Bɛ̈n 36 - JAM DE NHIALIC 2011

¹ “Ku Bedhalel kekë Yooliap, ku atëët kɔ̈kë kedhie, atëët cïï Bɛ̈nydït gäm tëët, ku nɔm pɛl ku ŋïny de käŋ, kɔc ŋic luɔi de këriëëc kɔɔr rɔt tëɣeric ëbɛ̈n, abïk këriëëc looi ëbɛ̈n cït man cïï Bɛ̈nydït e lueel.”

Kɔc Abïïkï Miɔ̈c Juëc

² Go Mothe Bedhalel cɔɔl kekë Yooliap, ku atëët kedhie, atëët cïï Bɛ̈nydït gäm riɛl, kɔc de piɔ̈ɔ̈th luɔi bï kek luui, ku lëk keek nɔn gɔl kek luɔi.

³ Na wën, ke gëm ë Mothe keek miɔ̈c de miɛtëpiɔ̈u cïï kɔc ke Yithriɛl bɛ̈ɛ̈i ëbɛ̈n bï ë tëɣeric bɛ̈n yïk. Ku jɔ kɔc ke Yithriɛl Mothe aa cool ke yïnkï miɔ̈cden aköölnyïïn ëbɛ̈n.

⁴ Na wën, ke atëët lui tëɣeric ë ke lɔ tëde Mothe,

⁵ ku lëkkï yen an, “Kɔc abïïkï ka wär ka bï yïk lëu. Yïïŋ wään lueel ë Bɛ̈nydït an looi ë yen.”

⁶ Go Mothe thok lɛ̈k kɔc le luɛɛl wut ëbɛ̈n nɔn cïn en raan däŋ be dɛ miɔ̈c gɛm, miɔ̈c de yïŋ de tëɣeric. Go kɔc jɔ kɔ̈ɔ̈c në miɔ̈c, ku cïn miɔ̈c bekï gam.

⁷ Ku kak ë cïk gam aake juëc awär ka ë kɔɔr röt yïk ë ke Paany.

Luɔi de Paany de Mät

⁸ Ku atëët pel nïïm në atëët luiyë yiic, acïk paany de mät bɛ̈n looi. Acïk bɛ̈n looi në gëlgël kathiëër, gëlgël cï cuëëc në linɔn lɔ mot, ku lupɔ aräu, ku lupɔ amujuŋ, ku lupɔ thith. Ku gutkï kekɔ̈ɔ̈th cerubiim.

⁹ Ku gëlgël kït kedhie në dït ë yic, ku bɛ̈ɛ̈r ë kɔ̈u. Bɛ̈ɛ̈r ë kɔ̈uden aaye mitïïr kathiëër ku rou ku biäk. Ku dït ë yicden aaye mitïïr kaarou.

¹⁰ Agokï dhïc rek thook pei, ku rekkï dhïny däŋë thook pei kapäc.

¹¹ Ku dirkï gëlgël thook në lupɔ amujuŋ cï luöi kaɣɔ̈r kuɛɛr kɔ̈ɔ̈th.

¹² Gëlgël tueŋ ade kɔ̈u kaɣɔ̈r kathiërdhïc. Ku acï keek mäc nïïm kaɣɔ̈r kɔ̈k kathiërdhïc në gëlgël ye kek rou.

¹³ Ku loikï joth ke adhääp dhuɔɔkiic kathiërdhïc, rek kek gëlgël kaarou tɔkï keek ee tök.

¹⁴ Ku luikï Paany nɔm akum në lupɔɔ kathiëër ku tök, lupɔɔ ë cuëc në nhïm ke bɔɔth.

¹⁵ Ku ee gëlgëlkë kedhie kathiëër ku tök aake loi keek akït. Bɛ̈ɛ̈r ë kekɔ̈ɔ̈th aaye mitïïr kathiëër ku diäk ku biäk. Ku dït ë keyiic aaye mitïïr kaarou.

¹⁶ Agokï dhïc rek ëtök, ku rekkï dhetem ëtök.

