Cäk 14 - JAM DE NHIALIC 2011

Abram aluäk Lɔt

¹ Meliik kaŋuan, yï Amrapel melik de Babilonia, ku Ariok melik de Elathar, ku Kedoloma melik de Eelam, ku Tidal melik de Goyim aake

² cï gɔ̈m në meliik kɔ̈k kadhïc, yï Bira melik de Thɔdom, kekë Birca melik de Gomoora, ku Cinap melik de Adma, ku Cemeber melik de Dheboyim, ku melik de Bila (yen aye Dhowar).

³ Ku meliikë kadhïc, aake cï kecin mat ëtök në Wɛ̈ɛ̈r Amilɔ yɔu.

⁴ Ku aake cieŋ ë Kedoloma keek në run kathiëër ku rou. Ku në ruöön ye run thiëër ku diäk, acïk bɛ̈n gɔ̈th në yen.

⁵ Ku në ruöön ye run thiëër ku ŋuan, Kedoloma kekë kɔckɛn mät në yen acïk bɛ̈n bɛ̈n në kɔckɛn ke tɔŋ. Agokï jur cɔl Repaim lɔ tiaam në wun cɔl Aceteroth Kanayim, ku tiamkï jur cɔl Dhudhim në wun cɔl Ɣam, ku tiamkï jur cɔl Eemim në riaaŋ ë wun cɔl Kiriathaim,

⁶ ku tiamkï kɔc ke Ɣor në kur ke Edomiic agut cï Elaparan në jɔ̈ɔ̈r thok.

⁷ Agokï kenïïm puɔ̈k Kadec, ku rumkï piny de kɔc ke Amalek, tiamkï kɔc ke Amor rɛ̈ɛ̈r ë Ɣadhadhon Tama.

⁸ Ago meliŋ de Thɔdom, kekë meliŋ de Gomoora, ku meliŋ de Adma, ku meliŋ de Dheboyim, ku meliŋ de Bila rem de tɔŋden lɛɛr tɔŋ, në Wɛ̈ɛ̈r Amilɔ yɔu, lek gɔ̈m

⁹ në kɔc ke Kedoloma, melik de Eelam, ku Tidal melik de Goyim, ku Amrapel melik de Babilon, ku Ariok melik de Elathar. Meliik kadhïc agɔ̈mkï në meliik kaŋuan.

¹⁰ Ku wɛ̈ɛ̈r aa thiäŋ yɔu ke kë lɔ duäkduäk cɔl tar. Na wën, aa kɔt meliŋ de Thɔdom, kekë meliŋ de Gomoora në tɔŋ, acïk bɛ̈n wïïk thïn. Ku meliik kɔ̈kë kadiäk acïk bɛ̈n kat ke ke lɔ ë kur nïïm.

¹¹ Ku meliikë kaŋuan, acïk käŋ bɛ̈n jɔt ëbɛ̈n në Thɔdom ku Gomoora, agut cï kacaam ku jëlkï.

¹² Ku Lɔt, wën ë mänhë Abram aa rɛ̈ɛ̈r ë Thɔdom. Agokï jɔt kekë kake kedhie.

¹³ Ago raan tök rɔt kual le lëk Abram, raan ë Ɣeberuu rɛ̈ɛ̈r ke thiääk ke tiim ke ɣok ke Mameer, raan de Amor. Ku Mameer kekë mïthëkɔcken, yï Ecekol ku Aner aake mät në Abram.

¹⁴ Na wën, aa piŋ Abram luɔi cï wën ë mänhë jɔt, ke cɔl kɔckɛn ke tɔŋ, kɔc nu në yen. Aake ye bot kadiäk ku thiëër ku bɛ̈t kedhie. Agokï meliikë kaŋuan kuany cök agut cï Dan.

¹⁵ Ku ëtɛ̈ɛ̈n, ë kɔcke bɛ̈n lɔ tɛ̈ɛ̈kiic, ku geeukï kɔc piny, ku mookkï ke piny wakɔ̈u, agokï ke tiaam. Ku copkï ke agut cï Koba nu të lɔ rut në Damathko.

¹⁶ Ago Lɔt, wën ë mänhë puk nɔm kekë këriëëcde ëbɛ̈n, ayï diäärke ku kɔc kɔ̈k ë cï dɔm.

Melikidhedek athiei Abram

¹⁷ Na wën, apuk Abram enɔm të wën cï en melik Kedoloma lɔ tiaam, kekë meliik kɔ̈kë, ke loor ë meliŋ de Thɔdom enɔm në bäny de melikic.

¹⁸ Ago Melikidhedek, meliŋ de Thalem, ku ye bɛ̈ny dïït de kake Nhialic dïït nhial, këcam kekë mɔ̈u yiɛ̈n Abram.

¹⁹ Ku thieei Abram lueel an, “Athiɛɛi de Nhialic dïït nhial, Raan ë cak tënhial ku piny abï tɔ̈u ke yïn.

²⁰ Lec Nhialic dïït nhial, Raan ë tɔ yï tiam kɔc ë gɔ̈m në yïn.” Go Abram kë ye käŋ thiëër në kakɛn cï peeciic ëbɛ̈n gäm Melikidhedek.

²¹ Ago melik de Thɔdom lɛ̈k Abram an, “Nöm kakuön cï peec tɔŋ kedhie, ku puɔ̈kë yanɔm kɔckï.”

²² Ago Abram puɔ̈k nɔm en an, “Yɛn ë kuëëŋ në Bɛ̈nydït Nhialic dïït nhial nɔm, Aciëŋ ë cak tënhial ku piny,

²³ nɔn cän alanh ë kɔ̈c bï nööm, na cakaa aliprɔ, ku nɔn yen dɛ̈l thiin rukë waar thok, acä bï nööm. Në luɔi cïn e bï lueel an, ‘Ee yɛn ë tɔ Abram kueth.’

²⁴ Acïn kë bä nɔ̈m rɔt. Ee ka cï kɔckï nööm kek abä gam kapäc. Ku tɔ kɔc mät në yɛn nöm biäkden, yï Aner kekë Ecekol ku Mameer.”