŋ, ku tiim nu domic, ayï piny nu në dom këc.

¹⁸ Ku acï bɛ̈n ŋic në raan ë Ɣit ëbɛ̈n, raan ë cï lɔ në kal ë pänydït thok, nɔn cï piny jɔ aa këde Abraɣam në amatdenic.

¹⁹ Ago Abraɣam Thara tiiŋde tɔ̈ɔ̈u në raŋ tɔ̈u ë kökic në dom nu ë Makepiila të lɔ aköl amiäk në Mameer kɔ̈u piny ë Kanaan.

²⁰ Go dom ɣɔn ë ye këde raan ë Ɣit kekë raŋ nu thïn, acïk bɛ̈n aa kake Abraɣam. Go Abraɣam ye tɔ ye raŋ yen kɔc tɔ̈ɔ̈u thïn.