Cäk 16 - JAM DE NHIALIC 2011

Ɣajer kekë Yicmiɛl

¹ Ku Tharai tiiŋ ë Abram acïn mɛnh ë cï dhiëëth. Ku ade nɔm nyan ë Rip cɔl Ɣajer, nyan ë lui ke yen baai ke ye lïmde.

² Ago Tharai lɛ̈k Abram an, “Ënɔɔnë, Bɛ̈nydït ë ya pɛ̈n dhiëth. Eeŋö cïn lɔ wekë Ɣajer nyan lïmdï? Abï ya dhil dhiëth meth.” Ago Abram jam ë Tharai gam.

³ Na ɣɔn, acï Abram run kathiëër thöl ke rɛ̈ɛ̈r piny ë Kanaan, ke Tharai tiiŋ ë Abram ë nöm Ɣajer lïmde, nyan ë Rip, ku gëm Abram monyde ke ye tik.

⁴ Ago Abram lɔ ɣöt kekë Ɣajer, go liac. Na wën, alɔ Ɣajer rɔt yök ke liac, ke ye Tharai guɔ woi ke biɔɔn guöp.

⁵ Ago Tharai lɛ̈k Abram an, “Kë yɔŋë Ɣajer ɛn acath ke yïn. Ee yɛn ë gëmë yïn, yɛn guöpdï. Ku nɔn ë yök en rɔt ke liac, ke cak luɔi yen awoi ke biɔn a guöp. Bɛ̈nydït Yen abï raan de nɔm yic tïŋ në woyiic, nɔn ee yïn ku nɔn ee yɛn.”

⁶ Ago Abram puɔ̈k nɔm Tharai an, “Nyan lïmdu arɛ̈ɛ̈r në riɛldu, luöiyë kë kɔɔr në yïpiɔ̈u.” Ago Tharai Ɣajer looi arac, go Ɣajer rɔt kual.

⁷ Ago tunynhial ë Bɛ̈nydït ye yök në nyin ë pïïu nɔm ë jɔ̈ɔ̈ric; nyin nu në kueer lɔ wun cɔl Cur kɔ̈u.

⁸ Ku lëk en an, “Ɣajer, nyan lïm de Tharai, bä ë nou ku lɔ ë nou?” Go Ɣajer puk nɔm an, “Yɛn kɔt në Tharai bɛ̈nydï.”

⁹ Go tunynhial ë Bɛ̈nydït lɛ̈k en an, “Dɔ̈kë yïnɔm en, ku tɔ rɔt ee lïmde.”

¹⁰ Ku be tunynhial ë Bɛ̈nydït lɛ̈k en an, “Yïn bä gäm mïth juëc aläl, ku acïn raan bï ke lëu në kuɛ̈n.”

¹¹ Ago tunynhial ë Bɛ̈nydït ë bɛ lɛ̈k en an, “Ënɔɔnë, yïn bï mɛwä dhiëëth, ku abä cäk an Yicmiɛl (ku ee rinkë në thoŋda aluelkï an acï Nhialic piŋ), në luɔi cï Bɛ̈nydït kiɛɛu de këtuc piŋ, këtuc cï yï dhal.

¹² Ku wëndu abï ciët mul roor në pïïrde yic. Abï cin aa nu në kɔc gup, ku kɔc abïk cin aa tɔ̈u në yeguöp ayadäŋ kedhie. Abï puɔ̈k ke kɔcke kedhie.”

¹³ Ago Ɣajer rɔt luɔp yetök an, “Cä Nhialic tïŋ ë yic, ku ŋuɔɔt ke ya pïïr?” Go Bɛ̈nydït ë jam ke yen cäk an, “Nhialic ee daai.”

¹⁴ Yen aa ciëk ë kɔc yinh nu në kaam de Kadec kekë Bered an, “Yinh de Raan Töŋ Pïïr, Raan ee yɛn tïŋ.”

¹⁵ Ago Ɣajer mɛnh ë Abram dhiëëth. Go Abram wëndɛn cï Ɣajer dhiëëth cäk an Yicmiɛl.

¹⁶ Ku run ke Abram aake ye thiërbɛ̈t ku dhetem, ɣɔn dhiëëth ë Ɣajer Yicmiɛl.