Bɛ̈n 39 - JAM DE NHIALIC 2011

Luɔi de Lupɔɔ ke Bäny ke Kake Nhialic

¹ Na wën, ke ke loi lupɔɔ piɛth ke bäny ke kake Nhialic bïk keek aa cieŋ të le kek tëɣeric. Aake loikï në lupɔ aräu, ku lupɔ amujuŋ, ku lupɔ thith. Ku luikï Aron lupɔɔ ke bäny ke kake Nhialic ayadäŋ cït man cïï Bɛ̈nydït ye lɛ̈k Mothe.

² Gokï ajïpɔ de adhääp looi në linɔn lɔ mot, ku lupɔ aräu, ku lupɔ amujuŋ, ku alanh atuöl aŋirŋir.

³ Ku deŋkï thalɛɛŋ ke adhääp, bï keek guöt në linɔn kɔ̈u, ku gutë keek në lupɔ aräu kɔ̈u, ku lupɔ amujuŋ kɔ̈u, ku lupɔ thith kɔ̈u.

⁴ Ku luikï ajïpɔ kët ka lɔ yueryuer, ku kɛɛcë keek në yeŋɛŋ bï ye aa duut.

⁵ Ku acïk thiönh cï ŋiëc gut apiɛth në linɔn lɔ mot, ku adhääp ku, ku lupɔ aräu, ku lupɔ amujuŋ, ku alanh atuöl aŋirŋir, cïï atëët gut bɛ̈n rɛk në ajïpɔ kɔ̈u mɛt kek en thok tëtök cït man cï Bɛ̈nydït e lɛ̈k Mothe.

⁶ Ku nömkï kur ke onik kaarou ku kum kekɔ̈ɔ̈th në adhääp, ku tueŋkï rin ke wɛ̈ɛ̈t ke Jakop në kekɔ̈ɔ̈th apiɛth kathiëër ku rou.

⁷ Ku duutkï keek në ka lɔ yueryuer ke ajïpɔ thook, ke ke bï wɛ̈ɛ̈t ke Jakop aa nyuɔɔth cït man cïï Bɛ̈nydït e lɛ̈k Mothe.

Luɔi de Lupɔ de Yɔu

⁸ Gokï lupɔ de yɔu guöt tëët cït man cï kek ajïpɔ looi në adhääp ku linɔn lɔ mot, ku lupɔ aräu, ku lupɔ amujuŋ, ku alanh atuöl aŋirŋir.

⁹ Ku aaye yic arɔm ke matic ë rou. Ku bɛ̈ɛ̈r de yekɔ̈u acï rueetic, ayï dït de yeyic acï rueetic aya.

¹⁰ Ku acïk kueer thok në aber ee yic ŋuan në kur tuc ë ɣööcden. Acïk aber tueŋ kueer në kuur ë thardiɔn, ku kuur ë topadh, ku kuur ë garnet.

¹¹ Ku kueerkï aber de rou thok në kuur ë ameral, ku kuur ë thapiro, ku kuur ë daimon.

¹² Ku kueerkï aber de diäk thok në kuur ë jakintho, ku kuur ë agat, ku kuur ë amethit.

¹³ Ku kueerkï aber de ŋuan thok në kuur ë beril, ku kuur ë onik, ku kuur ë jathpi. Ku kakë kedhie aake cï diir thook në adhääp.

¹⁴ Ku kurkë kedhie kathiëër ku rou, acï ke gäär kɔ̈ɔ̈th rin ke wɛ̈ɛ̈t ke Yithriɛl, acïtkï guela, kuur tök ke rin ke wën tök. Ku ye dhiëën ke Yithriɛl nyuɔɔth kathiëër ku rou.

¹⁵ Ku luikï lupɔ de yɔu thok kuɛɛt ke adhäm awai, kuɛɛt cï deŋ.

¹⁶ Ku loikï joth dhuɔɔkiic kaarou, ku kuc ke adhääp kaarou. Ku rekkï keek në lupɔ de yɔu thok në biäk nhial.

¹⁷ Ku rekkï joth ke adhääp kaarou në kuc ke adhääp kɔ̈ɔ̈th kaarou.

¹⁸ Ku rekkï joth thook biäk däŋë në kuc kɔ̈ɔ̈th, ku rekkï kethook në ajïpɔ kɔ̈u.

¹⁹ Ku loikï kuc ke adhääp kaarou, ku rekkï thook piny në lupɔ de yɔu në biäk thïn de ajïpɔ.

²⁰ Ku bekï kuc kɔ̈k ke adhääp looi kaarou, ku rekkï keek thook në lupɔ de kët thok piny në ajïpɔ kɔ̈u në baŋ tueŋ, të thiääk ke thiönh cï ŋiëc gut apiɛth.

