Cäk 18 - JAM DE NHIALIC 2011

Abraɣam Athönë Meth

¹ Go Bɛ̈nydït tuöl tëde Abraɣam në tiim ke ɣok ke Mameeriic, ke rɛ̈ɛ̈r në paanyde thok, të wën cï akɔ̈l tuöc.

² Na wën, ke jɔt yenyin nhial, go röör kadiäk tïŋ në yenɔm tueŋ. Go rɔt gap nhial, ku loor kenïïm ke riŋ. Ku le yenɔm guöt piny në kenïïm arëk abï piny jak në yenɔm.

³ Ku lueel an, “Bänykï, na riëëukï yaguöp, ke wek cï lïmdun bï winythok.

⁴ Wek bä lɔ yiɛ̈n pïïu, bäk wecök bɛ̈n waak. Ku takï röt lɔ̈ŋ ë tim thar.

⁵ Ku yɛn bï këcam thiinë lɔ bɛ̈ɛ̈i, ke bï we gäm riɛl, ku bäk jɔ baaric. Yɛn ë piɔ̈u miɛt në luɔi cä wek bɛ̈n ɣön ë lïmdun, ku në biäk de ee kënë jakï ya tɔ luui week.” Agokï gam ku lëkkï yen an, “Loi cït man ë kë cï lueel.”

⁶ Go Abraɣam yecök gɔp ke lɔ ë paanyic të nu Thara, ku lëk en an, “Nöm aɣaar në aɣar piɛɛthë yic aruööth. Ku wuur, ku thal kuïn.”

⁷ Ku kɔt Abraɣam ke lɔ ë luny ë ɣɔ̈kic, le ku dɔm dan läk ke cuai, ku gëm lïm. Go lïm en guɔ kiëët ëthiäu.

⁸ Ago Abraɣam miɔk nööm, ku nööm guer, ku rïïŋ de dɔu cï thaal apiɛth, ku yïn ke keek. Ku kɛ̈ɛ̈c në kelɔ̈m ë tim thar wën ciëm kek.

⁹ Agokï Abraɣam luɔp an, “Thara tiiŋdu nu ë nou?” Go lueel an, “Thara anu ë paanyic.”

¹⁰ Go Bɛ̈nydït lueel an, “Yɛn bï yanɔm dɔ̈k eenë ëlë yaak wälë alë ruöön, ku Thara tiiŋdu abï nɔm dɛ mɛwä.” Ku Thara aa rɛ̈ɛ̈r në paany thok në yekɔ̈u ciëën ke pïŋ.

¹¹ Ku Abraɣam kekë Thara aake cï dhiɔp arëët. Ku riɛm de dhiëth acï kɔ̈ɔ̈c tëde Thara.

¹² Go Thara rɔt dɔl yetök, ku lueel an, “Duɛ̈ɛ̈r nïn bɛ lëu wo moc ke ya cï dhiɔp cït ee mandiënë? Ku monydï ë dhiɔp ayadäŋ.”

¹³ Go Bɛ̈nydït lɛ̈k Abraɣam an, “Eeŋö dɔl ë Thara, ku lueel an, ‘Ë yic bä bɛ dhiëth ë meth ke ya cï dhiɔp cït ë mandiënë?’

¹⁴ De kë duëër Bɛ̈nydït dhal? Në të cä lueelë, Yɛn bï bɛ̈n të nu wek ëlë yaak wälë, ku Thara abï dɛ mɛwä.”

¹⁵ Ku Thara acï riɔ̈ɔ̈c go jai an, “Yɛn kën dɔl.” Go Bɛ̈nydït lueel an, “Yïn ë dɔl.”

Abraɣam akony Thɔdom

¹⁶ Go kɔc jäl ëtɛ̈ɛ̈n, lekï të duëër kek Thɔdom woi. Go Abraɣam lɔ ke keek, le ke ruac cök kueer.

¹⁷ Ago Bɛ̈nydït lueel an, “Bä kë kaar bä looi thiaan në Abraɣam.

¹⁸ Ku Abraɣam abï ya jur dïït ril. Ku juöör ke piny nɔm kedhie abä keek thieei në këde.

¹⁹ Ei, në luɔi cän e lɔc nɔn bï yen mïthke yɔ̈ɔ̈k, ku yöök baaide, luɔi bï kek kueer ë Bɛ̈nydït lɔ̈ɔ̈k döt në yecök. Në luɔi bï kek kake piathëpiɔ̈u aa looi, ku loikï yith ë cieŋ. Ke Bɛ̈nydït ë bï Abraɣam yiɛ̈n kë cï thɔ̈n en.”

