Bɛ̈n 9 - JAM DE NHIALIC 2011

Thon ë Läi

¹ Go Bɛ̈nydït lɛ̈k Mothe an, “Lɔ lɛ̈kë melik an acïï Bɛ̈nydït Nhialic de Ɣeberuu lueel an, ‘Tɔ kɔckï jäl lek A lam.

² Na lɔ ke bɛ pɛ̈n jäl,

³ wek bä luöi këtuc. Läikuön nu roor kedhie, abä keek tuöc jɔɔk, ɣɔ̈k ku thök, ku jöŋgöör, ku mul, ku thɔ̈rɔ̈l.

⁴ Ku akeu abä looi në kaam de ɣɔ̈k ke Yithriɛl në ɣɔ̈kkun. Acïn weŋ töŋ bï thou në ɣɔ̈k ke Yithriɛliic taitai.

⁵ Ee yɛn Bɛ̈nydït, miäk yen acä lɔc bän ɣɔ̈kkun nɔ̈k.’ ”

⁶ Na ɣɔn amiäk, ke Bɛ̈nydït ë näk läi ke kɔc ke Rip kedhie cït man cï Yen e lueel. Go ɣɔ̈k ke Rip thou kedhie, ku cïn weŋ töŋ thou në ɣɔ̈k ke Yithriɛliic.

⁷ Na wën, ke melik ë lop në kë cï rɔt looi. Go lɛ̈k en nɔn cïn en weŋ töŋ cï thou në ɣɔ̈k ke Yithriɛliic. Go ŋoot ke ril nɔm, ku cïï kɔc ke Yithriɛl päl ajäl.

Poor

⁸ Go Bɛ̈nydït lɛ̈k Mothe kekë Aron an, “Thiäŋkï wecin në ŋenh ë purun, ku ë weer ë Mothe ye nhial ë yomic në melik nɔm.

⁹ Abï piny ë Rip paatic ëbɛ̈n, ke ye ŋenh thiin lɔ mot. Ku abï kɔc poor gup ëbɛ̈n, ku tɔ rɔt ee tëtöök në kɔc gup, ayï läi.”

¹⁰ Gokï ŋeth nööm, ku lekï tëde melik. Na wën aa cïk lɔ, ke Mothe ë weer ŋeth nhial në melik nɔm. Go ŋeth kɔc poor gup, ku tɔ rɔt tɔ ee tëtöök në kɔc gup, ku ɣɔ̈k.

¹¹ Ku tït akënkï bɛ̈n bɛ bɛ̈n të nu Mothe thïn, në luɔi ë cï kek gup poor ayadäŋ në kɔc ke Rip ëtök.

¹² Ku Bɛ̈nydït ë melik bɛ̈n tɔ ril nɔm cït man wään cïï Yen e lueel an melik acïï jam de Mothe bï piŋ kekë Aron.

Deŋ ë Kɔɔi

¹³ Go Bɛ̈nydït bɛ lɛ̈k Mothe an, “Miäk aduduur, ke yï riɛɛl tëde melik. Lɔ lɛ̈kë yen an acïï Bɛ̈nydït Nhialic de Ɣeberuu lueel an, ‘Tɔ kɔckï jäl lek A lam.

¹⁴ Në ee kë ciëënë, acie bänyku, ku kɔcku kek bä luöi këtuc kapäc. Yïn guöpdu, yïn bä luöi këtuc ayadäŋ. Yen abï yïn en jɔ ŋic nɔn cïn en raan kït ke Yɛn në piny nɔm ëbɛ̈n.

¹⁵ Na ë Ya cï A ciin yɔɔk, ku ta yï dɔm ë jɔɔk wekë kɔcku, adï cäk nyïïn riäär ë taiwei ënɔɔnë.

¹⁶ Yïn aa ta pïïr në baŋ bän riɛldï nyuɔɔth, ke kɔc ke piny nɔm ë ke bï Ya ŋic kedhie.

¹⁷ Ke yï go yïnɔm ɣääc, ku pɛ̈në kɔckï jäl.

¹⁸ Miäk aköl wälë, deŋ dïït ë kɔɔi abä tɔ tueny, deŋ kën ë kɔc ke Rip kɔn tïŋ ë caaŋden.

