Bɛ̈n 37 - JAM DE NHIALIC 2011

Luɔi de Athänduŋ de Mät

¹ Bedhalel aa loi athänduŋ de mät në tim de aluii ku bɛ̈ɛ̈r de yenkɔ̈u aa ye mitïr ku biäk. Ku looi dït de yeyic ke ye biäk de mitïr. Ku tɔ bɛ̈ɛ̈r de yekɔ̈u ke lɔ nhial ee mitïr ku biäk.

² Ku rɔɔthic thïn në adhäm awai. Ku rɔɔth kɔ̈u biic ayadäŋ në yen. Ku wil nɔm ëbɛ̈n në atheer adhääp.

³ Ku lui joth dhuɔɔkiic kaŋuan në adhääp bï ye aa ɣääc. Ku cuëëc keek në aguuk nïïm kaŋuan, rou ë baŋë ku rou ë baŋë.

⁴ Ku looi wai bï ye aa ɣääc në tim de aluii. Ku rɔɔth kekɔ̈ɔ̈th në adhääp.

⁵ Ku lut keek në joth dhuɔɔkiic në Athänduk nɔm baŋë ku baŋë.

⁶ Ku looi akum në adhäm awai, ke bɛ̈ɛ̈r de yenkɔ̈u ee mitïr ku biäk. Ku dït de yenyic tɔ ye biäk de mitïr.

⁷ Ku cuëëc cerubiim në adhäm cï deŋ,

⁸ cerubiim tök në akum thok baŋë, ku tök në baŋ däŋë. Ku cuëëc keek në akum guöp.

⁹ Ku cerubiim tuum kenïïm, ku aake cï akum gɛ̈l piny në kewuök.

Luɔi de Paam

¹⁰ Ku looi paam në tim de aluii, ke bɛ̈ɛ̈r de yekɔ̈u ë ye mitïr, ku tɔ dït de yenyic ee biäk de mitïr. Ku tɔ bɛ̈ɛ̈rde ke lɔ nhial ee biäk de mitïr.

¹¹ Ku rɔɔth nɔm në adhäm awai, ku wil këc në atheer adhääp.

¹² Ku wil nɔm ëbɛ̈n në atheer duëërë them në ciin nɔm. Ku wil atheer piny në atheer adhääp.

¹³ Ku lui joth dhuɔɔkiic kaŋuan në adhääp, joth bï ye aa ɣääc, ku tɛ̈ɛ̈u ke në aguukiic kaŋuan ke ke tiŋ cök nïïm.

¹⁴ Ku joth dhuɔɔkiic ye ke paam ɣääc tɛ̈ɛ̈uwë keek në atheer lɔ̈ɔ̈m.

¹⁵ Ku looi wai në tim de aluii, ku rɔɔth kɔ̈u në adhääp.

¹⁶ Ku looi këriëëc de paam ëbɛ̈n në adhäm awai: aduuk, ku thɛ̈k ke wal ŋïr, ku guöl ku abïny bï mɔ̈n cï gam aa dek.

Luɔi de kë Ye Manyalath Cäp Thar Thïn

¹⁷ Ku looi kë ye manyalath tääu në yenɔm në adhäm awai. Ku looi kunyde në adhäm cï deŋ, ayï yekɔ̈u, ayï akɛɛn ke walke, ayï ŋolke, ku gɛkke, ku tɔ keek ee tök në yen.

¹⁸ Ku kër kadhetem ë ke këër bei në yekëc. Kër kadiäk baŋë, ku diäk në baŋ däŋë.

¹⁹ Ku loikï abïïny kaarou, abïïny cït man akɛɛn de almon. Ku ë ke deyiic akɛɛn, ku ŋol në kër kɔ̈ɔ̈th kedhie, kër këër bei në kë ye manyalath cäp thar thïn.

²⁰ Ku kë ye manyalath cäp thar thïn guöpde, aa de kɔ̈u abïïny kaŋuan, abïïny cï looi cït man almon cï ŋuɔl moc gaak.

²¹ Ku ŋol tök në kër thäär piny kedhie kadhetem.

²² Ku kër rɛk në ŋol ëtök, loike kedhie në adhäm cï deŋ, adhäm awai.

²³ Agokï mɛ̈c ke many alath looi kedhie kadhorou në adhäm awai, ayï kë ye mac cuääny thok, ayï atɛ̈nyde.

²⁴ Ku loikï kë ye manyalath cäp thar thïn, kekë kake kedhie në adhäm awai.

Yïïŋ de Nyum ë Wal Ŋïr

²⁵ Agokï looi yïïŋ de nyum ë wal ŋïr në tim de aluii. Ku bɛ̈ɛ̈r de yenkɔ̈u aaye biäk de mitïr. Ku dït de yeyic aaye biäk de mitïr. Ku bɛ̈ɛ̈rde yenkɔ̈u ke lɔ nhial aaye mitïr tök. Ku tuŋke rɛk në yeguöp.

²⁶ Ku rɔthkï kɔ̈u, ayï yenɔm ëbɛ̈n në adhäm awai. Ku luikï kɔ̈u kuëër adhääp ëbɛ̈n.

²⁷ Ku luikï joth dhuɔɔkiic ke adhääp kaarou në kuëër de adhääp thar piny, tök ë baŋë ku däŋë ë baŋë bï wai ɣɛ̈ɛ̈cë ye aa tääu thïn.

²⁸ Ku loikï wai në tim de aluii, ku rɔthkï kekɔ̈ɔ̈th në adhääp.

Luɔi de Miök ë Tɔc kekë Miök Ŋïr

²⁹ Gokï miök ɣeric de tɔc looi, ku loikï wɛ̈ɛ̈l ŋïr awai, cïï looi në atëët ee miök liääp apiɛth.