Bɛ̈n 35 - JAM DE NHIALIC 2011

Lööŋ ke Kööl ë Thabath

¹ Na wën, ke Mothe ë cɔl akutnɔm de kɔc ke Yithriɛl kedhie, ku lëk keek an, “Kë cïï Bɛ̈nydït lɛ̈k week kï an bäk looi.

² Wek cï gäm nïn kadhetem bä wek aa luui thïn. Na kööl de dhorou, ee kööldiën de Thabath ɣeric Yɛn Bɛ̈nydït, kööl de lɔ̈ŋ. Raan ëbɛ̈n, raan lɔ luui thïn ke näk.

³ Na cakaa mac ë cïï koth në bɛ̈ikuniic në kööl ë Thabath.”

Miɔ̈c de Paany

⁴ Go Mothe lɛ̈k akutnɔm de kɔc ke Yithriɛl kedhie an, “Kë cïï Bɛ̈nydït lɛ̈k week kï:

⁵ Gämkï Bɛ̈nydït miɔ̈c. Ku raan ëbɛ̈n, raan kɔɔr bï Bɛ̈nydït gäm miɔ̈c, ke bïï miɔ̈c adhääp, ku ateek ku maläŋ.

⁶ Ku linɔn lɔ mot, ku lupɔ aräu, ku lupɔ amujuŋ, ku lupɔ thith, ku lupɔ cï cuëëc në nhïm ke bɔɔth,

⁷ ku dël ke nyök bɔɔth, dël cï tɔc në këthith, ku tiim ke akacia,

⁸ ku miök de many alath, ku wal ŋïr, wal ke miök de tɔc, ku miök de wɛ̈ɛ̈l ŋïr.

⁹ Kur ke onik, ayï kur kɔ̈k, kuur bï rɛk ë lupɔ de ajïpɔ thok, ayï lupɔ de yen yɔu.

Kake Paany de Mät

¹⁰ “Atëët nu në weyiic kedhie, ë ke mat kenïïm, ku loikï ka cïï Bɛ̈nydït lueel kedhie:

¹¹ ë ke loi Paany, ayï akumde: akum thïn, ayï akum biic, ayï joth cï dhook nïïm, ayï këërkëërde, ayï rïurïuke, ayï këŋke, ayï kucken,

¹² ayï athänduŋ de mät kekë waike, ku akumde, ayï gëlgël bï ye gɛ̈l wei,

¹³ ayï paam kekë waike, ku kakë kedhie, ayï kuïn cï pam ɣeric bï gäm Nhialic,

¹⁴ ku kë ye manyalath cäp thar thïn ayadäŋ në biäk de riau, kekë këriëëcde ëbɛ̈n, ayï manyalath kekë miökde,

¹⁵ ku yïïŋ de nyum ë wal ŋïr kekë waike, ku miök de tɔc, ayï wɛ̈ɛ̈l ŋïr, ku gëlgël de paany thok,

¹⁶ ku yïïŋ de miɔ̈c ye nyop ëbɛ̈n kekë maläŋ rɛk ke yen, ku waike ku kake kedhie, ku thaaŋ ë wɛ̈k kekë kunyde,

¹⁷ ku gëlgël ke kal në këŋken, ku kucken, ku gëlgël de kal thok,

¹⁸ ku lɔ̈c ke paany, ayï lɔ̈c ke kal, ayï awiɛɛthken,

¹⁹ ku lupɔɔ piɛth lɔyum, lupɔɔ bïï bäny ke kake Nhialic ke ya cieŋ, të luui kek tëɣeric, lupɔɔ ɣeriic lupɔɔ ke Aron kekë wɛ̈ɛ̈tke.

Kɔc Abïïkï Miɔ̈cden

²⁰ Na wën, ke akutnɔm de kɔc ke Yithriɛl ëbɛ̈n ë ke jël kedhie.

²¹ Ku ëtɛ̈ɛ̈n, raan ëbɛ̈n, raan de piɔ̈u miɔ̈c ë Bɛ̈nydït bɛ̈n yiɛ̈n miɔ̈c de miɛtëpiɔ̈u looiyë paany de mät. Agokï këriëëc aa bɛ̈ɛ̈i ëbɛ̈n, këriëëc kɔɔr rɔt në biäk de läm, ayï biäk de lupɔɔ ɣeriic ke bäny ke kake Nhialic.

