Bɛ̈n 38 - JAM DE NHIALIC 2011

Yïïŋ de Miɔ̈c ye Nyop

¹ Na wën, ke Mothe ë yïk yïïŋ de miɔ̈c ye nyop ëbɛ̈n në tim de aluii. Ku yïk aaye yic arɔm ke kït. Go bɛ̈ɛ̈r de yekɔ̈u tɔ ye mitïïr kaarou ku biäk. Ku tɔ dït de yeyic ee mitïïr kaarou ku biäk. Ku tɔ bɛ̈ɛ̈r de ke lɔ nhial ee mitïr ku biäk.

² Ku cuëc nɔm tuŋ kaŋuan aguuk nïïm. Ku rɔɔth guöp në maläŋ.

³ Ku thɛ̈ɛ̈th kake yïk kedhie në maläŋ, guöl, ku ka ye mac jok, ku thɛ̈k, ku thialtuŋ, ku abɔ̈c ke mac, ku kake kedhie aake looi në maläŋ.

⁴ Ku cuëc yïk bɔi maläŋ, gɔl në atheer ë yïk thar ale yenɔm kan në yïk kɔ̈u cil.

⁵ Ku looi joth ke maläŋ kaŋuan në aguuk nïïm kaŋuan, bï ke wai ke ɣɔ̈ɔ̈c aa luöt thïn.

⁶ Ku looi wai në tim de aluii. Ku rɔɔth kekɔ̈ɔ̈th në maläŋ.

⁷ Ku lut wai në jothiic në yïk guöp, ɣɛ̈ɛ̈cë yen. Ku yïk aa cuëc ke ɣɔ̈ɔ̈ric thïn në paam.

Luɔi de Thaaŋ ë Maläŋ

⁸ Ku cuëëc thaaŋ ë maläŋ kekë kunyde në thalɛɛŋ ke diäär ee luui në paany de mät thok.

Kal de Paany de Mät

⁹ Ku ëtɛ̈ɛ̈n, Mothe ë kal de paany de mät bɛ̈n jɔ looi. Looi kal baŋ të lɔ wöuwic në gëlgël cï gut në linɔn lɔ mot. Ku bɛ̈ɛ̈r de yekɔ̈u aaye mitïïr kathiërŋuan ku dhetem.

¹⁰ Ku lui mën ke maläŋ kathiërrou, në kuckɛn ke maläŋ kathiërrou. Ku mën ke joth ke ateek cï dhook nïïm, ayï thiliikken.

¹¹ Ku looi biäk të lɔ rut ke bɛ̈ɛ̈r de yekɔ̈u ë ye mitïïr kathiërŋuan ku dhetem. Ku lui mën kathiërrou ke maläŋ në kuckɛn ke ateek kathiërrou.

¹² Ku looi gëlgël ke baŋ të lɔ aköl athɛ̈i ke bɛ̈ɛ̈r de yekɔ̈u ë ye mitïïr kathiërrou ku diäk. Ku lui mën kathiëër në kucken, ku looi joth ke mën në ateek, ayï thiliikken.

¹³ Ku looi thok tueŋ baŋ të lɔ aköl amiäk ke gëlgëlke ë ke ye mitïïr kathiërrou ku diäk.

¹⁴ Gëlgël ke kal thok baŋ tök aaye mitïïr kadhetem ku biäk. Ku mën kadiäk në kucken kadiäk.

¹⁵ Ku ee yen ee täu de baŋ däŋë ayadäŋ, gëlgël ke paany thok baŋë, ku baŋë aaye mitïïr kadhetem ku biäk, ku mën kadiäk në kucken kadiäk.

¹⁶ Ku gëlgël ke kal kedhie, loi keek në linɔn lɔ mot.

¹⁷ Ku loi kuc ke mën në maläŋ, ku joth ke mën mɛ̈tkï në thiliikken, ku akuumken loi në ateek. Ku këriëëcde ëbɛ̈n, ayï mën rek keek në thiliik ke ateek.

