Cäk 13 - JAM DE NHIALIC 2011

Puɔ̈k de Abram kekë Lɔt

¹ Go Abram jäl piny ë Rip ke lɔ Piny ë Kanaan thar ciëën ya, të lɔ wöuwic kekë tiiŋde, ku kakɛn nu tëde keek kedhie. Ku Lɔt aa cath ke keek.

² Abram aa kueth aläl, ade nɔm luny ë thök ku ɣɔ̈k, ku ade nɔm ateek, ku adhɛ̈p juëc.

³ Ago bɛ kuëëth ëtɛ̈ɛ̈n ke lɔ Bethel. Go ɣet ë kaam de Bethel kekë Ai, tëdɛn wään tueŋ kɔn en paanyde piäät thïn.

⁴ Të wään tueŋ cï en Bɛ̈nydït kɔn yiëk yïk thïn. Ago Abram Bɛ̈nydït jɔ lɔ̈ŋ ëtɛ̈ɛ̈n.

⁵ Ku Lɔt ɣɔn ciɛth en ke Abram, ade nɔm luny ë thök, ku luny ë ɣɔ̈k ayadäŋ. Ku ade baai, ku kɔc luui en.

⁶ Ku piny akën ke bɛ̈n lɛɛr kedhie kaarou, në rëër tëtök, në luɔi ë juëc ë kaken aläl.

⁷ Wël aake ye röt looi në kaam ë kɔc ee ɣɔ̈k ke Abram tiit, në kɔc ee ɣɔ̈k ke Lɔt tiit. Ku kɔc ke Kanaan ayï kɔc ke Peridh aake ŋoot ke ke rɛ̈ɛ̈r në pinyë yic.

⁸ Ago Abram lɛ̈k Lɔt an, “Yɛn wo yïn, wok ee kɔc tök. Kɔc luui yɛn, ku kɔc luui yïn acïkï rɔ̈ŋ bïk aa gɔ̈th ë röt.

⁹ Kënë ëbɛ̈n alɔ, ee piny lääu, puɔ̈kku. Lɔc të kɔɔr në yïpiɔ̈u. Na cï lɔ baŋ cam, ke yɛn bï lɔ ë baŋ cuëc, ku na ee baŋ cuëc yen cï lɔc, ke yɛn bï lɔ në baŋ cam.”

¹⁰ Go Lɔt yenyin jat nhial, go wak ë Jordan tïŋ ke ee yic dɛ pïïu juëc ë cieŋ, cït man ë dom de Bɛ̈nydït, ku cït piny ë Rip të lɔ wun cɔl Dhowar. Ku ëtɛ̈ɛ̈n, ee të ɣɔn ŋoot ë Bɛ̈nydït ke kën Thɔdom guɔ riɔ̈ɔ̈k kekë Gomoora.

¹¹ Ago Lɔt rɔt lɔ̈c wak ë Jordan ëbɛ̈n, ku jël ke cök enɔm të lɔ aköl amiäk. Yen puɔ̈k ë puɔ̈k kek ka.

¹² Ago Abram piɔ̈ɔ̈t piny ë Kanaan, ku le Lɔt piɔ̈ɔ̈t në kɛm ke pɛ̈ɛ̈nydït në wakic. Ku ee jɔ kuëëth agut cï Thɔdom.

¹³ Ku kɔc ke Thɔdom aake cï göök dït ke karɛc wäc Bɛ̈nydït.

Abram ë kuɛɛth Ɣebron

¹⁴ Ɣɔn cï Lɔt puɔ̈k ke Abram, ke lëk ë Bɛ̈nydït Abram an, “Jatë yïnyin nhial, ku caathë piny nɔm ëbɛ̈n në yïnyin ke yï kääc ë tëduönë. Woi të lɔ rut, ku të lɔ wöuwic, ku woi të lɔ aköl amiäk, ku të lɔ aköl athɛ̈i.

¹⁵ Yïn bä gäm piny lɔ tïŋ ëbɛ̈n, wekë mïthkuön bï lɔ̈ɔ̈k tɔ̈u në yïcök aɣet athɛɛr.

¹⁶ Yïn bä gäm mɛnh cït abuui. Na de raan lëu en bï abuui kueen, ka bï mïthku jɔ lëu në kuɛ̈n.

¹⁷ Ku ënɔɔnë, lɔ caathë piny ëbɛ̈n, në luɔi bän e gäm yïn.”

¹⁸ Go Abram kuëëth, ku le nyuc të thiääk ke tiim ke ɣok ke Mameer, në piny cɔl Ɣebron. Ku yïk Bɛ̈nydït yïk ëtɛ̈ɛ̈n.