Bɛ̈n 3 - JAM DE NHIALIC 2011

Nhialic Acɔl Mothe

¹ Kööl tök, Mothe aa tit thök ke Jethro, monywun, bɛ̈ny dïït de kake Nhialic de Midian. Na wën, ke Mothe ë tëm thök jɔ̈ɔ̈r kɔ̈u, leer keek ë jɔ̈ɔ̈r thok baŋ të lɔ aköl athɛ̈i. Go ɣet Thinai, kuur ë Nhialic.

² Go tunynhial ë Bɛ̈nydït tuöl tëde yen ëtɛ̈ɛ̈n ke ye lɔ̈k ë many dɛ̈p ë butic. Go Mothe mac tïŋ ke dɛ̈p ë butic, ku but acïï dɛ̈p.

³ Go lueel ë yepiɔ̈u an, “Ee kë mɛɛn yen ee kënë, eeŋö dëpë mac ku cïï but cam? Ya lɔ tëthiɔ̈k la tïŋ.”

⁴ Na wën, aa tïŋ Bɛ̈nydït Mothe ke bɔ̈ tëthiɔ̈k, ke Nhialic ë cöt në bun dɛ̈pë yic ëtɛ̈ɛ̈n an, “Mothe! Mothe!” Go Mothe gam an, “Woi, yakï.”

⁵ Go Nhialic lɛ̈k en an, “Duk bɔ̈ tëthiɔ̈k. Bɛ̈ɛ̈iyë warku bei ë yïcök, në luɔi kɛ̈ɛ̈c yïn tëɣeric.

⁶ Ee Yɛn Nhialic de kuarkun, Nhialic de Abraɣam kekë Yithaak ku Jakop.” Go Mothe riɔ̈ɔ̈c luɔi bï yen Nhialic woi, go yenyin kum.

⁷ Go Bɛ̈nydït lueel an, “Yɛn ë ciɛɛŋ kuc ë kɔckï cieŋ tïŋ paan ë Rip, ku piɛŋ dhiënden aya. Dhiën dhiëëu kek luääk luɛ̈k ë ke bei në bäny yɔŋ keek cin. Ku Yɛn ë guöm gum kek tïŋ,

⁸ ka Yɛn aa bɔ̈ piny, bä keek bɛ̈n luäk bei në kɔc ke Rip cin. Ku bɛ̈ɛ̈i keek bei piny ë Rip, lɛɛr keek piny piɛth dïït lääu. Piny ee wat ë ca ku miök ë kiëc. Piny rëër ë kɔc ke Kanaan thïn, ku kɔc ke Ɣit, ku kɔc ke Amor, ku kɔc ke Peridh, ku kɔc ke Ɣib, ku kɔc ke Jebuth.

⁹ Kiɛɛu de kɔckï acä piŋ në luɔi cï kɔc ke Rip ke miɛn.

¹⁰ Ku ënɔɔnë, yïn tuöc melik ë Rip bä kɔckï lɔ bɛ̈ɛ̈i bei pinyde.”

¹¹ Go Mothe lɛ̈k Nhialic an, “Ee yɛn ŋa, ka yɛn duëër jɔ lɔ tëde melik, ku la kɔc ke Yithriɛl bɛ̈ɛ̈i bei ë Rip?”

¹² Go Nhialic lueel an, “Yɛn bï tɔ̈u wo yïn, ka wadäŋ të le yïn ke bɛ̈ɛ̈i bei paan ë Rip, wek bï bɛ̈n lam në ee kuurë nɔm eenë. Yen abï ye jɔ ŋic nɔn ee Yɛn ë toc yïn.”

¹³ Go Mothe lɛ̈k Nhialic an, “Na ja lɔ tëde kɔc ke Yithriɛl, la lɛ̈k keek an, ‘Nhialic de kuarkun ë ya tuöc week,’ ku jɔkï ya luɔp an, ‘Cɔl ŋa?’ Kë bä jɔ lɛ̈k keek adï?”

¹⁴ Go Nhialic lɛ̈k en an, “Yɛn aye Yen. Abä lɛ̈k keek an, ‘Raan cɔl Yɛn aye Yen, yen aa tuc ɛn week.’

¹⁵ lɛ̈kë kɔc ke Yithriɛl an, Ee Bɛ̈nydït Nhialic de kuarkun, Nhialic de Abraɣam kekë Yithaak, ku Jakop yen ë tuc ɛn week. Kek rinkï ka anandï, rin bï rɛm Ya aa cɔɔl në rɛm bɔ̈ ciëënë yiic ëbɛ̈n.

¹⁶ Lɔ mat röördït ke Yithriɛl nïïm kedhie, ku lɛ̈kë keek an, ‘Yɛn Bɛ̈nydït Nhialic de kuarkun, Nhialic de Abraɣam kekë Yithaak, ku Jakop, acï tuöl tëde yɛn. Ku acï lueel an, cï we tïŋ, ku tïŋ kë luiyë week paan ë Rip.

¹⁷ Ka yen acï Yen en tak nɔn bï Yen week bɛ̈ɛ̈i bei piny ë Rip, ku leer week piny ë kɔc ke Kanaan, ku kɔc ke Ɣit, ku kɔc ke Amor, ku kɔc ke Peridh, ku kɔc ke Ɣib, ku kɔc ke Jebuth, piny ee wat ë ca ku miök ë kiëc!’ ”

¹⁸ Ku kɔckï abïk yïn piŋ thok. Ku ëtɛ̈ɛ̈n, yïn bï jɔ lɔ tëde melik ë Rip wekë röördït ke Yithriɛl, lak lɛ̈k en an, ‘Bɛ̈nydït Nhialic de Ɣeberuu acï rɔt nyuöth wook. Ka yïn gam nɔn bï wok nïn kadiäk nööm ke wo cath ë jɔ̈ɔ̈ric, lok Bɛ̈nydït Nhialic näk.’

¹⁹ Ku aŋiɛc nɔn cïï melik de Rip we bï puɔ̈l ajäl të kënë ye kɔn miɛn, ku tɔ päl we ajäl në riɛl.

²⁰ Ku riɛldï abä nyuɔɔth. Yɛn bï kake gäi tuc thook looi ë Rip. Ku në ee kakë cök kedhie, melik de Rip abï week jɔ puɔ̈l ajäl.

²¹ “Wek bä tɔ rïïu ë kɔc ke Rip, na miäk aa jälkï ke we cï bï jäl ë wecin.

²² Tik ëbɛ̈n në diëër ke Yithriɛliic, abï tiiŋ ë Rip thiëëk kek aa lip, ku nɔn ee yen tiiŋ rëër en ɣönde. Abïï lip ë lupɔɔ, ku joth ke adhääp, ku joth ke ateek. Ku abï diëërkun ke lɔ tääu në mïthken gup, ayï duetken aya. Ku abïk wëu ke kɔc ke Rip jat wei ëbɛ̈n në ee kueerë.”