Cäk 11 - JAM DE NHIALIC 2011

Ɣön bɛ̈ɛ̈r ë Babilon

¹ Piny nɔm ëbɛ̈n, aa de thoŋ tök. Ku kɔc aake ye jam ë jam tök.

² Na ɣɔn, acïk kuɛɛth të lɔ aköl amiäk, ke ke yök riaaŋ cï rɔt rai ke kït nɔm në Babilonia. Agokï piɔ̈ɔ̈t thïn ëtɛ̈ɛ̈n.

³ Na wën, ke jɔkï lɛ̈k röt kapäc an, “Loiku thoop ku nyopku keek.” Agokï dɛ thom ë yïk, ku kë col nyin lɔ duäkduäk bï thoop muk.

⁴ Agokï lueel an, “Yïkku wundït, ku aloocdïït bäär, aloocdïït bï nɔm ɣet paannhial. Ku tɔku rinkuɔ tiëc, ke wo cï bï thiëi ë piny nɔm ëbɛ̈n.”

⁵ Ago Bɛ̈nydït bɛ̈n piny, bï wun dït bɛ̈n tïŋ kekë aloocdïït bäär, ɣön cïï kɔc ke piny nɔm yïk.

⁶ Go Bɛ̈nydït lueel an, “Kɔckë ayek tök, ku adekï nïïm thoŋ tök kedhie. Ku kë cïk gɔl në luɔi kï, acïn kë bï keek aa pɛ̈n kë cïk tak në luɔi.

⁷ Bäkï, ya lɔ piny, la thoŋden liääpic ke ke cïï bï bɛ piŋ ë röt.”

⁸ Go Bɛ̈nydït ke thiäi ë piny nɔm ëbɛ̈n, gokï yïŋ ë wun dït puɔ̈l.

⁹ Ku ëtɛ̈ɛ̈n, yen aa jɔ rin ke ee wunë bɛ̈n aa cɔɔl an Babel. Në luɔi cï Bɛ̈nydït thoŋ ë kɔc ke piny nɔm ëbɛ̈n liääpic ëtɛ̈ɛ̈n. Ku thiëi keek ë piny nɔm ëbɛ̈n.

Käu de Cem

¹⁰ Kakë ee käu de Cem. Na ɣɔn, aacï run ka amool aa rou, run ë thöök en, ku cï run ke Cem aa bɔt, ke Cem ë dhiëth wëndɛn Arapakad.

¹¹ Ku Cem ë bot kadhïc ë run bɛ̈n lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

¹² Ɣɔn cï run ke Arapakad aa thiërdiäk ku dhïc, ke dhiëth wëndɛn Cila.

¹³ Ku Arapakad ë bot kaŋuan ku diäŋ ë run bɛ̈n lɔ̈ɔ̈k thöl ke pïïr në dhiënh ë Cila cök, go mïth kɔ̈k dhiëëth, mïthwät ku duet.

¹⁴ Ɣɔn cï run ke Cila aa thiërdiäk, ke dhiëth wëndɛn Eber.

¹⁵ Ku Cila ë bot kaŋuan ku diäŋ ë run bɛ̈n lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

¹⁶ Ɣɔn cï run ke Eber aa thiërdiäk ku ŋuan, ke dhiëth wëndɛn Pelek.

¹⁷ Ku Eber ë bot kaŋuan ku thiërdiäŋ ë run bɛ̈n lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

¹⁸ Ɣɔn cï run ke Pelek aa thiërdiäk, ke dhiëth wëndɛn Riu.

¹⁹ Ku Pelek acï bot kaarou ku dhoŋuan ë run lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

²⁰ Ɣɔn cï run ke Riu aa thiërdiäk ku rou, ke dhiëth wëndɛn Thiruk.

²¹ Ku be Riu bot kaarou ku dhorou ë run thöl ke pïïr, go mïth kɔ̈k dhiëëth, mïthwät ku duet.

²² Ɣɔn cï run ke Thiruk aa thiërdiäk, ke dhiëth wëndɛn Naɣor.

²³ Ku Thiruk ë bot kaarou ë run lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

²⁴ Ɣɔn cï run ke Naɣor aa thiërrou ku dhoŋuan, ke dhiëth wëndɛn Tera.

²⁵ Ku Naɣor acï bɔt ë run ku thiëër ku dhoŋuan lɔ̈ɔ̈k thöl ke pïïr. Go mïth kɔ̈k dhiëëth, mïthwät ku duet.

²⁶ Ɣɔn cï run ke Tera aa thiërdhorou, ke dhiëth wëndɛn Abram kekë Naɣor ku Ɣaran.

Käu de Tera

²⁷ Kakë ee käu de Tera, wun Abram, kekë Naɣor ku Ɣaran. Ku Ɣaran ee yen ee wun Lɔt.

²⁸ Ku Ɣaran ëbɛ̈n guɔ thou ë Ur, wun man ë dhiëëthë ye thïn. Wun tɔ̈u piny ë Babilonia. Ku wun aa ŋoot ke pïïr.

²⁹ Ago Abram thiëëk kekë Naɣor. Tiiŋ ë Abram acɔl Tharai, ku tiiŋ ë Naɣor acɔl Milka. Ku Milka kekë Yithka ee duet ke Ɣaran.

³⁰ Ku Tharai aaye rol, acïn mɛnh ë cï dhiëëth.

³¹ Ago Tera jäl ë Ur kekë Abram wënde, ku Lɔt wën ë wëndɛn Ɣaran, ku lɔ Tharai tiiŋ de Abram wënde. Jëlkï piny ë Babilonia lek piny ë Kanaan. Na wën, aa lek ɣet wun cɔl Ɣaran, ke ke piäät thïn ëtɛ̈ɛ̈n.

³² Run ke Tera aake cï aa bot kaarou ku dhïc, ku jɔ bɛ̈n thou në Ɣaran ëtɛ̈ɛ̈n.