Cäk 12 - JAM DE NHIALIC 2011

Nhialic acɔl Abram

¹ Go Bɛ̈nydït lɛ̈k Abram an, “Jël pinydun, nyääŋë mïthëkɔckun piny, ku nyääŋë baai de wuur piny, ku lɔ paan bä lɔ nyuöth yïn.

² Yïn bä gäm mïth juëc. Ku abïk aa jur dït. Ku yïn bä thieei, ku rinku abä ke tɔ ŋic ë kɔc juëc. Ku yïn bä tɔ ya athiɛɛi.

³ Kɔc ee yï thieei, abä keek aa thieei. Ku kɔc ee yï cieen, abä keek aa cieen. Ku juöör ke piny nɔm, abä keek thieei në yïyic.”

⁴ Ago Abram jäl, cït man cï Bɛ̈nydït e lɛ̈k en. Go Lɔt jäl ke yen. Ku Abram aaye run thiërdhorou ku dhïc, wään jël en ë Ɣaran.

⁵ Ago Abram Tharai tiiŋde jɔt, kekë Lɔt wën ë mänhë, ku kaken kedhie, ku kɔc lui në yen ë Ɣaran, ku jëlkï lek piny ë Kanaan. Na wën, aa lek ɣet piny ë Kanaan,

⁶ acï Abram bɛ̈n baaric të nu tim de ɣok de Mameer, në piny de Cekem. Ku kɔc ke Kanaan aake ŋoot ke ke cieŋ ee pinyë.

⁷ Go Bɛ̈nydït bɛ̈n tëde Abram, ku lëk en an, “Piny bä gäm mïthku kï.” Ago Abram Bɛ̈nydïït cï tïc tëde yen yiëk yïk.

⁸ Ku jɔ bɛ̈n kuëëth ke lɔ piny ë kuur, piny nu wun cɔl Bethel kɔ̈u të lɔ aköl amiäk. Ku piëët paanyde në kaam de Bethel kekë wun cɔl Ai, ke Bethel ë nu baŋ të lɔ aköl athɛ̈i, ku Ai ë baŋ të lɔ aköl amiäk. Go Abram Bɛ̈nydït yiëk yïk ëtɛ̈ɛ̈n, ku lɛm.

⁹ Ku jɔ Abram bɛ baaric ke cath ke ye lɔ̈ŋ kueer, abï ɣet piny ë Kanaan thar ciëën ya, të lɔ wöuwic.

Abram anu Paan ë Rip

¹⁰ Ku ëtɛ̈ɛ̈n, cɔŋ dït aa nu piny ë Kanaan, go Abram baaric ke lɔ paan ë Rip, le yök ke rɛ̈ɛ̈r ëtɛ̈ɛ̈n, në luɔi ë dïït ë cɔk aläl.

¹¹ Na wën, ale thiɔ̈k ke Rip, ke lëk Tharai tiiŋde, an, “Aŋiɛc nɔn yïn tiiŋ läk aläl.

¹² Të le kɔc ke Rip yï tïŋ, abïk ŋic nɔn yïn tiiŋdï, ku abïk ɛn nɔ̈k ku pälkï yïn.

¹³ Ka yïn ye lɛ̈k keek nɔn yïn nyankäi, ke ke bï ya ŋiëc looi në biäkdu, ku acïkï ya bï bɛ nɔ̈k në këdu.”

¹⁴ Na wën, acï Abram ɣet paan ë Rip, ke kɔc ke Rip ë ke tïŋ Tharai ke ye tiiŋ läk aläl.

¹⁵ Na wën, ale bäny nu ë melik ë Rip cök ye tïŋ, ke löckï melik ë Rip. Gokï tik lɛɛr ɣön ë melik.

¹⁶ Ku melik ë Abram bɛ̈n nyuööc apiɛth në biäk de Tharai. Go Abram gäm luny ë thök, ku ɣɔ̈k, ku mul, ku thɔ̈rɔ̈l, ku lïïm röör ku diäär.

¹⁷ Ago Bɛ̈nydït melik de Rip jieth piɔ̈u, kekë baaide në jɔɔk tuc thook, jɔɔk ë cï tuöc keek në këde Tharai, tiiŋ de Abram.

¹⁸ Go melik Abram cɔɔl, ku lëk en an, “Eeŋö ë kërɛɛc cï luöi yɛnë? Eeŋö kën yïn e lɛ̈k ɛn nɔn yen tiiŋdu?

¹⁹ Eeŋö lueel yïn en an ee nyankui, ku tɔ nääm ke ye tiiŋdï? Ku ënɔɔnë, ŋö tiiŋdu kï, nöm këdu, ku jälkï we yen.”

²⁰ Ku lëk ë melik kɔcke nɔn ruɛc kek Abram cök. Agokï ruac cök kueer kekë tiiŋde, ku kakɛn nu tëde keek.