¹⁹ Ka week, yɔ̈ɔ̈kkï tïït ke ɣɔ̈kkun tɔ̈u roor, takï ke tɛ̈ɛ̈u ɣɔ̈k ë luëkiic. Ɣɔ̈k lɔ döŋ biic ke ke kënë tääu luɛɛk, abï deŋ ë kɔɔi ke nɔ̈k kedhie, mɛ̈tkï në kɔc lɔ döŋ biic aya.’ ”

²⁰ Na wën, ke bäny kɔ̈k në bäny ke melikiic acïk ɣɔ̈kken kuaath ë luëkiic, bäny wën cï riɔ̈ɔ̈c në kë cïï Bɛ̈nydït lueel, ku tɔkï lïïmken lɔ ë ɣöötiic.

²¹ Ku kɔc cï jam ë Bɛ̈nydït dhɔ̈lic, acïk ɣɔ̈kken bɛ̈n puɔ̈l roor ëtɛ̈ɛ̈n, ayï lïïmken.

²² Na wën, ke lëk ë Bɛ̈nydït Mothe an, “Yaakë yïcin nhial, ke deŋ ë kɔɔi ë bï tuɛny piny ë Rip ëbɛ̈n, tuëny kɔc, ku läi, ku këriëëc ee cil ëbɛ̈n roor.”

²³ Go Mothe thienyde yaak nhial, go Bɛ̈nydït deŋ ë kɔɔi tɔ lɔ piny, ku nyop piny de Rip nɔm në rel ë deŋ. Bɛ̈nydït ë deŋ dïït ë kɔɔi bɛ̈n tɔ tueny piny ë Rip,

²⁴ deŋ kën kɔn tuɛny Rip ë caaŋdɛn yen jur. Deŋ tueny ë kɔɔi, ku lɔ lɔ̈k ë mac. Go lɔ̈k ë mac riau në kɔi yiic.

²⁵ Deŋ ë kɔɔi ë këriëëc nu roor bɛ̈n riɔ̈ɔ̈k ëbɛ̈n piny ë Rip, kɔc mɛ̈tkï në läi. Go wal roor tääc kedhie, ku dhuuŋ tiim roor ëbɛ̈n.

²⁶ Ku piny de Gocen yetök yen akën ë deŋ ë kɔɔi tuɛny thïn, piny rëër ë kɔc ke Yithriɛl thïn.

²⁷ Na wën, ke melik ë tɔ Mothe cɔl kekë Aron, ku lëk keek an, “Bɛ̈nydït ade nɔm yic. Ee yɛn ë wäc en wokë kɔckï.

²⁸ Ka week, läŋkï Bɛ̈nydït! Wok ë bec në rel ë deŋ, ku kɔɔi! Acä gam nɔn bän we tɔ jäl. Wek cï bï bɛ rëër eenë.”

²⁹ Go Mothe lueel an, “Të lan jäl wut eenë, yɛn bï yacin lɔ yaak nhial läŋ Bɛ̈nydït tɔ rel kääc, kekë deŋ, ku abïk kɔ̈ɔ̈c. Yen abï yïn en jɔ ŋic nɔn ye piny piny ë Bɛ̈nydït.

³⁰ Ku aŋiɛc nɔn ŋoot yïn ke yï cie riɔ̈ɔ̈c në Bɛ̈nydït Nhialic, wedhie wekë bänyku.”

³¹ Ku deŋ ë rap cɔl plak bɛ̈n riɔ̈ɔ̈k kekë rap cɔl barli, në luɔi ë cïï barli luɔk, ku plak aa moc akɛɛn.

³² Ku agamɔ kekë awuööu akënkï riääk, në luɔi ye kek luɔk ciëën.

³³ Na wën, ke Mothe nyiëëŋ melik piny, ku jël wutic, le Bɛ̈nydït lɔ̈ŋ. Na wën, ke këriëëc ëbɛ̈n ë kääc, rel ku deŋ, ku kɔɔi.

³⁴ Na wën aa tïŋ melik nɔn cïï ë deŋ kɔ̈ɔ̈c, ku kääc kɔɔi, ku rel, ke melik ë be awäc nyɔk. Yen kekë bänyke acïk bɛ̈n ŋoot ë ke ril nïïm, cït man wään tueŋ.

³⁵ Ago melik nɔm riɛl ŋak, ku akën kɔc ke Yithriɛl bɛ̈n tɔ jäl, cït man wään cïï Bɛ̈nydït e lɛ̈k Mothe an, melik acïï kɔc ke Yithriɛl bï pɔ̈l ajäl.