¹⁷ Ku luikï gëlgël tueŋ thok kaɣɔ̈r kathiërdhïc në gëlgël thïk gëlgël thook. Ku luikï gëlgël däŋë thok kaɣɔ̈r kɔ̈k kathiërdhïc ayadäŋ në gëlgël thïk gëlgël thook.

¹⁸ Ku loikï joth ke maläŋ dhuɔɔkiic kathiërdhïc bï gëlgël rek tëtök kaarou. Ke ke bï jɔ aa akum de paany de mät nɔm.

¹⁹ Ku bekï akuum kɔ̈k ke Paany nɔm nhial biic looi kaarou. Akum tök në dël ke nyök bɔɔth cï tɔc në këthith, ku däŋë në dɛ̈l lɔ mot bï aa kum de baŋ biic.

²⁰ Ku loikï këŋ ke Paany në tim de aluii.

²¹ Ku bɛ̈ɛ̈r de këŋ aaye mitïïr kaŋuan ku biäk. Ku dït de kek yiic aa ye biäk de mitïr.

²² Ku këŋ aake ye nïïm rou në luɔi bï keek rek ëtök kedhie.

²³ Agokï baŋ të lɔ wöuwic luöi këŋ kathiërrou.

²⁴ Ku luikï keek kuc ke ateek kathiërŋuan bï keek cäp thäär thïn. Ke bï kërke jɔ aa dhɔ̈ɔ̈r kaarou.

²⁵ Ku luikï baŋ të lɔ rut këŋ kathiërrou,

²⁶ ku kuc ke ateek kathiërŋuan, kuc kaarou në këŋ tök thar.

²⁷ Ku luikï Paany kɔ̈u ciëën baŋ të lɔ aköl athɛ̈i këŋ kadhetem.

²⁸ Ku yïkkï agukic këŋ kaarou.

²⁹ Ku këŋ ke agukic ye rek thäär piny alɔ gut ë kenïïm nhial. Yen luɔi ë tɔ̈u ë këŋ ke aguuk ka kaarou.

³⁰ Ka këŋ ke aguk aake ye bɛ̈t kedhie, ku kuc ke ateek kathiëër ku dhetem, kuc kaarou në këŋ tök thar.

³¹ Ku loikï rïurïu kathiëër ku dhïc në tim akacia. Rïurïu kadhïc në këŋ nïïm në Paany baŋ tök.

³² Ku rïurïu kɔ̈k kadhïc në këŋ nïïm në Paany baŋë, ku dhïc në Paany thar ciëën baŋ të lɔ aköl athɛ̈i.

³³ Ku rïurïu de yeyic cil, aa rïïuwë ë këŋ nɔm gɔl ë baŋë ale gut në baŋ däŋë.

³⁴ Ku rɔthkï këŋ kɔ̈ɔ̈th në adhääp, ku luikï kenïïm joth dhuɔɔkiic ke adhääp bïk rïurïu aa muk. Ku cï rïurïu rɔɔth kɔ̈ɔ̈th në adhääp ayadäŋ.

³⁵ Ku loikï gëlgël në linɔn lɔ mot, ku lupɔ aräu, ku lupɔ amujuŋ, ku lupɔ thith, ku gutkï kekɔ̈ɔ̈th cerubiim.

³⁶ Ku luikï wai kaŋuan në tim de aluii, wai bï gëlgël muk. Ku rɔthkï kekɔ̈ɔ̈th në adhääp, ku luikï kekɔ̈ɔ̈th joth ke adhääp cï dhook nïïm. Ku loikï kuc ke ateek kaŋuan, kuc bï wai cäp thäär thïn.

³⁷ Ku tɔkï atëët lui Paany thok gëlgël në linɔn lɔ mot, ku lupɔ aräu, ku lupɔ amujuŋ, ku lupɔ thith.

³⁸ Ku luikï gëlgël ë Paany wai kedhie. Ku luikï wai nïïm joth ke adhääp cï dhook nïïm. Ku rɔthkï kenïïm nhial, ayï kekɔ̈ɔ̈th në adhääp. Ku luikï kuc kadhïc në maläŋ.