Cäk 22 - JAM DE NHIALIC 2011

Thɛɛm de Abraɣam

¹ Na wën, alɔ aköölkë thök, ke Nhialic ë them Abraɣam, cɔɔl an, “Abraɣam!” Ago Abraɣam gam, lueel an, “Yakï.”

² Go Nhialic lɛ̈k en an, “Jɔt Yithaak, wënduön töŋ nhiaar aläl. Ku lɔ piny ë Moria në kuur nɔm ëtɛ̈ɛ̈n, të bä lɔ nyuöth yïn, ku näkë Yɛn ke ee miɔ̈cdï.”

³ Ago Abraɣam pääc ɣɔn amiäk aduduur, ku tem tiim bï ke miaac lɔ nyop, ku dut mulde kɔ̈u. Ku jɔt Yithaak wënde kekë wɛ̈ɛ̈t lïïmke kaarou, ku jëlkï ke ke lɔ të cï Nhialic lɛ̈k en.

⁴ Ku në kööl ye akööl diäk, ke Abraɣam ë tïŋ të ë lëk ë Nhialic en ke ŋoot ke mec.

⁵ Go Abraɣam lɛ̈k lïïmke an, “Dɔ̈ŋkï eenë në muul, ku yɛn wokë meth, wok bï lɔ tueŋ buk Nhialic lɔ lam ëtɛ̈ɛ̈n, ku wok bï lɔ bɛ̈n eenë.

⁶ Ago Abraɣam tiim ke miaac jat ë Yithaak kët. Ku muk Abraɣam mac kekë lem, ku lekï kaarou.

⁷ Ago Yithaak wun cɔɔl an, “Wää.” Go wun gam, ku lueel an, “Yakï mɛnhdï.” Go Yithaak en luɔp an, “Yïn de nɔm mac, ku tiim, ku na nyɔɔŋ lɔ nɔ̈k nu ënou?”

⁸ Ago Abraɣam puk nɔm an, “Nhialic abï nyɔk guik yetök mɛnhdï.” Ku barkï yic.

⁹ Na wën, aa lek ɣet të cï Nhialic lɛ̈k en, ke Abraɣam ë yïk yïk ëtɛ̈ɛ̈n. Ku guiir tiim në yenɔm, ku dut Yithaak wënde, ku tɛ̈ɛ̈c ë tiim kɔ̈ɔ̈th nhial.

¹⁰ Ku kuɛny Abraɣam lem an teem wënde röl.

¹¹ Go tunynhial ë Bɛ̈nydït cööt ke nu nhial, lueel an, “Abraɣam, Abraɣam!” Go Abraɣam gam, ku lueel an, “Yakï eenë.”

¹² Go tunynhial lɛ̈k en an, “Du meth jak, ku du de kë luɔiyë yen. Acä ŋic ëgɔk ënɔɔnë, nɔn ee yïn Nhialic riëëu, në luɔi kën yïn wënduön töŋë pɛ̈n Bɛ̈nydït.”

¹³ Ago Abraɣam yenyin jat nhial, go gök ë nyɔɔŋ amääl tïŋ në yekɔ̈u ciëën ke cï rɔk dɔm tuŋ. Go Abraɣam e lɔ diëc, ku bï bɛ̈n teem röl në nyin ë wënde yic, ku nyop ke ye miɔ̈cde.

¹⁴ Ago Abraɣam ëtɛ̈ɛ̈n cäk an, “Bɛ̈nydït abï aa miööc.” Ku agut cï ee köölë aye kɔc lueel an, “Në kuur ë Bɛ̈nydït nɔm abï miööc.”

¹⁵ Ago tunynhial ë Bɛ̈nydït Abraɣam nyɔk ë cɔɔl en en ke nu nhial,

¹⁶ lueel an, “Acï Bɛ̈nydït lueel an, Yɛn ë kuëëŋ në rinkï yatök në luɔi kën yïn Ɛn pɛ̈n wënduön töŋë.

¹⁷ Yïn bä thieei aläl, mïthku abä keek ŋuak nyïïn, ka bïk juëc cït man ë kuɛl nhial, ku cïtkï liɛɛt ë wɛ̈ɛ̈r yɔu. Ku mïthku abïk kɔc de kek ater aa tiaam.

¹⁸ Juöör ke piny nɔm kedhie abïk athiɛɛi aa lip tëde Yɛn, an thiɛɛi keek cït man cän mïthku thieei. Në luɔi cïn löŋdï döt.”

¹⁹ Ago Abraɣam yenɔm dɔ̈k lïïmke, ku jëlkï kedhie ke ke lɔ Biirceba, ku lɔ Abraɣam rëër ëtɛ̈ɛ̈n.

Käu de Naɣor

²⁰ Ago Abraɣam ë bɛ̈n ŋic nɔn cï Milka Naɣor mänhë dhiëth mïth kabɛ̈t:

²¹ Udh ee yen ee kɛ̈ɛ̈i, ku lɔ Budh mänhë, ku Kemiɛl wun Aram,

²² ku Kithed, ku Ɣadho, ku Pildac, ku Jidilap, ku Bethwɛl,

²³ wun Rebeka. Milka acï Naɣor mänhë Abraɣam dhiëth ee mïthkë kabɛ̈t.

²⁴ Ku Ruma, tiiŋ mɔ̈th de Naɣor aya acï ye dhiëth Tiba, ku Gaɣam, ku Teiɣac, ku Maaka.