Bɛ̈n 33 - JAM DE NHIALIC 2011

Bɛ̈nydït Ayöök Yithriɛl, Jël në Thinai

¹ Na ɣɔn, ke lëk ë Bɛ̈nydït Mothe an, “Jël ë në wekë kɔc wään bɛ̈ɛ̈iyë ke bei Rip. Lak piny ɣɔn cä thɔ̈n Abraɣam kekë Yithaak, ku Jakop, ayï mïthkɛn bï lɔ̈ɔ̈k tɔ̈u në kecök.

² Wek bä tuöc tunynhial bï we wat. Ku kɔc ke Kanaan abä keek cuɔp wei, ayï kɔc ke Amor, ayï kɔc ke Ɣit, ayï kɔc ke Peridh, ayï kɔc ke Ɣib, ayï kɔc ke Jebuth.

³ Lakï piny ee wat ë ca ku miök ë kiëc. Wek ee kɔc ril nïïm, ka Yɛn cï bï lɔ wo week, ke we cä bï riɔ̈ɔ̈k kueer.”

⁴ Na wën, aa piŋ kɔc ee jamë, ke ke dhiau piɔ̈ɔ̈th arëët, ku lonykï kegup në guëtkɛn läk ku cïkï ke be cieŋ.

⁵ Në biäk cï Bɛ̈nydït Mothe yɔ̈ɔ̈k nɔn lëk en e keek an, “Wek ee kɔc ril nïïm. Na cath wo week na cakaa tëthiinakäŋ ke we duëër riɔ̈ɔ̈k taitai. Ku ënɔɔnë, bɛ̈ɛ̈ikï guëtkuön läk bei ke we bä luöi kë kaar bä looi.”

⁶ Na ɣɔn aacï kɔc ke Yithriɛl jäl në Kuur ë Thinai, akënkï guëtkɛn läk bɛ̈n bɛ aa cieŋ.

Paany de Mät

⁷ Ku ëtɛ̈ɛ̈n, Mothe aaye paany de mät piäät në wut këc biic ke mɛ̈ɛ̈c ke wut. Ku acɔl rin paany de mät. Ku raan ëbɛ̈n, raan de kë kɔɔr bï luɔp tëde Bɛ̈nydït, aaye lɔ ëtɛ̈ɛ̈n.

⁸ Ku të le Mothe në Paanyic, kɔc aake ye kɔ̈ɔ̈c në pɛɛnyken thook biic, ku woikï Mothe abï kɔn ɣet thïn.

⁹ Ku të cï Mothe wɛɛn në paanyic thïn, ke mën de piööl ë luät ee bɛ̈n piny, ku nyuuc në paany thok. Ku jɔ Bɛ̈nydït Mothe jääm ke tɔ̈u në luätic.

¹⁰ Ku të cï kɔc mën de piööl ë luät tïŋ në paany thok, kɔc aake ye röt jɔt ku lɛ̈mkï ke ke gut kenïïm piny.

¹¹ Ku Bɛ̈nydït aaye jam ke Mothe ke ke tuööm nïïm cït man ye raan jam ke mɛ̈thë. Ku dhuŋ cɔl Jocua wën de Nun raan ee ye kuɔɔny, aaye dɔ̈ŋ ke löök rëër ë paanyic.

Bɛ̈nydït Athön Kɔcke Rëër bïï Kek Rëër Ëtök

¹² Go Mothe lɛ̈k Bɛ̈nydït an, “Acï lɛ̈k ɛn ë yic nɔn wat ɛn ee kɔckë pinyë, ku Yïn kën ɛn nyuöth raan bï cath ke yɛn. Acï lueel an ŋic ɛn arëët, ku mit ë piɔ̈u we yɛn.

¹³ Na ee ye ka, ke yï nyuth ɛn kë cï kiëët, ke yï bä luööi, ku ta yï mit piɔ̈u ë cieŋ. Ku ye tak aya nɔn cï Yïn ee jurë lɔc ku tɔ ee kɔcku.”

¹⁴ Go Bɛ̈nydït lɛ̈k en an, “Yɛn bï cath wokë yïn, ku yïn bä tɔ tiëm.”

¹⁵ Go Mothe puk nɔm an, “Du wo tɔ jël ë në të cïï Dhuëëŋdu cath ke wook.

¹⁶ Acïn luɔi bï kɔc ke piny nɔm ye ŋic nɔn mit Yïn piɔ̈u we yɛn, ayï kɔcku të kën Yïn lɔ wekë wook. Täu de dhuëëŋdu ke wook yen abï wo pääk në kɔc ke piny nɔm.”

¹⁷ Go Bɛ̈nydït lɛ̈k Mothe an, “Këriëëc ëbɛ̈n abä looi cït man cïn e lueel në luɔi ŋiɛc ɛn yïn apiɛth, ku miɛt piɔ̈u wokë yïn.”

¹⁸ Na wën, ke lëk ë Mothe Bɛ̈nydït an, “Nyuöthë ya dhuëëŋdu, Bɛ̈nydït yïn läŋ.”

¹⁹ Go Bɛ̈nydït puk nɔm an, “Piathdï ëbɛ̈n abä tɔ tëk ë yïnɔm, ku rinkï abä ke lueel në yïnɔm, rin ɣeriic. Ee Yɛn Bɛ̈nydït, Yɛn ee kɔc cä lɔc nyuöth kok de Yapiɔ̈u, ayï dhuëëŋdï.

²⁰ Yïn cä bï tɔ tïŋ A nyin, në luɔi cïn en raan ee Ya tïŋ nyin ku be pïïr.

²¹ Ku yïn duëër kɔ̈ɔ̈c ë kuur nɔm eenë në Yalɔ̈ɔ̈m.

²² Na ë lë atëk dhuëëŋdï, yïn bä tääu ë köŋ ë kuuric, ku gɛ̈l yïn në Yaciin abä kɔn tëëk.

²³ Ku ëtɛ̈ɛ̈n, Yɛn bï Yaciin jɔ nyaai, ke yï bï Ya jɔ tïŋ kɔ̈u ku cïï Ya tïŋ nyin.”