²¹ Ku duutkï kuc ke lupɔ de yɔu në kuc ke ajïpɔ kɔ̈ɔ̈th aril në alanh aräu. Mɛtkï kethook piny në thiööth kɔ̈u ke ke cïï bï däk, cït man wään cïï Bɛ̈nydït e lɛ̈k Mothe.

Lupɔɔ Kɔ̈k ke Bäny ke Kake Nhialic

²² Ku loikï lupɔ de epotic thïn në alanh aräu.

²³ Ku dirkï të ɣɔ̈ɔ̈r ye nɔm tëëk thok në atheer cï nai ke cï bï rɛt.

²⁴ Ku luikï thok dhuur në mïth ke tim de pomegraneet në ye thok piny në alanh aräu, ku alanh amujuŋ, ku kë thith, ku linɔn atuöl aŋirŋir.

²⁵ Ku loikï aruuruu në adhäm awai, ku guelkï keek në dhuur ke pomegraneet yiic në lupɔ thok piny.

²⁶ Ku dhuur ke pomegraneet cï guel në aruuruu nu në lupɔ kɔ̈u abï keek aa cieŋ në thaar ë luɔi, cït man cïï Bɛ̈nydït e lɛ̈k Mothe.

²⁷ Gokï Aron luöi aluluut ke lupɔ piɛth lɔ mot kekë wɛ̈ɛ̈tke.

²⁸ Ku loikï lupɔɔ ke dër ë nɔm në lupɔ piɛth lɔ mot, ku atɛ̈ny, ku athuruɛl de lupɔ piɛth lɔ mot.

²⁹ Ku loikï lupɔ de kët në linɔn lɔ mot cïï atëët ŋiëc gut apiɛth në lupɔ aräu, ku lupɔ amujuŋ, ku lupɔ thith cït man cïï Bɛ̈nydït e lɛ̈k Mothe.

³⁰ Ku cuëckï aduök në göl ɣeric në adhäm awai. Ku gɔ̈ɔ̈rkï yic an, “Ee kë cï gäm Bɛ̈nydït!”

³¹ Ku mäckï thar alanh aräu. Ku ruökkï në lupɔ de dër ë nɔm kɔ̈u në baŋ tueŋ cït man cïï Bɛ̈nydït e lɛ̈k Mothe.

Thök de luɔi

³² Na ɣɔn, ke luɔi de paany de mät ë jɔ thök. Kɔc ke Yithriɛl acïk këriëëc bɛ̈n looi ëbɛ̈n cït man cïï Bɛ̈nydït e lɛ̈k Mothe.

³³ Na wën, ke ke jɔ paany yiɛ̈n Mothe kekë kakɛn tɔ̈u thïn ëbɛ̈n: yï këërkëër, ayï thiliikkɛn dhuɔɔk nïïm, ayï rïurïuke, ayï këŋke, ayï kucke.

³⁴ Ku akum de dël ke nyök amɛ̈l cï tɔc në kïn thith, ku akum de dël ke ɣɔ̈k lɔ mot, ku gëlgël.

³⁵ Ku athänduŋ de mät ke de yic kur pätiic kaarou, ku waike, ku akumde.

³⁶ Ku paam, kekë kake kedhie, ayï kuïn cï kuïn cï pam ɣeric Nhialic.

³⁷ Ku kë ye manyalath cäp thar thïn cï cuëëc në adhäm awai, kekë mɛ̈ckealath, ku kake kedhie, ayï miökde.

³⁸ Ku yïïŋ de adhääp, ku miök de tɔc, ku wɛ̈ɛ̈l ŋïr, ku gëlgël de paany thok.

³⁹ Ku yïïŋ de maläŋ, kekë bɔi maläŋ, ku waike, ku kake kedhie, ku thaaŋ ë wɛ̈k kekë kunyde.

⁴⁰ Ku gëlgël de kal, kekë këŋke, ku kuc, ku gëlgël de kal thok, kekë waike, ku lɔ̈c ke paany de mät, ku kake luɔi ëbɛ̈n në paany de mätic.

⁴¹ Ku lupɔɔ piɛth lɔ yum, lupɔɔ bï bäny ke kake Nhialic ke cieŋ, të luui kek tëɣeric, lupɔɔ ɣeriic, lupɔɔ ke Aron kekë wɛ̈ɛ̈tke.

⁴² Go kɔc ke Yithriɛl luɔi looi ëbɛ̈n, cït man cïï Bɛ̈nydït e lɛ̈k Mothe.

⁴³ Na wën, ke jɔ Mothe ye caath guöp ëbɛ̈n, go yök acï looi ëbɛ̈n ëgɔk cït man cïï Bɛ̈nydït e lɛ̈k en. Go Mothe keek thieei.