²² Ago kɔc de piɔ̈ɔ̈th miɔ̈c bɛ̈n ëbɛ̈n, diäär, ku röör bïïkï guët, ayï joth keyïth, ayï joth, ayï thiɛu. Acïk këriëëc de adhääp bɛ̈n bɛ̈ɛ̈i ëbɛ̈n.

²³ Kɔc kɔ̈k acïk lupɔ piɛth lɔ mot bɛ̈n bɛ̈ɛ̈i, ku bïï kɔ̈k lupɔɔ aräu, ku lupɔɔ amujuŋ, ku nɔn ee yen lupɔɔ thith, ku lupɔɔ de nhïm ke bɔɔth, ayï dël ke nyök bɔɔth cï tɔc në kë thith, ku nɔn ee yen dɛ̈l lɔ mot, acïï kɔc ke bɛ̈n bɛ̈ɛ̈i.

²⁴ Ku kɔc kɔ̈k de nïïm ateek, ayï maläŋ acïk keek bɛ̈n bɛ̈ɛ̈i ke ye miɔ̈c. Ku kɔc de nïïm tiim ke akacia kedhie, acïk keek bɛ̈n bɛ̈ɛ̈i.

²⁵ Ku diäär atëët kedhie, acïk alɛɛth ke linɔn lɔ mot bɛ̈n bɛ̈ɛ̈i. Ku bïïkï alɛɛth aräu, ku alɛɛth amujuŋ, ku alɛɛth thith, alɛɛth cïk wi.

²⁶ Ku aake cï alɛɛth ke nhïm ke bɔɔth wi ayadäŋ.

²⁷ Ku bäny nu në kɔc nïïm, aake cï kur ke onik bɛ̈ɛ̈i, ayï kur kɔ̈k bï ke bɛ̈n rɛk ë lupɔ de ajïpɔ thok, ayï lupɔ de yɔu.

²⁸ Ku bïïkï wal ŋïr, ayï miök de many alath, ayï miök de tɔc, ayï wɛ̈ɛ̈l ŋïr.

²⁹ Kɔc ke Yithriɛl de piɔ̈ɔ̈th miɔ̈c kedhie, diäär ku röör acïk miɔ̈c de miɛtëpiɔ̈u bɛ̈n yiɛ̈n Bɛ̈nydït, looiyë ke luɔi cï lɛ̈k Mothe.

Atëët ke Paany de Mät

³⁰ Na wën, ke lëk ë Mothe kɔc ke Yithriɛl an, “Tiëŋkï, Bɛ̈nydït ë Bedhalel wën ë Yuri lɔc, Yuri ee wën ë Ɣur raan dhiën ë Juda.

³¹ Ku acïï Bɛ̈nydït thiɔ̈ɔ̈ŋ në wëike, ku gëm tëët, ku nɔm pɛl ku riɛl de ŋïny de käŋ ëbɛ̈n, kë kɔɔr tëët.

³² Ke bï käŋ kiëët në adhääp, ku ateek, ku maläŋ.

³³ Ku bïï kur läk ŋuiëëth, ku guɛŋ tiim, ku kïït këriëëc ëbɛ̈n kë kɔɔr tëët.

³⁴ Ku yen kekë Yooliap wën ë Aɣithamak, raan dhiën ë Dan acïï Bɛ̈nydït keek gäm riɛl bï kek kɔc kɔ̈k wɛ̈ɛ̈t në tëët.

³⁵ Acï keek gäm tëët de këriëëc ëbɛ̈n, në luɔi bï kek aa tëët, ku yek kɔc ee käŋ kiëët, ku yek linɔn lɔ mot gut, ku gutkï lupɔ aräu, ayï lupɔ amujuŋ, ayï lupɔ thith, ayï lupɔɔ kɔ̈k. Ayek atëët ŋic käŋ kiëët, ku alëukï bïk këriëëc ëbɛ̈n looi.