²⁰ Go Bɛ̈nydït lɛ̈k Abraɣam an, “Në biäk cï kiɛɛu de Thɔdom dït kekë Gomoora, ku cï karɛcken dït arëët,

²¹ Yɛn lɔ la tïŋ, nɔn cïk ka cä piŋ looi ë yic kedhie. Ku nɔn kënkï ke looi abä lɔ ŋic.”

²² Agokï röt thuöör Thɔdom, ku dɔ̈ŋ Abraɣam ke kääc në Bɛ̈nydït nɔm.

²³ Ago Abraɣam rɔt cuöt Bɛ̈nydït, ku lueel an, “Ë yic bä kɔc cïn gup awɛ̈ɛ̈c riɔ̈ɔ̈k në kɔc de gup awɛ̈ɛ̈c ëtök?

²⁴ Na de kɔc cïn gup awɛ̈ɛ̈c kathiërdhïc wutic, bä wut riɔ̈ɔ̈k, cï wut bï puɔ̈l në këden?

²⁵ Aŋiɛc ëgɔk nɔn cïn kɔc cïn gup awäc bï nɔ̈k në kɔc de gup awɛ̈ɛ̈c. Acïï rɔt duëër lëu! Yïn cï kë cït ee kënë duëër looi. Ku na lɔ looi, ke kɔc cïn gup awɛ̈ɛ̈c, abï keek jɔ kuum në kɔc de gup awɛ̈ɛ̈c ëtök. Ku kënë acïï rɔt duëër lëu. Raan ee löŋ guiir ë pinynɔm ëbɛ̈n cï bï looi në yith?”

²⁶ Go Bɛ̈nydït lueel an, “Na la kɔc cïn gup awɛ̈ɛ̈c yök kathiërdhïc ë Thɔdom, ke wut ëbɛ̈n abä puɔ̈l në këden.”

²⁷ Ago Abraɣam puk nɔm an, “Pälë yɛn nɔm riɛldï, nɔm riɛl cän jam cuuth wo Yïn, Bɛ̈nydït. Yɛn ee raan tei, ku yɛn cïn nɔm yic bä dɛ kë luɛɛl wo Yïn.

²⁸ Ku na ee kɔc kathiërŋuan ku dhïc kek cïn gup awäc, ku dɛ̈ɛ̈kkï thiërdhïc në kɔc kadhïc, bä wut riɔ̈ɔ̈k në luɔi cï kɔc kadhïc dak?” Go Bɛ̈nydït puk nɔm an, “Wut acä bï riɔ̈ɔ̈k të lan kɔc cïn gup awɛ̈ɛ̈c yök thïn kathiërŋuan ku dhïc.”

²⁹ Ago Abraɣam bɛ ŋoot ke jam, lueel an, “Ku na le lɔ aa kɔc kathiërŋuan tei?” Go Bɛ̈nydït puk nɔm an, “Në biäk de ee kɔckë kathiërŋuan, wut acä bï riɔ̈ɔ̈k.”

³⁰ Ago Abraɣam lueel an, “Du piɔ̈u bï diu wekë yɛn Bɛ̈nydït, yɛn bï ŋoot ke ya jam. Na le ee kɔc kathiërdiäk kek lɔ yök?” Go puk nɔm an, “Acä bï riɔ̈ɔ̈k të lan kɔc kathiërdiäk yök.”

³¹ Ago Abraɣam lueel an, “Pälë ya nɔm riɛldï Bɛ̈nydït, nɔm riɛl cän jam cuuth wo Yïn. Na lɔ thiërrou yök?” Go puk nɔm an, “Yɛn cï wut bï riɔ̈ɔ̈k të lan kɔc kathiërrou yök thïn.”

³² Ago Abraɣam lueel an, “Du piɔ̈u bï diu wekë yɛn, Bɛ̈nydït. Ee töŋë yen bä lueel yetök. Ku na lɔ kɔc kathiëër yök?” Go lueel an, “Yɛn cï wut bï riɔ̈ɔ̈k të lan kɔc kathiëër yök thïn.”

³³ Na wën, aa lɔ Bɛ̈nydït thök në jam kekë Abraɣam, ke jël ku puk Abraɣam enɔm baaide.