Bɛ̈n 40 - JAM DE NHIALIC 2011

Piëët ku Gɛm de Paany de Mät

¹ Na wën, ke lëk ë Bɛ̈nydït Mothe an,

² “Kööl ye pɛɛi ëtök thok tök, ke yï piëët paany de mät.

³ Ku tääuwë athänduŋ de mät thïn ke de yic lööŋ kathiëër. Ku gël në lupɔ.

⁴ Ku lɛɛrë paam thïn, ku guiɛɛrë käŋ ë yenɔm apiɛth. Ku lɛɛrë kë ye many alath cäp thar thïn, ku cäpë many alath në yenɔm.

⁵ Ku tääuwë yïïŋ adhääp në athänduŋ de mät nɔm tueŋ, yïïŋ de nyum ë käŋ ë wal ŋïr. Ku macë gëlgël ë paany thok.

⁶ Ku tääuwë yïïŋ de miɔ̈c ye nyop ëbɛ̈n në paany de mät thok tueŋ.

⁷ Ku tääuwë thaaŋ de wɛ̈k në kaam de paany de mät kekë yïk. Ku thiäŋ në pïïu.

⁸ Ku yïk kal, ku gël thok në gëlgël.

⁹ “Nöm miök de tɔc ku tɔc Paany kekë këriëëc tɔ̈u thïn ëbɛ̈n, ku gamë kekë kakɛn nu thïn, ke bï yic jɔ ɣɛɛr.

¹⁰ Ku ëtɛ̈ɛ̈n, jɔ yïk bɛ̈n gam kekë kake ëbɛ̈n. Tɔc keek ku abïk yiic jɔ ɣɛɛr.

¹¹ Ku tɔc thaaŋ de wɛ̈k, ku gamë ayadäŋ.

¹² “Ku ëtɛ̈ɛ̈n, yïn bï Aron bɛ̈ɛ̈i në paany de mät thok kekë wɛ̈ɛ̈tke, ku tɔ ke waak në waak ɣeric.

¹³ Ku yiëkë Aron kɔ̈u lupɔɔ ɣeriic ke bɛ̈nydïït de kake Nhialic ku tɔc. Ku jɔ bɛ̈n gam ke bï luui ke ye bɛ̈nydïït de kake Nhialic.

¹⁴ Ku bɛ̈ɛ̈iyë wɛ̈ɛ̈tke ayadäŋ, ku yiëkë kekɔ̈ɔ̈th aluluut.

¹⁵ Ku tɔc keek cït man cïn wuönden tɔc, ke ke bï Ya luööi ke ke ye bäny ke kake Nhialic. Ku yen ee tönyë, abï keek tɔ ye bäny ke kake Nhialic ë caaŋden.”

¹⁶ Go Mothe käŋ looi kedhie cït man cïï Bɛ̈nydït e lɛ̈k en.

¹⁷ Go paany de mät cäp thar piny në kööl ye pɛɛi de tök thok tök në ruöön ye runken rou, run ë jël kek Rip.

¹⁸ Go Mothe Paany kiɛɛr piny, ku rïïu këŋ nïïm, ku gɔ̈kic në mën.

¹⁹ Ku kum kɔ̈u. Ku be pät nɔm däŋ në biäk biic cït man cïï Bɛ̈nydït e lɛ̈k en.

²⁰ Ku jɔ kur cï gɔ̈ɔ̈r kɔ̈ɔ̈th kaarou tääu në athänduŋ de mätic. Ku rïïu akum në athänduk nɔm.

²¹ Ku leer athänduk ë paanyic, ku gël në gëlgël ee yen kony. Yen luɔi ë gël en athänduŋ de mät ka cït man cïï Bɛ̈nydït e lɛ̈k en.

²² Na wën, ke Mothe ë tɛ̈ɛ̈u paam në paany de mätic në biäk të lɔ rut, në gëlgël kɔ̈u biic.

²³ Ku tɛ̈ɛ̈u kuïïn cï pam në yenɔm, kuïïn cï pam cï gäm Bɛ̈nydït cït man cïï Bɛ̈nydït e lɛ̈k en.

²⁴ Ku tɛ̈ɛ̈u kë ye many alath cäp thar thïn në biäk të lɔ wöuwic në paany de mätic thïn ke tiëëm nɔm kekë paam.

²⁵ Na wën, ke jɔ many alath bɛ̈n cuöny cït man cïï Bɛ̈nydït e lɛ̈k en.

²⁶ Ku jɔ yïïŋ de adhääp tääu ë paany de mätic në gëlgël nɔm tueŋ.

²⁷ Ku nyop wɛ̈ɛ̈l ŋïr në yenɔm, cït man cïï Bɛ̈nydït e lɛ̈k en.

²⁸ Ku tɛ̈ɛ̈u gëlgël në Paany thok.

²⁹ Ku tɛ̈ɛ̈u yïïŋ de nyum ë käŋ në gëlgël de paany de mät nɔm tueŋ. Ku gɛm miɔ̈c ye nyop në yenɔm, ayï miɔ̈c ë rap cït man cïï Bɛ̈nydït e lɛ̈k en.

³⁰ Ku thiëëŋ thaaŋ ë wɛ̈k në pïïu, ku tɛ̈ɛ̈u në kaam ë paany de mät kekë yïk.

³¹ Go Mothe yecök aa waak thïn ëtɛ̈ɛ̈n kekë Aron, ku wɛ̈ɛ̈t ke Aron, ku wakkï kecin aya.

³² Të le kek ë paany de mätic, ayï të le kek ë yïk thar, cït man cïï Bɛ̈nydït e lɛ̈k en.

³³ Na wën, ke Mothe ë gël paany de mät piny kekë yïk në kal. Ku yïk kal thok gëlgël. Ku jɔ bɛ̈n thök në luɔi ëbɛ̈n.

Luät në Paany ë Mät Nɔm

³⁴ Na wën, ke luät ë kum paany de mät piny, ku jɔ riau dïït lɔ wic ye thiɔ̈ɔ̈ŋic, riau de dhuëëŋ de Bɛ̈nydït.

³⁵ Go Mothe kɛ̈n bɛ̈n lɔ në paany de mätic në biäk cï luät ye kuöm piny, ku cï dhuëëŋ de Bɛ̈nydït ye thiɔ̈ɔ̈ŋic.

³⁶ Ku kɔc ke Yithriɛl aake cie kuëëth të kënë luät jäl në Paany nɔm.

³⁷ Ku aake ye rëër ee të töŋë ke ke cïï kuëth, agut të bï luät kɔn jäl në Paany nɔm.

³⁸ Ku baai de Yithriɛl aaye luät woi në Paany nɔm aköl, ku tïŋkï mac adɛ̈p në yenɔm wakɔ̈u në aköölkɛn wään ciɛth kek roor kedhie.