Cäk 15 - JAM DE NHIALIC 2011

Män ë Nhialic ke Abram

¹ Ku ëtɛ̈ɛ̈n, Abram ë jam de Bɛ̈nydït bɛ̈n piŋ në nyuöthic ke lueel an, “Abram du riɔ̈c, yɛn ee köndu. Yïn bä gël në kërac, ku yïn bä cuööt apiɛth.”

² Go Abram puk nɔm an, “Ee këpiɛɛth cït ŋö bïn a cuööt Bɛ̈nydït Nhialic, ke ya cïn nɔm mïth? Ku Eliedher, raan de Damathko yen abï kakï lɔ̈ɔ̈k lak yetök.

³ Yïn kën a gäm mïth, ee lïm tök në lïïmkï yiic yen abï kakï lɔ̈ɔ̈k lak.”

⁴ Go Abram Bɛ̈nydït piŋ ke ŋoot ke jam ke yen, lueel an, “Eliedher lïmdu, acïï kaku bï lɔ̈ɔ̈k lak. Wën ë nɔmdu, yen abï kaku lɔ̈ɔ̈k lak.”

⁵ Go Bɛ̈nydït lɛɛr biic, ku lëk en an, “Woi nhial, ku kuen kuɛl kedhie, na bä ke lëu ë kuɛ̈n. Luɔi bï mïthku juëc ka cït man ë kek.”

⁶ Ago Abram gämdɛn gɛm en Bɛ̈nydït döt, go Bɛ̈nydït piɔ̈u miɛt kekë yen, në biäk de gämde, go tɔ ye piathëpiɔ̈u.

⁷ Ago Bɛ̈nydït lɛ̈k Abram an, “Ee Yɛn aye Bɛ̈nydït ë jɔt yïn ë Ur, piny ë Babilon, bä yï bɛ̈n gäm ee pinyë bï ya këdu.”

⁸ Go Abram lop an, “Ku bä ŋic adï, Bɛ̈nydït Nhialic, nɔn bï en aa këdï?”

⁹ Go Bɛ̈nydït puk nɔm an, “Yiɛ̈në Yɛn dɔu, ku ŋuɛn bou, ku ŋuɛn amääl ke ke ye run diäk kedhie. Ku yiɛ̈nkï Yɛn guuk ku ajël ë guuk.”

¹⁰ Go Abram dɔu yiɛ̈n Nhialic, ku yïn thök. Nɛ̈k ke ku pɛk keyiic, ku ee biäk tök tääu ë biäk däŋë kɔ̈u, ke ke kuɛɛr kɔ̈ɔ̈th. Ku akën guök pakiic.

¹¹ Cuɔɔr aaye rïïŋ nyuɔ̈c, go Abram ke aa tuur.

¹² Na wën, alɔ akɔ̈l piny, ke Abram ë ruɛ̈i nïïn. Ku bïï mɔ̈ɔ̈th dïït lɔcɔ̈t, go Abram riɔ̈ɔ̈c aläl.

¹³ Go Bɛ̈nydït lɛ̈k Abram an, “Mïthku abïk rëër ke ke ye kamaan në piny lei. Ku abïk aa lïïm. Ku abï keek aa luööi arac në bot kaŋuan ë run.

¹⁴ Ku jur bï ke lɔ lïïmë, abä luöi këtuc thok. Ku të le mïthku jäl në ee piny lɛɛnë, abïk jäl ke ke kueth arëët në kakɛn bïk jɔt.

¹⁵ Ku yïn guöpdu, yïn bï thou ë läŋ ke runku ë ke rɔ̈ŋ.

¹⁶ Ku abïk kenïïm dɔ̈k eenë, në rem ye rɛm ŋuan. Në luɔi cän kɔc ke Amor bï cuɔp wei, agut të bï kek awäny dïït rɔ̈ŋ ke këtuc thok kɔn looi.”

¹⁷ Na wën, acï akɔ̈l lɔ piny, ku cï piny cuɔl, ke tööny tol, ku lɔ̈k ë many ë kuthyui ɣer ë pak ë ke go tïc ëthiäu, ku retkï rïŋiic.

¹⁸ Ago Bɛ̈nydït mät looi kekë Abram ee köölë, lueel ë Bɛ̈nydït an, “Pinyë acä gäm mïthku, gɔl në aken ë Rip agut cï wɛ̈ɛ̈r ë Yuparat.

¹⁹ Piny de kɔc ke Ken, ku Kenidh, ku Kadmon,

²⁰ ku Ɣit, ku Peridh, ku Repayim,

²¹ ku Amor, ku Kanaan, ku Girgac ku Jebuth.”