¹⁸ Ku gëlgël de Paany thok, aa loi në linɔn lɔ mot cï gut apiɛth në atën ŋic gut në lupɔ aräu, ku lupɔ amujuŋ, ku lupɔ thith.

¹⁹ Ku acï keek dhɔ̈ɔ̈r në këŋ kaŋuan nïïm, këŋ cï cäp thäär piny në kuc ke maläŋ kaŋuan. Ku joth cï dhook nïïm, ku kë cï ë keek kum nïïm, ku waiken acï ke looi në ateek.

²⁰ Ku lɔ̈c ke Paany kedhie, ayï lɔ̈c ke kal acï keek looi në maläŋ.

Kuën de Wëth ë Looi ë Paany

²¹ Kuën ë wëth ë looi ë paany de mät kï: Paany ɣɔn ye kur pätiic kaarou döt thïn, kur cïï lööŋ kathiëër gäär në kekɔ̈ɔ̈th. Kuënë aa cɔɔl ë Mothe tëde Lebai ɣɔn ye Yithamar wën ë Aron bɛ̈nyden, ku bɛ̈ny de kake Nhialic.

²² Ku Bedhalel wën ë Yuri, wën ë wën ë Ɣur, raan dhiën ë Juda acï këriëëc cïï Bɛ̈nydït lueel looi ëbɛ̈n.

²³ Ku Yooliap wën ë Aɣithamak, raan dhiën ë Dan, raan ë kony Bedhalel aaye atën ë tiim, ku ye atën ee käŋ kiëët, ku ye atën ee lupɔɔ gut në linɔn lɔ mot, ku lupɔ aräu, ku lupɔ amujuŋ, ku lupɔ thith.

²⁴ Ku athëm de adhäm gëmë Bɛ̈nydït looi yë tëɣeric, aaye agum de kilɔɔ gram ke adhääp në athëm de tëɣeric.

²⁵ Ku athëm de ateek ë gɛm ë akutnɔm en, aaye aguum kadiäk, ku bot kaŋuan ku thiërdiäk 3,430 ke kilɔɔ gram ke ateek në athëm de tëɣeric.

²⁶ Yen athëmë, athöŋ kekë kuën ë kɔc ke Yithriɛl cï gɔ̈ɔ̈r rin të ɣɔn kueen ë keek. Raan ëbɛ̈n në keyiic aaye kuën cï mac tääu piny në athëm de tëɣeric. Ku kuën ë kɔc ë gɔ̈ɔ̈r rin ɣɔn kueen ë keek, aaye bot kadhetem ku diëŋ de agum, ku bot kadhïc ku thiërdhïny de raan ee run thiërrou ku le tueŋ.

²⁷ Ku athëm de ateek ë cuëëcë bɔt ë kuc ke tëɣeric, aaye aguum kadiäk ku bot kaŋuan ke kilɔɔ gram. Ku athëm de ateek ë cuëëc ë kuc ke gëlgël, aaye thiërdiäŋ de kilɔɔ gram.

²⁸ Ku kilɔɔ ke ateek kathiërdiäk cï döŋ pinyë, acïï Bedhalel këŋ cuëc nïïm joth dhuɔɔk nïïm, ku cuëëc akuumken, ku thiliikken.

²⁹ Ku athëm de maläŋ ë gëmë Bɛ̈nydït ëbɛ̈n, aaye aguum kaarou, ku bot kaŋuan, ku thiërrou ku dhïc ke kilɔɔ gram.

³⁰ Yen aa looi yen kuc ke paany de mät thok, kekë yïïŋ maläŋ, ku rek de maläŋ kekë kake yïk ëbɛ̈n.

³¹ Ku looi yen kal thok, kekë kuc ke kal, ku lɔ̈c ke Paany kedhie, ayï lɔ̈c ke kal.