Cäk 17 - JAM DE NHIALIC 2011

Cuɛ̈l ee Kïn ë Mät

¹ Ɣɔn cï run ke Abram aa thiërdhoŋuan ku dhoŋuan, ke Nhialic Awärjäŋ ë tul tëde yen, ku lëk en an, “Yɛn ee Nhialic Awärjäŋ lëu këriëëc ëbɛ̈n, ye kë cä lɛ̈k yïn piŋ, ku ye yic looi ë cieŋ.

² Yɛn bï mät looi wo yïn, ku yïn bä gäm mïth juëc aläl.”

³ Ago Abram yenɔm guöt piny, ku jiɛk piny në yenɔm. Go Nhialic lɛ̈k en an,

⁴ “Ënɔɔnë, Yɛn loi mändï wo yïn. Yïn bï ya wun juöör juëc ëbɛ̈n.

⁵ Rinku acï ke bï bɛ cɔl Abram, abï ke cɔl Abraɣam, në luɔi ta Yɛn yïn ee wun juöör juëc ëbɛ̈n.

⁶ Ku yïn bä tɔ kɛɛr aläl, ku gäm yïn juöör juëc. Ku kɔ̈k në keyiic abïk aa meliik. Yïn bï nɔm dɛ mïth juëc aläl ka bïk aa juöör.

⁷ “Ku Yɛn bï thöndiën cä lɛ̈k yïn döt. Ku dɔ̈t wokë mïthku në rɛm bï lɔ̈ɔ̈k bɛ̈n, ke mät ë cïï kɔ̈u bï tɛɛm aɣet athɛɛr. Ku Yɛn bï ya Nhialicdu, ku ya Nhialic de mïthkuön bï lɔ̈ɔ̈k tɔ̈u në yïcök.”

⁸ Ku yïn bä gäm ee pinyë, wekë mïthkuön bï lɔ̈ɔ̈k tɔ̈u në yïcök. Piny ciɛŋkï, piny de Kanaan ëbɛ̈n, abï ya pinydun anande. Ku Yɛn bï ya Nhialicden aɣet athɛɛr.

⁹ Go Nhialic lɛ̈k Abraɣam an, “Ku yïn ayadäŋ, abä dhil gam nɔn bä wek mät döt në Yɛn wekë mïthku wedhie, ku rɛm bï lɔ̈ɔ̈k bɛ̈n.

¹⁰ Ku mändï kï, män bäk döt: Moc ëbɛ̈n në weyiic, abï ya cueel.

¹¹ Wek bï keek aa cueel në guöp në dɛ̈l nu tueŋ, ku yen abï ya kïn ë män nu ë kaamdï wo week.

¹² Gɔl cï ënɔɔnë ku le tueŋ, mɛwä ëbɛ̈n abï ya cueel ke nïnke ë ke ye bɛ̈t, nïn ë dhiëëthë ye. Ayï lïïm ë dhiëth ke ɣöndu, ku nɔn ee kek lïïm ë ɣɔc në wëuku tëde jur däŋ.

¹³ Raan ëbɛ̈n, abï dhiɛl cueel. Ku kënë abï ya kïn ë guöp, ke bï mändï wo week aa nyuɔɔth, nɔn ee yen kë cïï kɔ̈u bï tɛɛm aɣet athɛɛr.

¹⁴ Ku mony kënë cueel acï bï ya raan de kɔckï yiic, në luɔi kën en mändï döt.”

¹⁵ Ago Nhialic lɛ̈k Abraɣam an, “Tharai tiiŋdu, acï bï bɛ ŋoot ke ye cɔl Tharai, rinke gɔl ënɔɔnë ku le tueŋ, abï ya cɔl Thara.

¹⁶ Abä thieei, ku ta dhiëth yïn mɛwä. Abä thieei ku ta ye man juöör juëc. Ku abï dɛ meliik në mïthke yiic.”

¹⁷ Ago Abraɣam yenɔm guöt piny abïï piny jak në yenɔm, ku dɔl, ku lueel në yepiɔ̈u an, “Duëërë meth dhiëëth në mony dïït cï run aa bɔt? Ku Thara dïït cï run aa thiërdhoŋuan, duëër bɛ dhiëth ë meth?”

¹⁸ Go Abraɣam lɛ̈k Nhialic an, “Eeŋö cïn Yicmiɛl tɔ lak kakï?”

¹⁹ Ago Nhialic lueel an, “Ei, Thara tiiŋdu abï yï dhiëth mɛwä, ku abä cäk rin an Yithaak. Yɛn bï mändï döt wokë yen, ku mïthkɛn bï lɔ̈ɔ̈k tɔ̈u në yecök aɣet athɛɛr. Mät acïï kɔ̈u bï tɛɛm aɣet athɛɛr.

²⁰ Ku këduön cï lueel në biäk de Yicmiɛl acä piŋ. Abä thieei aya, ku abä tɔ kɛɛr aläl. Ku abä tɔ ye wun bäny kathiëër ku rou, ku ta ye jur dït.

²¹ Ku Yɛn bï mät looi wokë Yithaak, wënduön bï Thara dhiëth yïn wälë, alë ruöön.”

²² Na wën, aacï Nhialic thök ë jam ke Abraɣam, ke nyiëëŋ Abraɣam piny.

²³ Ku në ee kööl man ë jiɛɛm ë Nhialic ke Abraɣam, Abraɣam ë Yicmiɛl wënde bɛ̈n cueel, ku cueel lïïmkɛn ë ɣɔɔc në wëu, ku cueel röör rɛ̈ɛ̈r në yen baai kedhie, cït man cï Nhialic e lueel.

²⁴ Abraɣam aaye run thiërdhoŋuan ku dhoŋuan ɣɔn cueel ë yen.

²⁵ Ku Yicmiɛl wënde, aaye run thiëër ku diäk ɣɔn cueel ë yen.

²⁶ Ku në ee kööl manë guöp, Abraɣam kekë Yicmiɛl wënde acï ke bɛ̈n cueel.

²⁷ Ayï röör rɛ̈ɛ̈r në yen, röör ë dhiëth ɣönde, ku kɔckɛn ë ɣɔɔc tëde kɔc kɔ̈k, acï keek bɛ̈n cueel në keek ëtök ayadäŋ.