Cäk 2 - JAM DE NHIALIC 2011

¹ Ku tënhial kekë piny, aake cï jɔ thök në cäk në ka tɔ̈u thïn kedhie.

² Ku në kööl ë dhorou, Nhialic acï jɔ thök në luɔidɛn ë cäk ëbɛ̈n ku jɔ lɔ̈ŋ thïn.

³ Go Nhialic kööl ë dhorou tɔ ye kööl piɛɛth lɔ yum. Go thieei, ku jɔ tɔ ye kööl ɣeric, në luɔi yen kööldɛn ë lɔ̈ŋ En thïn, në luɔidɛn ë ciɛk En piny nɔm.

⁴ Yen luɔi ë ciɛk ë tënhial kekë piny ka, të ɣɔn ciɛkë keek. Ku kë ë loi rɔt kï, të ɣɔn ciɛk ë Bɛ̈nydït Nhialic tënhial kekë piny.

Dom de Eden

⁵ Acïn wɛ̈ɛ̈l ë cï kɔn cil ë piny nɔm, ku acïn dom ë cï kɔn puur. Në luɔi ë kën ë Bɛ̈nydït Nhialic deŋ kɔn tɔ tuëny piny nɔm. Ku acïn raan ë nu raan ë cï piny kɔn com nɔm.

⁶ Ee ruu yen ë ye rɔt jat nhial piny, ku yoor piny nɔm ëbɛ̈n.

⁷ Ago Bɛ̈nydït Nhialic raan cuëëc në tiɔɔm ë piny ku mony cï cuëëc ku jɔ kuöth wum yom ë pïïr, go raan jɔ aa këpïïr.

⁸ Ago Bɛ̈nydït Nhialic dom looi ëtɛ̈ɛ̈n në Eden, në biäk të lɔ aköl amiäk. Ku jɔ raandɛn cï cuëëc tääu thïn ëtɛ̈ɛ̈n.

⁹ Ago Bɛ̈nydït Nhialic tiim piɛth ëbɛ̈n tɔ cil Domic, tiim ee kɔc diir. Ku tɔ ke lok në mïth piɛth. Ku tim de pïïr aa tɔ̈u Domic cil ayadäŋ, ku tim de ŋïny ë käŋ, kapiɛth ku karɛc.

¹⁰ Nyin ë ye Dom tɔ dëk në pïïu aa tëk në Eden, ku acï yenɔm lɔ tek tueŋ në nyïïn kaŋuan.

¹¹ Ku nyin tueŋ acɔl Picon. Aa ye tëëk në piny cɔl Ɣabila, piny de yic adhääp,

¹² ku adhäm de ee pinyë apiɛth, ku wɛ̈ɛ̈l ŋïr, ayï kur lɛ̈k ke onik ayadäŋ.

¹³ Ku nyin ye nyïïn rou acɔl Giɣon. Aa ye tëëk piny cɔl Kuc.

¹⁴ Ku nyin ye nyïïn diäk acɔl Tigri, ee tëëk piny cɔl Athiriya kɔ̈u baŋ të lɔ aköl amiäk. Ku nyin ye nyïïn ŋuan acɔl Yuparat.

¹⁵ Ago Bɛ̈nydït Nhialic raan tääu Dom de Eden, ke bï ya tiit ku puur.

¹⁶ Ku lëk ë Bɛ̈nydït Nhialic raan an, “Yïn bï ya cam në mïth ke tiim ke dom kedhie cït man ë kë kɔɔr.

¹⁷ Ku tim de ŋïny de käŋ, kapiɛth ku karɛc yetök. Yen acïn mïthke bï cam, ku kööl le yïn e cam, yïn bï thou.”

¹⁸ Ku be Bɛ̈nydït Nhialic lueel an, “Acïï piɛth luɔi bï raan rëër yetök, abä luöi raandɛn bï yen aa kuïïl nyin, ke bï yen aa kuɔny.”

¹⁹ Go Bɛ̈nydït Nhialic tiɔp nööm piny, ku cuëëc läi roor kedhie, ku diɛt kedhie, ku yïn ke raan bï ke bɛ̈n cäk rin. Yen luɔidɛn ë yök kek rin ka.

²⁰ Ago raan läi cäk rin kedhie, läi roor ku läi wut, ku ciëk diɛt kedhie ayadäŋ. Ku acïn töŋ ë piɛth në keyiic, kë rɔ̈ŋ ke luɔi duëër en raan kuïïl nyin, ku kony en.

²¹ Ago Bɛ̈nydït Nhialic raan tɔ ruɛ̈i nïïn aläl, ku jɔ lɔ̈mdɛn tök nööm, ku boot tëde në rïïŋ.

²² Ku cuëëc ë Bɛ̈nydït Nhialic tik në lɔ̈m ë moc, ku yïn moc.

²³ Ago moc lueel an, “Ënɔɔnë, yɛn ë raan cït ɛn jɔ yök, Yuɔɔm ë nöm në yomkï yiic, ku rïïŋ ë nöm në rïïŋdï yic.” Rinke acɔl keek “tik” në luɔi ë nööm ë yen në moc guöp.

²⁴ Yen abï moc wun aa puɔ̈l ku pɛ̈l man, ku mɛ̈t ke tiiŋde, agokï aa guöp tök keek kaarou.

²⁵ Ku moc kekë tik aake cïn kɔ̈ɔ̈th lupɔɔ, ku aake cïï gup ee riɔ̈ɔ̈c.