Bɛ̈n 30 - JAM DE NHIALIC 2011

Yïïŋ de Nyum ë Wal Ŋïr

¹ Go Bɛ̈nydït lɛ̈k Mothe an, “Loi yïïŋ bï wal ŋïr aa nyop në tim akacia.

² Loi ke de aguuk kaŋuan. Tɔ bɛ̈ɛ̈r de yekɔ̈u ee biäk de mitïr, ku dït ë yeyic tɔ ye biäk de mitïr. Ku tɔ bɛ̈ɛ̈rde ke lɔ nhial ee mitïr tök. Ku luöiyë nɔm tuŋ kaŋuan në aguuk nïïm nhial kaŋuan ke ke rɛk në yïk ëtök.

³ Ku rɔth kɔ̈u biic ëbɛ̈n, ayï yenɔm nhial, ayï ye tuŋ në adhäm awai. Ku wiɛlë kɔ̈u piny ëbɛ̈n në atheer adhääp.

⁴ Ku luöiyë kuc ke adhääp kaarou në atheer adhääp thar në biäk kaarou bï wai ye ke ye ɣääc aa tääu thïn.

⁵ Ku loi waike në tim de aluii, ku rɔth kekɔ̈ɔ̈th në adhääp.

⁶ Ku tääuwë ee yïïŋë në gëlgël de lupɔ kɔ̈u biic, bï kaak në akum de athänduŋ de mät nɔm tueŋ. Yen të bän aa mat wokë week ka.

⁷ Të kïït Aron many alath, abï wɛ̈ɛ̈l ŋïr aa nyop në yïïŋ de wal ŋïr nɔm.

⁸ Ku ë lë thëën abï many alath bɛ̈n cuääny thok, ke be kë cït ee kënë nyɔk në luɔi. Miɔ̈c de wal ŋïr ë cath anande ke cïï kɔ̈u tɛɛm.

⁹ Ku ë cïn wɛ̈ɛ̈l nhiany gɛmë në ee yïïŋë nɔm. Ku ë cïn lɛ̈n gɛmë në yenɔm aya, ayï miɔ̈c ye nyop ëbɛ̈n ayï miɔ̈c ë rap, ku ë cïï piökë nɔm miɔ̈c ë mɔ̈u.

¹⁰ Ku abï Aron en aa teem guöp raantök në ruöönic ëbɛ̈n. Abï riɛm de län cï näk miɔ̈c de kërac de atɛɛm aa nööm, ku teem en ke yïk ku tɔc tuŋ ke yïk kaŋuan. Kënë ë ye looi në runiic ëbɛ̈n. Ku yen ee yïïŋë, ë gëmë Yɛn, Yɛn Bɛ̈nydït, ku abï dhil tɔ̈u ke ɣeric aläl anande.

Juɛ̈ɛ̈r de Kake Paany de Mät

¹¹ Go Bɛ̈nydït lɛ̈k Mothe an,

¹² “Të gɛ̈ɛ̈r yïn kuën de kɔc ke Yithriɛl, ke raan ëbɛ̈n abï yekɔ̈u aa waar, ke cïn jɔŋ bï ye bɛ dɔm të kuëën ë kenyïïn.

¹³ Raan cï mat ë kuënic ëbɛ̈n, abï wëu cï lueel aa tääu piny, cït kuën de tëɣeric. Kënë abï raan ëbɛ̈n tääu piny ke ye miɔ̈c miɔɔc en Ɛn.

¹⁴ Raan cï mɛt ë kuɛ̈nic ëbɛ̈n, abï wëukë tɔ̈ɔ̈u, gɔl në raan ee run thiërrou ku le tueŋ.

¹⁵ Raan kueth ë cïï wëu juëc tɔ̈u, ku raan kuany nyin ë cïï wëu lik tɔ̈u. Në baŋ ye kek wëu gämkï Bɛ̈nydït ke ye ka teem ë week gup.

¹⁶ Määtkï wëu ke atɛɛm yiic tëde kɔc ke Yithriɛl kedhie, ku dɔ̈t wek paany de mät. Kakë ee wëu bïï ë week teem gup. Ku Yɛn bï Yanɔm aa tak, ku gɛ̈l keek.

Thaaŋ Maläŋ

¹⁷ Go Bɛ̈nydït lɛ̈k Mothe an,

¹⁸ “Cuëc thaaŋ ë maläŋ, ku cuɛ̈cë thar kuny maläŋ. Ku yiëkë yic pïïu, ku tääuwë në kaam de paany de mät kekë yïk.

¹⁹ Pïïukë abï Aron yecin aa waak, ku wɛɛk en yecök kekë wɛ̈ɛ̈tke

²⁰ të kën kek kɔn lɔ ë paany de mätic, ayï të le kek në yïïŋ de ka ye nyop lɔ̈ɔ̈m. Ke ke cïï bï nɔ̈k.

²¹ Abïk kecin dhiɛl aa waak, ayï kecök, ke ke cï bï thou. Abïk ee löŋë döt aɣet athɛɛr kedhie ayï mïthkɛn bï lɔ̈ɔ̈k tɔ̈u në kecök.

Miök de Tɔc

²² Go Bɛ̈nydït lɛ̈k Mothe an,

²³ “Nöm wal ŋïr lɔ mot. Ku nöm mer lɔ laulau në bot kadhïc ke wëëth. Ku nöm wɛ̈ɛ̈l ŋïïr cɔl kinamon në bot kaarou ke wëëth. Ku bot kaarou ke bëël ŋïr.

²⁴ Ku bot kadhetem në kathiya. Ku litir kaŋuan në miök de olip, në kuën de tëɣeric.

²⁵ Ku loi miök de tɔc ɣeric, ë looi ë kɔc ë wɛ̈ɛ̈l ŋïr looi.

²⁶ Ku tɔc paany de mät, ku athänduŋ de mät,

²⁷ ku paam kekë kake kedhie, ku kë ye manyalath cäp thar thïn kekë kake kedhie, ku yïïŋ de nyum ë wal ŋïr,

²⁸ ku yïïŋ de miɔ̈c ye nyop ëbɛ̈n kekë kake kedhie, ku thaaŋ ë wɛ̈k kekë kunyde.

²⁹ Gämë keek aya, ku abïk yiic ɣɛɛr aläl, ku kë lɔ keek jak, nɔn ee yen raan ku nɔn ee yen këdäŋ, abïï riɛl de ɣɛɛr de yic keek aa luöi këtuc.

³⁰ Ku jɔ Aron tɔc kekë wɛ̈ɛ̈tke. Ku tɔ ke ee bäny ke kake Nhialic bïk Ɛn aa luööi.

³¹ Ku lɛ̈kë kɔc ke Yithriɛl an, “Yen miök bï jɔ aa miökdiën de tɔc ɣeric ka në rɛmiic ëbɛ̈n.

³² Ë cïï kɔc ee tɔc baaŋ, ku miök cït en ë cïï loi. Yen ee miök ɣeric, ka bäk aa looi ke ye kë ɣeric.

³³ Ku raan ëbɛ̈n, raan lɔ miök cït ee miökë looi, ku le yen tɔc ke cie bɛ̈ny de kake Nhialic. Yen ee raanë abï tɛɛm wei në kɔckï yiic.”

Wɛ̈ɛ̈l ŋïr Ye Nyop

³⁴ Go Bɛ̈nydït lɛ̈k Mothe an, “Nöm wal ŋïr në kuën kït, nöm yethek, ku anika, ku galbanum, parankinthe piɛth.

³⁵ Ku looi yïn wal ku wɛ̈ɛ̈l ŋïr. Ku yiëkë yic amilɔ thiinakäŋ ke bï ye döt ke lɔ wai ku ɣeeric.

³⁶ Ɣɔ̈l keek kedhie abïk lɔ mot. Ku lɛɛrë keek në Paany de Mätic, lɔ wiɛ̈ɛ̈thë në athänduŋ de mät nɔm tueŋ. Ye wɛ̈ɛ̈l ŋïr looi në luɔi de kë ɣeric.

³⁷ Duökï röt ee luöi wɛ̈ɛ̈l ŋïr cït en. Ye looi ke ye kë ɣeric cï gäm Ɛn.

³⁸ Të le raan aŋiëër cït en luöi rɔt, yen rɔt yoor, abï tɛɛm wei në kɔckï yiic.”